މީޑިއާގެ ބިލާ ގުޅިގެން އެމްޑީޕީން އެޑިޓަރުންނާ ބައްދަލުކޮށްފި، ބިލް ގެންދަން ގޮވާލައިފި

ރައްޔިތުންގެ މަޖިލީހަށް ހުށަހަޅައިފައިވާ، މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލާ ގުޅިގެން އިދިކޮޅު މައި ޕާޓީ އެމްޑީޕީން ކަންބޮޑުވުން ފާޅުކޮށްފި އެވެ.

އެމްޑީޕީން މިއަދު ވަނީ މި ބިލާ ގުޅޭ ގޮތުން، މީޑިއާތައް ތަމްސީލުކުރާ ފަރާތްތަކާ ބައްދަލުކޮށްފަ އެވެ. އެމްޑީޕީން ބުނީ އެ ބައްދަލްވުމުގައި ބިލާމެދު ނޫސްވެރިންގެ ހުރި ބޮޑެތި ގިނަ ކަންބޮޑުވުންތަކެއް ހިއްސާކޮށްފައިވާ ކަމަށެވެ.

ނޫސްވެރިންގެ ފަރާތުން ހިއްސާކުރި ކަންކަމުގެ ތެރޭގައި، އެންމެ ބޮޑު އެއް ކަންބޮޑުވުމަކީ، މީޑިއާތަކުގެ ރެގިއުލޭޓަރީ އިދާރާއެއްގެ ގޮތުގައި، މީޑިއާގެ ވޯޓާއެކު އިންތިހާބުވެގެން އެކުލަވައިލައިފައިވާ މިނިވަން މީޑިއާ ކައުންސިލް އުވައިލާ ސަރުކާރުގެ ކޮންޓްރޯލް އޮންނަ ގޮތަށް އެކުލަވައިލާ މީޑިއާ ކޮމިޝަނަކަށް، މީޑިއާތައް ރެގިއުލޭޓްކުރުމުގެ ބާރު ދޭ ގޮތަށް އޮތް އޮތުން ކަމަށެވެ.

ބިލުގައި އޮތް ގޮތުންނަމަ، މި ކޮމިޝަނުގައި ހިމެނޭ ހަތް މެންބަރުންގެ ތެރެއިން ހަތަރު މެމްބަރުންނަކީ ސީދާ ރައީސުލްޖުމްހޫރިއްޔާ އައްޔަނުކުރާ މެންބަރުންނެވެ. މީގެ އިތުރުން، ކޮމިޝަންގެ ހިންގުމުގެ އެންމެ އިސް ފަރާތްތައް ކަމުގައިވާ ކޮމިޝަންގެ ރައީސާއި ނާއިބު ރައީސަކު ކަނޑައެޅުމުގެ ބާރުވެސް ދީފައި ވަނީ ރައީސުލްޖުމްހޫރިއްޔާއަށެވެ. ނޫސްވެރިކަމުގެ މިނިވަންކަން ކުރިއެރުވުމަކީ، މި ބިލުގެ އިސް އެއް މަގްސަދު ކަމަށް ބަޔާންކޮށްފައިވީނަމަވެސް ބިލުގެ ހުރިހާ މާއްދާތަކެއް ފަރުމާކޮށްފައިވަނީ ނޫސްވެރިންގެ މަސައްކަތުގައި އެފަރާތްތަކަށް އޮންނަ އެންމެހައި މިނިވަންކަމެއް ހަނިވެގެންދާ ގޮތަށް އެމްޑީޕީން ބުންޏެވެ.

ނޫސްވެރިން އަމަލުކުރަންޖެހޭ ސުލޫކީ މިންގަނޑާ ގުޅޭ ގޮތުން ބިލުގައި ހިމަނައިފައި ހުރި ކަންކަމުގެ ގޮތުގައި މީހެއްގެ ހުރުމަތާއި އިއްޒަތާއި ގަދަރަށް އުނިކަން އަންނަ ބަސްތައް ޝާއިއު ނުކުރުމާއި ވަކި ފަރާތަކަށް ބުރަވުމެއްނެތި ހަބަރު ގެނެސްދޭން ޖެހޭނެ ކަމަށް ބަޔާންކޮށްފައި ހުރި މާއްދާތައް ސިފަކުރެވެނީ ސަރުކާރުން ކުރާ ނޭދެވޭ ކަންކަމާއި ސަރުކާރަށް ފާޑުކިޔުން އަމާޒުވާ ގޮތަށް ގެނެސްދޭ އެއްވެސް ހަބަރެއް ފެތުރުނަނުދިނުމުގެ މަގްސަދުގައި ހިމަނައިފައިވާ މާއްދާތަކެއްގެ ގޮތުގައި ކަމަށް ވެސް އެމްޑީޕީން ވަނީ ބުނެފަ އެވެ.

