އިސްވެރީންނަށް ވިސާ ނެތި އަޒަރުބައިޖާނަށް ވަދެވޭނެ ގޮތް ވެއްޖެ

ދިވެހިރާއްޖޭގެ ޑިޕްލޮމެޓިކް އަދި އޮފިޝަލް ޕާސްޕޯޓް ބޭނުންކުރައްވާ ފަރާތްތަކަށް ވިސާ އާއި ނުލައި އަޒަރުބައިޖާން އެތެރެވުމުގެ ފުރުސަތު ލިބޭ އެއްބަސްވުމެއް ހަދައިފި އެވެ.

ރާއްޖެއާއި އަޒަރުބައިޖާންއާ ދެމެދު މުހިއްމު ދެ އެއްބަސްވުމެއްގައި ސޮއިކޮށް، ދެ ގައުމުގެ ގުޅުން އިތުރަށް ފުޅާކުރުމާއި ގުޅޭގޮތުން ވަނީ މަަޝްވަރާ ކޮށްފަ އެވެ.

ފޮރިން މިނިސްޓްރީން ބުނީ މިނިސްޓަރު ޑރ. އަބްދުﷲ ހަލީލް  އަޒަރުބައިޖާންގެ ފޮރިން މިނިސްޓަރު ޖޭހުން ބައިރަމޯވް އާ މިއަދު ބައްދަލުކުރެއްވި ކަމަަށެވެ. މިބައްދަލުވުގައި ދިިވެހިރާއްޖެއާއި އަޒަރުބައިޖާންއާ ދެެމެދު އޮތް ގާތް ގުޅުން އިތުރަށް ފުޅާކުރުމާއި ގުޅޭގޮތުން މަޝްވަރާ ކުރެއްވި ކަމަށެވެ.

އަޒަރުބައިޖާންގެ ވެރިރަށް ބާކޫ ގައި ކުރިއަށްދާ ކޮންފެރެންސް އޮފް ދަ ޕާރޓީސް އޮފް ދަ ޔޫއެންއެފްސީސީސީ ގެ ހަވާސާގައި ބޭއްވުނު މިބައްދަލުވުމަށްފަހު މުހިއްމު ދެ އެއްބަސްވުމެއްގައި ދެ ބޭފުޅުން ސޮއިކުރެއްވި އެވެ.

އެގޮތުން ސޮއިކުރެވުނު "އެގްރީމެންޓް އޮން މިއުޗުއަލް އެގްޒެމްޕްޝަން އޮފް ވިސާ ރިކުއަރމަންޓް ފޯ ހޯލްޑާސް އޮފް ޑިޕްލޮމެޓިކް، ސަރވިސް އެންޑް އޮފިޝަލް ޕާސްޕޯޓްސް ބިޓްވީން ދަ ގަވާންމެންޓް އޮފް މޯލްޑިވްސް އެންޑް ދަ ގަވާންމެންޓް އޮފް އަޒެރްބައިޖާން" އަކީ ދެ ގައުމުގެ ރައްޔިތުންނަށް ދަތުރުފަތުރުކުރުމުގައި ލުއިފަސޭހަގޮތްތަކެއް ހޯދައިދިނުމުގެ މަގްސަދުގައި ސޮއިކުރެއްވުނު އެެއްބަސްވުމެއް ކަމަށް ފޮރިން މިނިސްޓްރީން ބުންޏެވެ.

މިއެއްބަސްވުމުގެ ސަބަބުން ދިވެހިރާއްޖޭގެ ޑިޕްލޮމެޓިކް އަދި އޮފިޝަލް ޕާސްޕޯޓް ބޭނުންކުރައްވާ ފަރާތްތަކަށް ވިސާ އާއި ނުލައި އަޒަރުބައިޖާން އެތެރެވުމާއި، ޓްރާންސިޓް ވުން އަދި 90 ދުވަހުގެ މުއްދަތަކަށް އެގައުމުގައި ހުރުމުގެ ހުއްދަ ލިބިގެންދާނެ އެވެ. މި އެއްބަސްވުމަކީ ހުރިހާ ދިވެހިރައްޔިތުންނަށް ވިސާއަކާ ނުލައި ދަތުރުކުރެވޭނެ ގޮތް މަގުފަހިކޮށްދިނުމަށްޓަކައި ކުރެވޭ މަސައްކަތަށް އެޅުނު މުހިއްމު ފިޔަވަޅެއް ކަމަށާ އެގޮތުން މިކަމާގުޅޭ މަޝްވަރާތައް ކުރިއަށް ގެންދިއުމަށް ވެސް އެއްބަސްވެވުނު ކަމަށެވެ.

ދެން، ސޮއިކުރެއްވި "މެމޮރަންޑަމް އޮފް އަންޑަރސްޓޭންޑިން އޮން ކޯޕަރޭޝަން އިން ދަ ފީލްޑް އޮފް ޓުއަރިޒަމް ބިޓްވީން ދަ ގަވަރންމެންޓް އޮފް ދަ މޯލްޑިވްސް އެންޑް ދަ ގަވަރންމެންޓް އޮފް އަޒެރްބައިޖާން" އަކީ އިގްތިސާދީ، ސަގާފީ އަދި އިޖްތިމާއީ ގޮތުން ދެ ޤަގަމަށްވެސް ފައިދާވާނޭ ގޮތަށް ފަތުރުވެރިކަން ކުރިއެރުވުމަށް ދެގައުމުގެ ދެމެދުގައި ވެވުނު އެއްބަސްވުމެއް ކަމަށް ފޮރިން މިނިސްޓްރީން ބުންޏެވެ.