ރައީސްގެ އެޑްވައިޒަރުގެ ކުންފުނިން ވެސް މާރުކުރެވެން ނެތްކަން އަންގައިފި

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ޓޫރިޒަމް އެޑްވައިޒަރުގެ މަގާމުގައި ހުންނެވި މުހައްމަދު ހަލީލުގެ ޕަލްސް ކުންފުންޏަށްވެސް، އެ ކުންފުނީގެ އާމްދަނީން ޓޫރިސްޓެއްގެ ބޮލަކަށް 500 ޑޮލަރު މާރުކުރެވެން ނެތްކަން މަރުކަޒީ ބޭންކު އެމްއެމްއޭއަށް އަންގައިފި އެވެ. 

ރާއްޖޭގައި މަތީ ފަންތީގެ ހަތަރު ރިސޯޓު ހިންގާ ޕަލްސްއިން އެމްއެމްއޭއަށް ފޮނުވި ސިޓީގައި ސޮއިކުރައްވާފައިވަނީ އެ ކުންފުނީގެ މެނޭޖިން ޑިރެކްޓަރުގެ މަގާމުގައި ހުންނަވާ ހަލީލެވެ. އެ ކުންފުނިން ހިންގާ ހަތަރު ރިސޯޓަކީ ނޮޓިލަސް މޯލްޑިވްސްއާއި، ކަނޑިންމަ މޯލްޑިވްސްއާއި ނޯވާ މޯލްޑިވްސް އަދި އެވެލަން މޯލްޑިވްސް އެވެ. 

ހަލީލު ފޮނުއްވި ސިޓީގައި އޭނާގެ ކުންފުނީގެ ރިސޯޓުތަކަށް ޑޮލަރު މާރުކުރަން ދަތިވާ ސަބަބުތަކުގެ ގޮތުގައި ފާހަގަކުރައްވާފައިވަނީ އަންނަނިވި ކަންކަމެވެ. 

އޭނާ ވިދާޅުވެފައިވަނީ އެ ސަބަބުތައް އެހެން ހުރުމުން އެމްއެމްއޭގެ ގަވާއިދުގެ ދަށުން ޑޮލަރު މާރުކުރެވެން ނެތް ކަމަށެވެ. އަދި އެކަމަށް ރިއާޔަތްކޮށް އެމްއެމްއޭއިން އެ ގަވާއިދާމެދު ދެވަނަ ވިސްނުމަކަށް ދާނެ ކަމުގައި އުންމީދުކުރައްވާ ކަމަށްވެސް އޭނާ ވިދާޅުވެފައިވެ އެވެ. 

ޕަލްސް ކުންފުނީގެ އިތުރަށް ޔުނިވާސަލް އަދި ޗަމްޕާ ބްރަދާސް ހިމެނޭހެން 50 ރިސޯޓަކުން ގަވާއިދާ އެއްގޮތަށް ޑޮލަރު މާރުނުކުރެވޭނެކަން އެމްއެމްއޭއަށް އަންގާފައިވެ އެވެ. 

މާރުކުރަންޖެހެނީ ރިސޯޓަށް ޑޮލަރުން ލިބޭ ޖުމްލަ އާމްދަނީގެ ތެރެއިން ކޮންމެ ޓޫރިސްޓެއްގެ ބޮލަކަށް 500 ޑޮލަރެވެ. މިސާލަކަށް އެވެރެޖު ޑެއިލީ ރޭޓު ނުވަތަ ކޮޓަރި ވިއްކާ އެވެރެޖު އަގު 200 ޑޮލަރުގައި ހުންނަ ރިސޯޓެއްގެ 100 އެނދު 30 ދުވަހު އެއްކޮށް ވިކިފައި އޮތްނަމަ ހަ ލައްކަ ޑޮލަރު އެ މަހަކު ލިބޭނެ އެވެ. އެ ރިސޯޓުގައި އެ 30 ދުވަހު ތިބީ 800 ޓޫރިސްޓުން ކަމަށްވާނަމަ ބޮލަކަށް 500 ޑޮލަރުގެ ރޭޓުން މާރުކުރަންޖެހޭނީ 400،000 ޑޮލަރެވެ. އެހެންކަމުން ޑެއިލީ ރޭޓަކީ 200 ޑޮލަރަށްވުމަކުން މާރުކުރަންޖެހޭ އަދަދު އާމްދަނީއަށްވުރެ އިތުރުވުމުގެ މައްސަލައެއް ކުރިމަތިނުވާނެ އެވެ.

މިދެންނެވި ހިސާބުކުރުމުގައި ރިސޯޓުތަކަށް ކޮޓަރި ވިއްކައިގެން ލިބޭ އާމްދަނީގެ ބޭރުން އެކްސްކާޝަންތަކާއި ބާއާއި މުނިފޫހިފިލުވުމުގެ ކަންކަމާއި އެނޫން ހިދުމަތްތަކުން ލިބޭ އާމްދަނީ ހިމަނާފައިނުވާނެ އެވެ. ޓޫރިޒަމް ދާއިރާގެ ތަޖުރިބާކާރުން ވިދާޅުވާ ގޮތުގައި ރިސޯޓަކަށް ލިބޭ އާމްދަނީގެ %50 އަށްވުރެ ބޮޑު ނިސްބަތެއް ލިބެނީ ކޮޓަރީގެ އަގުގެ ބޭރުން އެހެނިހެން ކަންކަމުންނެވެ.

ދެވަނަ ކަމަކަށް ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރަން ކަނޑައަޅާފައިވަނީ ރިސޯޓުތަކުގައި ފަތުރުވެރިން ހޭދަކުރާ ފައިސާގެ އަދަދުގެ އެވެރެޖުތަކަށް ރަނގަޅަށް ބެލިގެންނެވެ. 2022 ވަނަ އަހަރު ޓޫރިޒަމް މިނިސްޓްރީން ހެދި ސާވޭއަކުން ދައްކާ ގޮތުގައި ރިސޯޓުތަކަށް އަންނަ ފަތުރުވެރިންގެ %31 މީހުން 1،000 ޑޮލަރާއި 5،000 ޑޮލަރާ ދެމެދުގެ އަދަދެއް ހޭދަކުރެ އެވެ. އަދި ރިސޯޓުތަކުގައި ތިބޭ ފަތުރުވެރިންގެ %47 މީހުން 5،000 އާއި 10،000 އާ ދެމެދުގެ އަދަދަކަށް ޑޮލަރު ހޭދަކުރެ އެވެ. އަދި 14 އިންސައްތަ މީހުން 10،000 ޑޮލަރާއި 20،000 ޑޮލަރާ ދެމެދުގެ އަދަދެއް ހޭދަކުރެ އެވެ.

އެހެންކަމުން ރިސޯޓެއްގައި ޗުއްޓީ ހޭދަކުރާ ޓޫރިސްޓުންގެ ތެރެއިން މަދު ނިސްބަތެއްގެ ބަޔަކު ދެ ރޭ ހޭދަކުރުމަކީ ޑޮލަރުގެ އާމްދަނީ މާރުކުރަންޖެހޭ ޖުމްލަ އަދަދަށްވުރެ އިތުރުވާންޖެހޭ ސަބަބެއް ކަމުގައި ގަބޫލުކުރެވޭނެ ގޮތެއް ނެތެވެ.