މީޑިއާ ކޮމިޝަނުން ނުރުހޭ ކޮންމެ ހިނދެއްގައި މީޑިއާތަކާއި ނޫސްވެރިން ޖޫރިމަނާ ކުރެވޭ ގޮތަށް ބިލުގައި ހިމަނައިފައިވާ މާއްދާތަކަކީ ވެސް ހިޔާލުފާޅުކުރުމުގެ މިނިވަންކަމަށް ކަނޑައެޅިގެން ހުރަސް އަޅައި ނޫސްތަކާއި މީިޑިއާތައް ބަންދުކޮށް، ޑިމޮކްރަސީގެ ހަތަރުވަނަ ބާރުގެ ގޮތުގައި ނޫސްވެރިންނާއި މީޑިއާތަކުން އަދާކުރަމުންދާ ދައުރު މުޅިން ނައްތައިލުމަށް ޓަކައި ހިމަނައިފައިވާ މާއްދާތަކެއްކަން އެ ޕާޓީން ވަނީ ފާހަގަ ކޮށްފަ އެވެ.

އަދި ބުނީ ރައްޔިތުންނާ ގުޅިފައިވާ ކަންކަމުގެ ހަބަރު ހާމަކަމާއި ދެފުށް ފެންނަ އުސޫލަކުން ރައްޔިތުންނާ ހިސާބަށް ފޯރުކޮށްދިނުމުގައްޔާއި ސަރުކާރާއި ރައްޔިތުންގެ މަންދޫބުން ޖަވާބުދާރީކުރުވުމުގައި ވެސް ނޫސްވެރިންނަކީ މުހިންމު ދައުރެއް އަދާކުރާ ބައެއް ކަމަށާ ޑިމޮކްރަސީގެ އުސޫލުތައް ނަގަހައްޓައި ސަރުކާރަކުން މަސައްކަތް ކުރަންވާނީ ވީހާވެސް ފުޅާދާއިރާއެއްގައި ނޫސްވެރިކަމުގެ މަސައްކަތްކުރެވޭނެ ޖާގަ ތަނަވަސްކޮށްދިނުމަށް ކަމަށް ވީނަމަވެސް މި ކަމުގެ ސަބަބުން ނޫސްވެރިކަމުގެ ދާއިރާގައި ރާއްޖެ ހާސިލްކޮށްފައިވާ ކުރިއެރުމާއި ކާމިޔާބީތައް އެތަށް ގުނައަކުން ފަހަތަށް ސޮއްސައިިލާނެކަމުގެ ކަންބޮޑުވުންވެސް ނޫސްވެރިންގެ މެދުގައި އޮތްކަން ފާހަގަ ކުރެވުނު ކަމަށެވެ.

"މިއީ ނޫސްވެރިކަމުގެ މިނިވަންކަން އިންތިހާ ދަރަޖައަށް ހަނިވެ، ނޫސްވެރިންގެ މަސައްކަތްތަކުގައި ގިނަ ގުނަ ގޮންޖެހުންތަކާ ކުރިމަތިލާން ޖެހޭނެ ކަމެެއްކަން ނޫސްވެރިންގެ ވާހަކަތަކުން ފާހަގަވެފައިވެއެވެ. އެހެންކަމާ އެކު، މި ބިލު އަނބުރައި ގެންދިއުމަށް މި ޕާޓީން ސަރުކާރަށް ގޮވައިލަންމެވެ،

އެމްޑީޕީން ވަނީ ނޫސްވެރިންގެ ހުރި ކަންބޮޑުވުންތަކަށް ހައްލު ހޯދުމަށް ޓަކައި ޒިންމާދާރު އިދިކޮޅު ޕާޓީގެ ހައިސިއްޔަތުން، ކުރަންޖެހޭ ހުރިހާ މަސައްކަތެއް ކުރުމަށް އެ ޕާޓީން ނިންމައިފައިވާ ކަމަށް ބުނެފަ އެވެ.