"ކުރިއަށް އޮތް ހަތަރު އަހަރު ވާނީ ސިއްހީ ނިޒާމަށް އާ ބާބަކަށް"
ނާޒިމް ވިދާޅުވީ ކުރިއަށް އޮތީ ސިއްހީ ދާއިރާއަށް އުފާވެރި ދުވަސްތަކެއް ކަމަށް ރައްޔިތުން ދެން ތިބޭނީ ހިނިތުންވެލައިގެން ކަމަށް އޭނާ ވިދާޅުވި އެވެ.
ވޭތުވެދިޔަ އެއްއަހަރު ކުރެވުނު ކުރެވުނު މަސައްކަތާއި، ނިޒާމު ހަރުދަނާ ކުރުމަށް ފަށާފައިވާ މަސައްކަތާއެކު ކުރިއަށް އޮތް ހަތަރު އަހަރު ވާނީ ރާއްޖޭގެ ސިއްހީ ނިޒާމުގެ މުޅިން އާ ބާބެއް ލިޔެވިގެންދާނެ ހަތަރު އަހަރަށް ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެ އެވެ.
ޓާޝަރީ ފެންވަރުގައި ދަރުމަވަންތަ ހޮސްޕިޓަލް ރަސްމީކޮށް ހުޅުވުމަށް ރޭ ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު ނާޒިމް ވިދާޅުވީ ބޭސްފަރުވާގެ ނިޒާމު ހަރުދަނާކޮށް ފުޅާ ކުރުމާއި، ބަލިމަޑުކަމުން ދުރުހެލިވެފައި އޮތް ދުޅަހެޔޮ އާބާދީއެއް ބިނާކުރުމާއި، ސިއްހީ ދާއިރާގެ ގަވަނެންސް ހަރުދަނާ ކުރުން ފަދަ ކަންކަން ސީދާ ރައީސް ޑރ. މުހައްމަދު މުއިއްޒުގެ ބެއްލެވުމުގެ ދަށުން ވޭތުވެ ދިޔަ ދުވަސްތަކުގައި ފަށާފައިވާ ކަމަށެވެ.
އަދި، ހެލްތު އިންޝުއަރެންސް ހަރުދަނާ ކުރުމާއި މީހުން ބިނާ ކުރުމުގެ މަސައްކަތް ވެސް ވޭތުވެ ދިޔަ އަހަރެއްހާ ދުވަސް ތެރޭގައި ފަށާފައިވާ ކަމަށެވެ.
"ދިވެހި މުޖުތަމައުއަކީ ބަލި ނިޒާމެއްގެ ފަހަތުން ދުވާ ސިއްހީ މުޖުތަމުއެއްކަމުގައި ދެކޭކަށް ރައީސްގެ ސިއްހީ ސިޔާސަތުތައް ތަނެއް ނުދޭ. އޭގެ ހެއްކެއްގެ ގޮތުން އަޅުގަނޑުމެންނަށް ފެންނަނީ ދިވެހި މުޖުތަމައު ދުޅަހެޔޮ މުޖުތަމައުއެއްގެ ގޮތުގައި ބޭއްވުމަށްޓަކައި ރައީސް އަޅުއްވަމުން ގެންދަވާ މުހިންމު އެހެނަސް އުނދަގޫ ފިޔަވަޅުތައް،" ނާޒިމް ވިދާޅުވި އެވެ.
ނާޒިމް ވިދާޅުވީ 2018 ވަނަ އަހަރު ދަރުމަވަންތަ ހޮސްޕިޓަލްގެ މަސައްކަތް ނިމުނީއްސުރެ ވޭތުވެދިޔަ ހައެއްކަ އަހަރު އެތަނަށް ވަރަށް ބޮޑަށް އިހުމާލުވެފައިވާ ކަމަށެވެ. ދިވެހި މާލިއްޔަތުން ގާތްގަނޑަކަށް 200 އެތައް މިލިއަނެއް ހަރަދުކޮށްގެން އަޅާފައިވާ އިމާރާތުގެ އޮޕަރޭޝަން ތިއޭޓަރުތަކުގައި ތަޅުއަޅުވައި، ގިނަ ފްލޯތައް ގުދަނަކަށް ބަދަލުކޮށްފައި ހުރި ހުރުމަކީ ރައްޔިތުންނަށް ވެސް ވެފައިވާ އިހުމާލެއް ކަމަށް ނާޒިމް ވިދާޅުވި އެވެ.
މިކަމަށް އިސްކަން ދެއްވައިގެން، ސިއްހީ ނިޒާމުގައި ހުރި ބާގަނޑުތައް ފޫބައްދަން ރައީސް ކުރައްވަމުން ގެންދަވާ މަސައްކަތްޕުޅު ނާޒިމް ފާހަގަކުރެއްވި އެވެ.
"އަޅުގަނޑު ގަބޫލުކުރާގޮތުގައި މިރޭ އަޅުގަނޑުމެންނަށް އިހުތިފާލުކުރެވެނީ ދަރުމަވަންތަ ހޮސްޕިޓަލް ހަމައެކަނި ޓާޝާރީ ފެންވަރަށް ދެމިގެން ދިއުމުގެ އިހުތިފާލެއް ނޫން. މިހަފްލާއިން އަޅުގަނޑަށް ފެންނަނީ މާ އުންމީދީ މަންޒަރެއް. އަޅުގަނޑު ކުރިން ދެންނެވިހެން ދިވެހިރާއްޖޭގެ ސިއްހީ ނިޒާމުގައި ހުރި އެތައް ބާގަނޑުތަކެއް ފުއްދެވުމަށްޓަކާ ރައީސް ކުރައްވަމުން ގެންދަވާ ބުރަ މިންނެތް މަސައްކަތް،" ނާޒިމް ވިދާޅުވި އެވެ.
ނާޒިމް ވިދާޅުވީ ކުރިއަށް އޮތީ ސިއްހީ ދާއިރާއަށް އުފާވެރި ދުވަސްތަކެއް ކަމަށް ރައްޔިތުން ދެން ތިބޭނީ ހިނިތުންވެލައިގެން ކަމަށް އޭނާ ވިދާޅުވި އެވެ.
ކޮމެންޓް
Republic of Maldives