އެކިބާވަތުގެ ޑުރަގާއެކު 65 އަހަރުގެ މީހަކު ހައްޔަރުކޮށްފި

އެކި ބާވަތުގެ މަސްތުވާތަކެއްޗާއެކު 65 އަހަރުގެ މީހަކު ހައްޔަރުކޮށްފިއެވެ.

މަސްތުވާތަކެތި ބޭނުންކޮށް ވިޔަފާރިކުރި ކަމުގެ މި މައްސަލައިގައި ހައްޔަރުކޮށްފައިވަނީ ރ. އިންނަމާދޫ، ފެމޯރާ، މުހައްމަދު ސަލީމް، 65އ، އެވެ.

އޭނާ ހައްޔަރުކޮށް ބަންދާމެދު ގޮތެއް ނިންމުމަށް ކުރިމިނަލް ކޯޓަށް ހާޒިރުކުރުމުން ބަންދަށް ވަނީ 15 ދުވަސް ވަނީ ޖަހާފައެވެ.
ކުރިމިނަލް ކޯޓުން ނެރެފައިވާ ބަންދު އަމުރުގައިވާގޮތުން ކޮންމެވެސް މިންވަރަކަށް ހެކި ހވަނީ ހުށަހަޅާފައެވެ. އެގޮތުން ފުލުހުންގެ ބަޔާނުގައި، ސަލީމްގެ ޖީބުންނާއި އޭނާ ދިރިއުޅޭ އެޕާޓުމަންޓުން މަސްތުވާތަކެތި ކަމަށް ޝައްކު ކުރެވޭ އެއްޗިހިތަކެއް ފެނިފައިވެއެވެ.

އޭގެ އިތުރުން ފެނުނު މަސްތުވާތަކެތި މިހާތަނަށް ބެލި ބެލުމުން ވަގުތީ ބަރުދަނުގައި ދެ ގްރާމް މެތް އަދި އެއް ގްރާމް ހެރޮއިން ހުރި ކަމަށް ބަޔާންކޮށްފައިވާ ކަމަށްވެސް އަމުރުގައިވެއެވެ. ގާނޫނީ ގޮތުން ބަލާނަމަ މިއީ ގިނަ އަދަދެއްގެ ތަކެތި ކަމަށާއި އެއީ އެކި ބާވަތުގެ މަސްތުވާތަކެތި ކަމަށްވުމުން އޭނާ ބަންދުން ދޫކޮށްލައިފިނަމަ މުޖުތަމައުގެ ސަލާމަތަށ ްނުރައްކާވާނެ ކަމަށް ކޯޓުން ވަނީ ކަނޑައޅާފައެވެ.

އެނގިފައިވާ ގޮތުގައި ސަލީމަކީ މަސްތުވާތަކެތީގެ މައްސަލައެއްގައި މީގެ ކުރިން އުމުރަށް ޖަލަށްލުމަށް ހުކުމް ކޮށްފައިވާ މީހެކެވެ. އަދި އޭނާ އެއް ލައްކަ ރުފިޔާއިން ޖޫރިމަނާވެސް ކުރިއެވެ. އެހެން ނަމަވެސް އޭނާ އަލުން ހައްޔަރުކޮށްފައިވަނީ ޖަލު ބަންދުން ދޫކޮށްލާފައި ހުއްޓައެވެ.

ރައީސް އިބްރާހީމް މުހައްމަދު ސޯލިހުގެ ވެރިކަމުގެ ފަހު ކޮޅުގައި މަސްތުވާތަކެތި ޓްރެފިކުކުރުން ފަދަ ބޮޑެތި ކުށްތަކުގައި ހައްޔަރުކޮށްފައި ތިބި އެތައް ބަޔަކު ރިޔާސީ އިންތިހާބާ ދިމާކޮށް އަދަބު ލުއިކޮށްދިނުމާއި މައާފުކޮށްދިނުމުގެ ގާނޫނުގެ ދަށުން ދޫކޮށްލާފައިވެ އެވެ. މިގޮތަށް ދޫކޮށްލި ގިނަ ބަޔަކު ދޫކުރީ އެމީހުންގެ އަދަބުގެ މުއްދަތު ކުޑަކުރުމަށްފަހު އެވެ. 

އެއިރު ދޫކޮށްލި މީހުންގެ ތެރެއިން ވަރަށް ގިނަ މީހުން ފަހުން އެހެން ކުށްތަކުގައި ހައްޔަރުވެ ބަންދުކުރަމުންދާކަން ފާހަގަަކުރެވިފައިވެ އެވެ.