ސަމާލު! ފްލެޓް ލިސްޓް ކަމަށް ބުނެ ފޮނުވަނީ ފޭކު ލިންކެއް، ނުވަންނާތި!

ކުރީ ސަރުކާރުން ހިންގި ގެދޮރުވެރިޔާ ސްކީމްގެ ދަށުން 4000 ފްލެޓް ލިބޭ މީހުންގެ ވަގުތީ ލިސްޓް ކަމަށް ބުނެ ސްކޭމް މެސެޖުތަކެއް ފޮނުވަން ފަށައިފި އެވެ.

ބަޔަކު ފޮނުވަމުންދާ އެ މެސެޖުގައި ވަނީ ގެދޮރުވެރިޔާ ފްލެޓްތައް ލިބޭ ފަރާތްތަކުގެ ލިސްޓް ހައުސިން މިނިސްޓްރީން މިއަދު އިއުލާނު ކޮށްފައިވާ ކަމަށެވެ. އަދި ތިރީގައި ލިންކެއް ވެ އެވެ. އެ ލިންކަށް ފިތާލުމުން ލޮގިންވާ އަރަ އެވެ. އެބައި ޑިޒައިން ކޮށްފައި ވަނީ އެޗްޑީސީގެ ލޯގޯ ވެސް ފެންނާނެ ހެނެ އެވެ.

މިއީ ޒާތީ މައުލޫމާތު ހޯދުމާއި އޮޅުވާލުމުގެ ތެރެއިން ފައިސާ ހޯދުން ފަދަ ކަންކަމަށް މަގުފަހި ކުރަން ވެގެން ސްކޭމަރުން ހިންގާ އަމަލެކެވެ.

ގެދޮރުވެރިޔާ ސްކީމަށް ހުށަހެޅި ހުރިހާ ފޯމެއް ރިއިވެލުއޭޓު ކުރުމުގެ މަސައްކަތް ކުރަމުންދާ ކަމަށް މިނިސްޓްރީން ބުނާތާ އެތައް ދުވަހެއް ވެއްޖެ އެވެ. އޭގެ ކުރީން ފުލެޓުގެ ހައްގުވެރިންގެ ލިސްޓު ދިރާސާކުރަން އެކުލަވައިލި "ހައުސިން އެޑްވައިޒަރީ ކޮމިޓީ" އާއި މާލެ ސިޓީ ކައުންސިލުން އެކުލަވާލި "ހައުސިން ކޮންސަލްޓެޓިވް ކޮމިޓީ" އަށްވެސް ކުރީ ސަރުކާރުން އެކުލަވައިލި ލިސްޓަކީ ރަނގަޅަށް އެކުލަވައިލި ލިސްޓެއް ކަމުގައި ގަބޫލުނުކުރެވޭ ކަމަށް އޮތީ ބުނެފަ އެވެ.

ލިސްޓް އާންމު ކުރާނެ ކަމަށް ބުނެ ކުރީން އެތަައް ތާރީހެއް ދިނުމަށް ފަހު މި ފަހުން ހައުސިން މިނިސްޓަރު ޑރ. އަލީ ހައިދަރު ވަނީ އިތުރު ދެ ތާރީހެއް ދެއްވާފަ އެވެ. ފަހުން ދެއްވި ތާރީހު އިއްޔެ ހަމަވާނެ އެވެ.

މިނިސްޓްރީން އިއްޔެ ބަޔާނެއް ނެރެ ބުނީ ފްލެޓަށް ހުށައަޅާފައިވާ 20،000 ވުރެ ގިނަ ފޯމް ބެލުމުގައި ކަށަވަރު ކުރަން ޖެހޭ ގިނަ ކަންތައްތަކެއް ހުރުމުން އިތުރު ވަގުތު ބޭނުންވާ ކަމަށެވެ. އަދި މިނިސްޓްރީން ކުރަމުންދާ މަސައްކަތްތަކުގެ ތަފްސީލް ފަހުން ހާމަ ކުރާނެ ކަމަށެވެ.

ލިސްޓް އާންމުކުރުން ފަސްވީ ނަމަވެސް ސަރުކާރުގެ މަގުސަދަކީ ފްލެޓް ހޯދަން ހުށައެޅި އެއްވެސް މީހެއްގެ ހައްގު ގެއްލިގެން ނުދާނެކަން ކަށަވަރު ކުރުން ކަމަށެވެ. އަދި ބުނީ ފްލެޓް ލިބޭނީ ސީދާ ހައްގުވެރީންނަށް ކަމަށެވެ.

މި ބަޔާނުގައި ލިސްޓް އާންމު ކުރާނެ އިތުރު ތާރީހެއް ނުދެ އެވެ.