އެމްއެމްއޭ އަށް ސިޓީ ފޮނުވި ލިސްޓުގައި ބޭރުގެ ރިސޯޓް ވެރިން ނެތް !

ބޭންކިން ނިޒާމަށް ޑޮލަރު މާރުކުރަން ޖެހޭ ބަދަލު ގެނެސް ނެރުނު ގަވައިދާ ގުޅިގެން މަރުކަޒީ ބޭންކް (އެމްއެމްއޭ) އަށް ސިޓީ ފޮނުވި ކުންފުނިތަކުގެ ތެރޭގައި ބޭރުގެ އެއްވެސް ކުންފުންޏެއް ނުހިމެނެ އެވެ. 

"ދަ މިރާ" އަށް އެނގިފައިވާ ގޮތުގައި ރާއްޖޭގެ ރިސޯޓް ހިންގާ އަދި ޓޫރިޒަމްގެ ބާނީންގެ ގޮތުގައި ތިއްބެވި ޗަމްޕާ ބްރަދާސް އާއި ޔުނިވާސަލްގެ ކުންފުނިން ހިންގާ ރިސޯޓްތައް ވަކިވަކިން ވަނީ ބޭންކިން ނިޒާމަށް ޑޮލަރު މާރު ކުރަން އެމްއެމްއޭއިން ނެރުނު ގަވައިދާ ގުޅިގެން ވަނީ ޝަކުވާގެ ސިޓީތަކެއް ފޮނުވާފަ އެވެ. 

ދިވެހި މި ކުންފުނިތަކުން މި ބަދަލާ ގުޅިގެން ސިޓީ ފޮނުވި ނަމަވެސް ރާއްޖޭގެ ޓޫރިޒަމްގެ ބޮޑުބައި ކޮންޓްރޯލް ކުރާ ބޭރުގެ ރިސޯޓް އޮޕަރޭޓަރުން މިކަމާ ގުޅިގެން އެމްއެމްއޭ އަށް ސިޓީ ފޮނުވާފައި ނެތްކަން "މިރާ" އަށް ވަނީ އެނގިފަ އެވެ. 

ރިސޯޓުތަކާއި ގެސްޓުހައުސްތަކަށް ޑޮލަރުން ލިބޭ އާމްދަނީން މިންވަރެއް މާރުކުރަންޖެހޭ ގޮތަށް އެމްއެމްއޭ އިން ގަވާއިދާ ގުޅިގެން ރިސޯޓް ހިންގާ ބައެއް ވިޔަފާރިވެރިން އެމްއެމްއޭ އަށް ފޮނުވި ސިޓީތަކުގައި މައިގަނޑު ގޮތުގައި ބުނެފައިވަނީ ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރު ކުރަން ޖެހޭ ގޮތަށް އޮތުމެވެ. އެ ވިޔަފާރިތަކުން ބުނަނީ އެއީ ވިޔަފާރިތައް ހިނގާ ގޮތުން ކުރަން ދަތި ކަމަށްވާނެ އެވެ. 

އެމްއެމްއޭ އަށް ސިޓީ ފޮނުވިނަމަވެސް މިހާތަނަށް 173 ރިސޯޓަކުން ވަނީ މަނީ އެކްސްޗޭންޖުގެ އާ ގަވައިދުގެ ދަށުން އެމްއެމްއޭގައި ރަޖިސްޓްރީކޮށްފަ އެވެ. ރާއްޖޭގައި މިވަގުތު ހިންގަނީ 174 ރިސޯޓެކެވެ. މި ރިސޯޓްތަކުގެ އިތުރުން އަލަށް ހުޅުވަން ތައްޔާރުވާ 12 ވަރަކަށް ތަންވެސް ވަނީ ރަޖިސްޓްރީކޮށްފަ އެވެ.