ސޯލިހު ރައީސަށް ލިޔުއްވި ސިޓީ؛ ތިމާއަކީ ރައްޔިތުންގެ ހާދިމެއްކަން ހަނދުމަފުޅުގައި ބަހައްޓަވާތި

ނޮވެމްބަރު 17، 2023 ދުވަހު ރައީސް އޮފީހުން ނުކުމެވަޑައިގަތުމުގެ ކުރިން، ރައީސުލްޖުމްހޫރިއްޔާ ކަމުގެ މަގާމާ ހަވާލުވެވަޑައިގަންނަވާ ޑރ. މުހައްމަދު މުއިއްޒަށް އަތު ލިޔުމުން ސިޓީއެއް ލިޔުއްވައި، މޭޒުކޮޅުގައި ބޭއްވެވި ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

އެކަން ރައީސް ސޯލިހު ހާމަކުރެއްވީ މިއަދު ރާއްޖެޓީވީގެ "ފަށާއިރު" ޕްރޮގްރާމަށް ދެއްވި އިންޓަވިއުއެއްގަ އެވެ. މިއީ މިސިޓީގެ ވާހަކަ އެމަނިކުފާނު ދެއްކެވި ފުރަތަމަ ފަހަރެވެ.

ރައީސް ސޯލިހު ވިދާޅުވީ އެދުވަހު ހުރިހާ ކަމެއް ނިންމާލުމަށްފަހު އެންމެ ފަހު ކަމަކަށް ރައީސް އޮފީހުގައި ކުރެއްވި ކަމަކީ، އަލަށް ރައީސުލްޖުމްހޫރިއްޔާގެ ގޮނޑީގައި އިށީންދެވަޑައިގަންނަވާ ރައީސަށް ނޯޓެއް ނުވަތަ ސިޓީއެއް ލިޔުއްވުމެވެ.

"އަޅުގަނޑުގެ ފަސް އަހަރުގެ ތަޖުރިބާއާއެކީގަ، ކަންކުރާއިރު ކުރިމަތިވި ދަތިތަކާ، ކުރަން ޖެހޭ ގޮތް އެ ފަސް އަހަރުތެރޭގަ ކުރެވުނު ތަޖުރިބާގެ އަލީގައި ދެން ވަޑައިގަންނަވާ ބޭފުޅަކަށް އަޅުގަނޑަށް ފެންނަ އެއްޗެއް އަޅުގަނޑު ޖެހޭނެ ނޯޓް ކޮށްލާފަ ބާއްވަން. އެގޮތުން ސިޓީއެއް އަޅުގަނޑު އަތުން ލިޔެފަ މޭޒުމަތީގަ ބޭއްވިން،"

ރައީސް ސޯލިހު ލިޔުއްވި ސިޓީގައި ވަނީ ނަސޭހަތުގެ ބަސްކޮޅެކެވެ. އެގޮތުން، އެ މަގާމަކީ ވަރަށް ބޮޑު އަމާނާތެއް އަދި ބޮޑު މަސްއޫލިއްޔަތެއް ކަމަށާއި، އެ މަގާމާ ހަވާލުވެވަޑައިގަންނަވާ ކޮންމެ ބޭފުޅަކުވެސް މަސައްކަތް ކުރައްވަން ވާނީ އެއްވެސް ރައްޔިތަކު ތަފާތު ނުކޮށް ކަމަށް ލިޔުއްވާފައިވެ އެވެ.

"އުނދަގޫ ކިތަންމެ ވަގުތަކާ ކުރިމަތިލާން ޖެހޭނެއެވެ. ތިމާ ބޭނުންވާ ގޮތަށް ކަންކަން ނިންމަން ދަތިވާ ވަގުތު އަންނާނެއެވެ. އަދި ތިމާ ބޭނުންނުވާ ގޮތަށް ކަންތައް ނިންމަން ޖެހޭ ވަގުތުތަކާވެސް ބައްދަލުވާނެއެވެ. އެއިން ކޮންމެ ވަގުތެއްގައިވެސް އިސްކުރަންވާނީ ރައްޔިތުންގެ ހައްގުތަކާއި ގައުމީ މަސްލަހަތެވެ." ރައީސް ސޯލިހު ލިޔުއްވާފައިވާ ސިޓީގައިވެ އެވެ.

ސިޓީ ނިންމާލައްވަމުން ރައީސް ސޯލިހު ލިޔުއްވާފައި ވަނީ، "ތިމާ އަކީ ރައްޔިތުންގެ ހާދިމެއްކަން އަބަދުވެސް ހަނދުމަފުޅުގައި ބަހައްޓަވާށެވެ. މަޝްވަރާ ކުރައްވާށެވެ." މިހެންނެވެ.

މިއަދުގެ އިންޓަވިއުގައި ރައީސް ސޯލިހު ވިދާޅުވީ، ރައީސް އޮފީހުން ނުކުމެވަޑައިގަތީ އެ ސިޓީ ސީދާ ރައީސް މުއިއްޒުގެ އަތްޕުޅަށް ލިބޭނެކަން ކަށަވަރު ކުރެއްވުމަށްފަހުގައި ކަމަށެވެ.

"އޭގެއިން [ސިޓީ] އިން ކޮންމެވެސް ކަހަލަ އިބުރަތެއް ރައީސުލްޖުމްހޫރިއްޔާއަށް ލިބިވަޑައިގަންނަވާނެ ކަމަށް އަޅުގަނޑު އުންމީދު ކުރީ،" ރައީސް ސޯލިހު ވިދާޅުވި އެވެ.

މި ސިޓީގެ ވާހަކަ މިހާތަނަށް ރައީސް މުއިއްޒު ވެސް ދައްކަވާފައެއް ނުވެ އެވެ. މިއީ ރައީސުލްޖުމްހޫރިއްޔާކަން ކުރެއްވި ބޭފުޅަކު ގެއަށް ވަޑައިގަތުމުގެ ކުރިން އަލަށް ހަވާލުވެވަޑައިގަންނަވާ ރައީސަކަށް މިފަދަ ގޮތަކަށް ސިޓީއެއް ލިޔުއްވި ފުރަތަމަ ފަހަރެވެ.