ތުރުކީން އިސްރާއީލާ އޮތް ހުރިހާ ގުޅުމެއް ކަނޑާލައިފި
ބުދަދުވަހު އުރުދުޣާންވަނީ ތުރުކީން އިސްރާއީލާއެކު ބާއްވަމުން އައި ހުރިހާ ގުޅުމެއް ކަނޑައިލަން ނިންމަވާފައިވާކަން އިއުލާނު ކުރައްވާފަ އެވެ.
ތުރުކީއާއި އިސްރާއީލުގެ މެދުގައި އޮތް ހުރިހާ ގުޅުމެއް ކަނޑައިލަން ނިންމެވިކަން ތުރުކީގެ ރައީސް ރަޖަބް ތައްޔިބް އުރުދުޣާން އިއްޔެ އިއުލާނުކުރައްވައިފި އެވެ.
އުރުދުޣާން މިކަން އިއުލާނުކުރެއްވީ ސައުދީ އަރަބިއްޔާއަށާއި އަޒަރްބައިޖާނަށް ކުރައްވާ ދަތުރުފުޅުގެ ތެރެއިން ފުލައިޓުގައި އިންނަވައިގެން ނޫސްވެރިންނަށް ދެއްވި އިންޓަވިއުއެއްގަ އެވެ.
"އުރުދުޣާނުގެ ލީޑާޝޕުގައި ތުރުކީން އިސްރާއީލާއެކު އެއްވެސް ގުޅުމެއް ކުރިއަށް އޮތް ތަނުގައި ނުބާއްވާނެ. ގުޅުމެއް އިތުރަށް ނުވެސް އުފައްދާނެ،"" އުރުދުޣާން ވިދާޅުވި އެވެ.
އުރުދުޣާން ވިދާޅުވި ގޮތުގައި މިއީ ސަރުކާރު ހިންގާ ކޯލިޝަނުގެ ހުރިހާ ޕާޓީތައް އެއްބަސްވެގެން ނިންމާފައިވާ ނިންމުމެކެވެ. އަދި އެ ނިންމުން ކުރިއަށް އޮތް ތަނުގައިވެސް ކޯލިޝަން ސަރުކާރުން ދަމަހައްޓާނެ ކަމުގެ ޔަގީންކަން އޭނާ ދެއްވި އެވެ.
މޭ މަހުން ފެށިގެން އިސްރާއީލާއެކު ވިޔަފާރިކުރުން ތުރުކީން ހުއްޓައިލި ނަމަވެސް އެ ގައުމާއި އިސްރާއީލާ ދެމެދުގައި ޑިޕްލޮމެޓިކް ގުޅުންތައް އެކި ފެންވަރުގައި ދަމަހައްޓަމުން އައިސްފައިވެ އެވެ.
ފާއިތުވި އަހަރުގައި އިސްރާއީލުގައި ހުންނެވި ތުރުކީ ސަފީރު އަނބުރާ ގައުމަށް ގެންނެވި ނަމަވެސް ތަލްއަވީވުގައި ހުންނަ ތުރުކީގެ ޑިޕްލޮޮމެޓިކް މިޝަންތައް ހިންގަމުން ގެންދިޔަ އެވެ. އަދި އިސްރާއީލުން އަންކާރާގައި ހުންނަ އެ ގައުމުގެ އެމްބަސީ ހުސްކުރި އެވެ.
ޣައްޒާގައި ހިންގަމުންދާ ނަސްލު ނައްތައިލުމުގެ އަމަލުތަކާމެދު އެ ގައުމުގެ ބޮޑުވަޒީރު ބެންޖަމިން ނަތަންޔާހޫ ޖަވާބުދާރީ ކުރުވުމަށް ކުރަންޖެހުނު ކޮންމެ ކަމެއްވެސް ތުރުކީން ކުރާނެ ކަމުގައި އުރުދުޣާން ވިދާޅުވި އެވެ.
އިތުރަށް އެމަނިކުފާނު ވިދާޅުވީ ނޮވެންބަރުގައި ތުރުކީން އިސްނަގައިގެން އދގައި ފެށި އިސްރާއީލަށް ހަތިޔާރު ފޯރުކޮށްދިނުން ހުއްޓުވުމަށް ގޮވައިލާ ހަރަކާތަށް 52 ގައުމަކުން މިހާރު ތާއީދުކޮށްފައިވާ ކަމަށެވެ. އެ ހަރަކާތުގެ ބޭނުމަކީ އިސްރާއީލަށް ހަތިޔާރު ފޯރުކޮށްދިނުން ހުއްޓުވުމެވެ.
އެ ހަރަކާތާ ގުޅިގެން ތުރުކީންވަނީ އދގެ ސަލާމަތީ މަޖިލީހުގެ ރައީސަށާއި އދގެ ސެކްރެޓަރީ ޖެނެރަލަށް ރަސްމީކޮށް ސިޓީއެއް ފޮނުވާފަ އެވެ. އަދި އެ ސިޓީގައި އަރަބި އިސްލާމީ ހުރިހާ ގައުމަކުން ސޮއިކުރުމަށް އުރުދުޣާންވަނީ ރިޔާޟުގައި އޮތް އަރަބި އިސްލާމީ ގައުމަތަކުގެ ސަމިޓުގައި ދައުވަތު ދެއްވާފަ އެވެ.
މިފަދައިން އުރުދުޣާން ވިދާޅުވި ނަމަވެސް އެހެނިހެން ގައުމުތައް މެދުވެރިކޮށް ތުރުކީ ކުންފުނިތަކުން އިސްރާއީލާއެކު ވިޔަފާރިކުރަމުންދާ މައްސަލަ ފެންމަތިވެ، ގިނަ ބަޔަކު ދަނީ އުރުދުޣާނުގެ ސަރުކާރަށް އެ މައްސަލާގައި އެކަށީގެންވާ ފިޔަވަޅުތަކެއް ނޭޅުއްވޭކަމަށް ބުނެ ފާޑުކިޔަމުންނެވެ.
ކޮމެންޓް
Republic of Maldives