ޝަމީމަށް ހަމަލާ ދިން ކަމަށް ދައުވާ ލިބޭ މީހުން އިންކާރު ކޮށްފި

ކުރީގެ ޕްރޮސެކިއުޓަރު ޖެނެރަލް ހުސައިން ޝަމީމަށް ހަމަލާ ދިން މައްސަލައިގައި ދައުވާކޮށްފައިވާ ހަތް މީހުން ދައުވާއަށް އިންކާރު ކޮށްފި އެވެ.

މި މައްސަލައިގައި ދައުވާ ކޮށްފައި ވަނީ ހަތް މީހެއްގެ މައްޗަށެވެ. އެއީ، ރ. އަލިފުށި، ރިވެލި، މިދުހަތު އާދަމާއި ލ. ގަން، ތުނޑި، ޖަވާހިރުވިލާ، މުހައްމަދު ޖަޒްލާނާއި ދަފްތަރު ނަންބަރު ދރ 2247، އަހުމަދު މައިސާން ހާޝިމާއި ލ. މާމެންދޫ، މުރިނގު، ރަޖުވާން ލަތީފާއި ތ. ގާދިއްފުށި، މުސްތަރީގެ، ޝަމާލް ހުސައިންގެ އިތުރުން ތ. ދިޔަމިގިލި، ރުވާ، އަބާން އަބްދުލްހަންނާނާއި އދ. މާމިގިލި، ކެމީހިޔާ، ޒަޔާން ނަސީރުގެ މައްޗަށެވެ.

މި ހަތް މީހުންގެ މައްޗަށް ވެސް އުފުލާފައި ވަނީ  ތޫނު ހަރިޔާރެއް ބޭނުން ކޮށްގެން ގަސްދުގައި މީހަކު މަރާލަން އުޅުމުގެ ކުށުގެ ދައުވާ އެވެ.

ޖެނުވަރީ 31، 2024 ވަނަ ދުވަހު މި މީހުން ޝަމީމަށް ހަމަލާ ދޭން ރާވައި، މާލޭގެ ނޫރު މިސްކިތް ކައިރީ މަގުމަތީން ޝަމީމް ހުއްޓުވައި، ބޮލަށް ހަމަލާ ދޭން މަސައްކަތް ކޮށް، ޝަމީމާމެދު މާރާރީ ހިންގައި އަދި އަތުގެ މުލައްދަނޑި ވަނީ ޒަހަމްކޮށްލާފަ އެވެ.

ދައުލަތުން ބުނީ ޝަމީމްގެ ބޮލަށް ހަމަލާދޭން މަސައްކަތް ކޮށްފައި ވަނީ މި ހަތް މީހުންގެ ތެރެއިން މިދުހަތު ކަމަށެވެ. އަދި، ސައިކަލުގައި މިދުހަތު ގޮވައިގެން އެތަނަށް ދިޔައީ ޖަޒްލާން ކަމަށާއި، ހަމަލާއަށްފަހު އޭނާ ގޮވައިގެން އެތަނުން ދިޔައީ ވެސް ޖަޒުލާން ކަމަށެވެ. ހަމަލާ ދޭން ބޭނުން ކުރި ސައިކަލު ހޯދައިދިނީ ދައުވާކޮށްފައިވާ މައިސާން ކަމަށް ވެސް އެ ދައުލަތުން ބުންޏެވެ.

މި މައްސަލައިގައި ދައުވާ ކޮށްފައި އަނެއް ހަތަރު މީހުންނަކީ ހަމަލާ ދިން ވަގުތު އެ ސަރަހައްދުގައި ކާރެއްގައި މަޑުކޮށްގެން ތިބި މީހުންނެވެ. ހަމަލާއަށްފަހު ސައިކަލުގައި ތިބި ދެ މީހުންނާއެކު ހަތަރު މީހުން ކާރުގައި އެ ސަރަހައްދު ދޫކޮށް ގޮސްފައިވާ ކަމަށް ދައުލަތުން ބުންޏެވެ.

ދައުލަތުން ބުނެފައި ވަނީ މިއީ މާލޭގައި ކުށް ކުރާ ގުރޫޕަކުން ދުރާލާ ރާވައިގެން "ކޮމަން އިންޓެންޝަން" އެއްގައި ދީފައިވާ ހަމަލާއެއް ކަމަށެވެ. އެކަން ސާބިތު ކުރަން ދައުލަތުން ވަނީ ހެކި ހުށަހަޅާފަ އެވެ. ނަމަވެސް ދައުލަތުން ބުނެފައި ވަނީ ހާދިސާ ހިނގި މަންޒަރު ދުށް މީހަކު ނެތް ކަމަށެވެ.

ދައުލަތުން ދައުވާ އިއްވުމުން ދައުވާ ލިބޭ ހަތް މީހުން ވެސް ވަނީ އިންކާރުކޮށްފަ އެވެ. ދައުވާއަށް އިންކާރު ކުރުމުން، ގާޒީ އިބްރާހިމް އިހުސާން ވަނީ މިމަހުގެ 24 ވަނަ ދުވަހުގެ ނިޔަލަށް ދިފާއީ ހެކި ހުށަހަޅަން ފުރުސަތު ދެއްވާފަ އެވެ.

މި މައްސަލައިގައި ދައުވާ ކޮށްފައިވާ މީހުން ތިބީ ޝަރީއަތް ނިމެންދެން ބަންދުކޮށްފަ އެވެ. މި މައްސަލައިގެ އަޑުއެހުމެއް ދެން އޮންނާނީ މިމަހުގެ ފަހުކޮޅު އެވެ.