ނިމުނު އަހަރު 434 ކުށްވެރިން ދޫކުރި، 330 މީހުންނަކީ ޑްރަގްގެ ބޮޑުން

ފާއިތުވި އަހަރު އެމްޑީޕީ ސަރުކާރުން 434 ކުށްވެރިން ދޫކޮށްފައިވާކަމަށާއި ދޫކުރި ކުށްވެރިންގެ ތެރެއިން އެންމެ ގިނައީ ޑްރަގުގެ މައްސަލަތަކުގައި ޖަލުތަކުގައި ތިބި ގައިދީންކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ. 

ޕީއެސްއެމްއިން ގެނެސްދޭ ""ހަފުތާ 52" ޕްރޮގުރާމުގައި ވާހަކަދައްކަވަމުން އިހުސާން ވިދާޅުވީ އެމްޑީޕީ ސަރުކާރުން ވަރަށް ބޮޑެތި އިހުމާލުތައް ވެފައިވާ ކަމަށެވެ. އަދި އެކަންކަމުގެ ސަބަބުން މުޖުތަމައަށް އެތައް ނުރައްކަލެއް ކުރިމަތިވަމުންދާ ކަމަށްވެސް އިހުސާން ވިދާޅުވި އެވެ. 

"މިދިޔަ ސަރުކާރު ނިންމައި އަޅުގަނޑުމެންނާ ވެރިކަން ހަވާލުވިއިރު ބައެއް ދާއިރާތަކުން ވަރަށް ބޮޑެތި އިހުމާލުތައް ވެވިފައި އެބަހުރި.،" އިހުސާން ވިދާޅުވި އެވެ. 

އިހުސާން އިތުރަށް ވިދާޅުވީ އެ އިހުމާލުތަކުގެ ތެރެއިން އެއް ކަމަކީ ގިނަ އަދަދެއްގެ ކުށްވެރިން މުޖުތަމައަށް ދޫކޮށްލުން ކަމަށެވެ. އެގޮތުން އެކި ނަންނަމުގައި އެކި ގޮތްގޮތަށް ހެމައެކަނި 2023 ވަނަ އަހަރު 434 ކުށްވެރިން ދޫކޮށްލާފައިވާކަމަށް އިހުސާން ވިދާޅުވި އެވެ. 

ދޫކޮށްލި މީހުންގެ ތެރެއިން އެންމެ ގިނަ މީހުންނަކީ މަސްތުވާތަކެތީގެ މައްސަލަތައް ސާބިތުވެ ޖަލުގައި ތިބި މީހުންކަން އިހުސާން ފާހަގަކުރެއްވި އެވެ. އަދި ކުޑަކުދިންނާމެދު ޖިންސީ އަމަލުތައް ހިންގުމުގެ މައްސަލަތަކުގައި ހައްޔަރުކުރި މީހުންވެސް ދޫކޮށްލާފައިވާކަން އިހުސާން ފާހަގަކުރެއްވި އެވެ. 

އަދި އެމީހުން ޖަލަށް ލެވިފައިވަނީ އެތައް މަސައްކަތެއް ފުލުހުން ކޮށް ބޮޑެތި ތަހުގީގުތައް ހިންގުމަށްފަހު ދައުލަތުން ދައުވާކޮށް އެ ދައުވާތައް ސާބިތުކުރުމަށްވެސް އެތައް ވަގުތަކާއި ވަސީލަތެއް ހޭދަކޮށްގެން ކުށް ސާބިތުވެގެންކަމަށް އިހުސާން ވިދާޅުވި އެވެ. 

"މީގެ ތެރެއިނ 330 މީހުންނަކީ ޑްރަގް މައްސަލަތަކުގައި ޖަލުތަކުގައި ތިބި މީހުން ދޫކޮށްލާފައި އެތިބީ. 26 މީހުންނަކީ ވައެލެންޓް ކްރައިމްސްގައި ތިބި މީހުން ދޫކޮށްލާފައި ތިބީ. 19 މީހުންނަކީ ކުޑަކުދިންނަށް ޖިންސީ ގޯނާކޮށްގެން ޖަލު ހައްޔަރުގައި ތިބި މީހުން،" އިހުސާން ވިދާޅުވި އެވެ. 

"މިއިން ކޮންމެ މީހަކީ ފުލުހުން އެތައް މަސައްކަތެއްކޮށްގެން، ޕްރޮސެކިއުޓް ކޮށްގެން އެތައް ދުވަހަކަށް ކްރިމިނަލް ކޯޓު ފަދަ ކޯޓުތަކުގައި ވަކާލާތުކޮށްގެން ހުކުމްކޮށްފައިތިބި މީހުން. ދޫކޮށްލަން ފަޅި ސިކުންތެއް،"

އިހުސާން ފާހަގަކުރެއްވި ގޮތުގައި މިފަދަ ބޮޑެތި ކުށްވެރިން މުޖުތަމައު ތެރެއަށް ދޫކޮށްލުމުގެ ސަބަބުން މުޖުތަމައުގެ އަމާންކަމާއި ސުލްހަވެރިކަމަށް ބުރޫއަރަ އެވެ. އަދި އެކަމުގެ ސަބަބުން އަނެއްކާވެސް އެމީހުން ކުށުގެ ވެެށިން ނެރެން ފުލުހުން އެތައް މަސައްކަތެއް ކުރަންޖެހެ އެވެ. 

އަދި ކުރިން ހައްޔަރުގައި ތިބި މީހުން މިނިވަންކޮށް ދޫކޮށްލުމުގެ ސަބަބުން ޑްރަގް މައްސަލައާއި ގޭންގު މައްސަލަ ހައްލުކުރުމަށް އިހުނަށްވުރެ ގިނަ އިތުރު މަސައްކަތްތައް ކުރަންޖެހިފައިވާކަމަށް އިހުސާން ވިދާޅުވި އެވެ.