އޭދަފުށީގައި 1،000 ހައުސިން ޔުނިޓު އަޅަން ހަވާލުކޮށްފި
މި އެއްބަސްވުމުގެ ދަށުން އޭދަފުށީގައި 15 ބުރީގެ 12 ޓަވަރު އަޅާއިރު މި ޓަވަރުތަކުގައި ތިން ކޮޓަރީގެ 336 ފުލެޓާއި ދެ ކޮޓަރީގެ 672 ފުލެޓު ހުންނާނެ އެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވައުދުފުޅާ އެއްގޮތަށް ބ.އޭދަފުށީގައި 1،000 ހައުސިން ޔުނިޓު އެޅުމުގެ މަޝްރޫއު ހަވާލުކޮށްފި އެވެ.
މި މަޝްރޫއު ހަވާލުކޮށްފައިވަނީ ޗައިނާގެ ސައިނޯހައިޑްރޯ ކުންފުންޏާ އެވެ. މިއަދު ރައީސް އޮފީހުގައި އޮތް ރަސްމިއްޔާތެއްގަައި ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ ކޮންސްޓްރަކްޝަން މިނިސްޓަރު ޑރ.އަބްދުﷲ މުއްތަލިބެވެ. އަދި ސައިނޯހައިޑްރޯ ފަރާތުން ސޮއިކުރެއްވީ އެ ކުންފުނީގެ ކަންޓްރީ މެނޭޖާ ޕެން ހުއާން ޝޫ އެވެ.
މި ރަސްމިޔާތުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒާއި ޗައިނާއިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު ބައިވެރިވެވަޑައިގެންނެވި އެވެ.
އެއްބަސްވުމުގައި ސޮއިކުރެއްވުމަށްފަހު ދެއްކެވި ވާހަކަފުޅުގައި ޑރ.މުއްތަލިބު ވިދާޅުވީ މިއަދު ސޮއިކުރެވޭ އެއްބަސްވުމަކީ މޭ މަހުގައި އެކުލަވައިލެވުނު އެމްއޯޔޫއެއްގެ ދަށުން ކުރެވުނު ބޮޑު މަސައްކަތުން އެކުލަވައިލެވުނު އެއްބަސްވުމެއް ކަމަށެވެ.
އަދި މި އެއްބަސްވުމުގެ ދަށުން އޭދަފުށީގައި 15 ބުރީގެ 12 ޓަވަރު އަޅާނެކަން އިއުލާނުކުރައްވައި މިނިސްޓަރު ވިދާޅުވީ އެގޮތަށް އުސް ޓަވަރުތަކެއް އަޅަނީ އޭދަފުއްޓަކީ އާބަން ސެންޓަރެއްގެ ގޮތުގައި ކަނޑަަޅާފައިވާ ރަށަކަށްވާތީ ބިން އިތުރުކުރެވެން ނެތް ރަށަކަށްވާތީ އުސްކޮށް އިމާރާތްކޮށްގެން ބިން އެންމެ ރަނގަޅަށް ބޭނުންކުރެވޭ ގޮތަށް މަޝްރޫއު ކުރިއަށްގެންދިއުމަށް ކަމަށެވެ.
މި ޕްރޮޖެކްޓުގައި ހިނެނޭނީ ތިން ކޮޓަރީގެ 336 ފުލެޓާއި ދެ ކޮޓަރީގެ 672 ފުލެޓު މި މަޝްރޫއުގެ ތެރޭގައި ހިމެނޭނެ ކަމަށްވެސް މުއްތަލިބު ވިދާޅުވި އެވެ.
މުއްތަލިބު ވިދާޅުވީ އޭދަފުށި ވަށައިގެން ވަރަށް ގިނަ ރިސޯޓުތައް ހުރުމާއެކު، ޓޫރިޒަމްގެ މަސައްކަތްތެރިންނަށް މަސައްކަތް ކުރާ ސަރަހައްދުތަކުން ބޯހިޔާވަހިކަން ފޯރުކޮށްދެއްވުމަށް ރައީސް މުއިއްޒު ވެވަޑައިގެންފައިވާ ވައުދުފުޅު ފުއްދުމަށް އެންމެ ރަނގަޅު އެއް ރަށަކީ އޭދަފުށި ކަމަށެވެ.
މިނިސްޓަރު އިތުރަށް ވިދާޅުވީ އުންމީދުކުރަައްވަނީ އެއްބަސްވުމުގެ ދަށުން ފައިސާ ހަމަޖެހިގެން އަންނަ އަހަރުގެ ތެރޭގައި އެ މަޝްރޫއު ފެށި މި ދައުރުގެ ތެރޭގައި މަސައްކަތް ނިމި އެތަންތަނުގައި މީހުން ދިރިއުޅެން ފެށުން ކަމަށެވެ.
މުއްތަލިބު ވިދާޅުވީ މި މަޝްރޫއަކީ އޭދަފުށި ކައިރީ ހުރި ރިސޯޓުތަކުގައި އުޅޭ މުވައްޒަފުންނަށްވެސް އޭދަފުށިން ބޯހިޔާވަހިކަމުގެ ފުރުސަތު ލިބޭނެ މަޝްރޫއަކަށް ކަމަށެވެ. އަދި އޭދަފުށީގައި އާބާދީއާއި ތަރައްގީ އެއްފަސްކުރުމަށް އެޅިގެންދާ މުހިއްމު ބިންގަލަކަށް ކަމުގައިވެސް އޭނާ ވިދާޅުވި އެވެ.
ކޮމެންޓް
Republic of Maldives