ލޯބިވެރިޔާ އަށް ބިރުދައްކައި ބްލެކްމެއިލް ކުރަން އުޅުނު ފުލުހަކު ހައްޔަރުކޮށްފި

ލޯބިވެރިޔާ އަށް ބިރު ދައްކައި އޭނާގެ އޮރިޔާން މަންޒަރު ދައްކުވައިދޭ ފޮޓޯ އާއި ވީޑިއޯ އާންމު ކުރާނެ ކަމަށް ބުނެ ބިރު ދައްކައި އިންޒާރުދިން ފުލުހަކު ހައްޔަރު ކޮށްފި އެވެ.

މި މައްސަލައިގައި ހައްޔަރުކޮށްފައިވަނީ އއ. މަތިވެރި ޕޮލިސްޓޭޝަނުގައި މަސައްކަތް ކުރަމުން އަންނަ އެރަށު، ފަޒާ، ޒައިދާން މުހައްމަދު 19އ، އެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ ޒައިދާން، އޭނާގެ ލޯބިވެރިޔާ އަށް ބިރުދައްކައި، އޭނާގެ އޮރިޔާން ފެންނަ މަންޒަރު ދައްކުވައިދޭ ފޮޓޯ އާއި ވީޑިއޯ ސޯޝަލް މީޑިއާގައި ލީކް ކޮށްލާނެ ކަމަށްބުނެ އިންޒާރުދީ، ބްލެކްމެއިލް ކޮށްފައިވާ މައްސަލައެއް ހުށަހަޅާފައިވާ ކަމަށެވެ.

އެހެންވެ ކޯޓު އަމުރެއްގެ ދަށުން މިމަހުގެ 13 ވަނަ ދުވަހު ޒައިދާން ހައްޔަރުކޮށްފައިވާ ކަމަށް ފުލުހުން ވަނީ ބުނެފައެވެ.
އޭނާގެ ބަންދާމެދު ގޮތެއް ނިންމުމަށް މަތިވެރި ކޯޓަށް ހާޒިރުކުރުމުން، ތިން ދުވަހަށް ބަންދުކުރުމަށް ވަނީ އަމުރުކޮށްފައެވެ.

މި މައްސަލަ ފުލުހުން ދަނީ ތަހުގީގު ކުރަމުންނެވެ.