ޓޫރިސްޓް ސޭފްޓީ ގަވައިދަށް ތިން އަހަރު | ތަންފީޒު ކުރުން ހުއްޓުވާފަ

ޓޫރިސްޓުންގެ ރައްކާތެރިކަމަށްޓަކައި ހަދަން ޖެހޭ "ޓޫރިސްޓު ސޭފްޓީ ގަވައިދު" ގެޒެޓް ކުރިތާ ތިން އަހަރުވީނަމަވެސް އެ ގަވައިދު ތަންފީޒު ކުރުން ލާޒިމް ނުވާގޮތަށް ހުއްޓުވާފައި އޮތްކަން ހާމަވެއްޖެ އެވެ. 

ރާއްޖެ އަށް ޒިޔާރަތް ކުރާ ޓޫރިސްޓުންނަށް ކަނޑުމަތީގައި ގިނަ ހާދިސާތަކެއް ހިންގައި ފުރާނަ އަށް ނުރައްކާވަމުންދާތީ ރައްޔިތުން މަޖިލީހުގެ ގަވައިދު ކޮމެޓީން ވަނީ ޓޫރިޒަމް މިނިސްޓްރީ މިއަދު މަޖިލީހަށް ހާޒިރުކޮށްފަ އެވެ. ޓޫރިޒަމް މިނިސްޓްރީގެ އިސްވެރިން މަޖިލީހަށް ހާޒިރު ކުރީ ރާއްޖެ އަށް ތަޖުރިބާ ދަތުރެއްގައި އައި ސިންގަޕޫރުގެ ޔުނިވާސިޓީ ކުއްޖެއް މޫދަށް ފައިބައި އުޅެނިކޮށް ޑައިވިން ދޯނީގެ ބުރަ ފަތިން ޖެހި މަރުވި މައްސަލައަކާ ގުޅިގެންނެވެ.

މަޖިލީހުގައި މިއަދު އޮތް ކޮމެޓީ ބައްދަލުވުމުގައި ޓޫރިޒަމް މިނިސްޓްރީގެ ސްޓޭޓް މިނިސްޓަރު އަހުމަދު ނާޒިމް މުހައްމަދު ވިދާޅުވީ ޓޫރިޒަމް ގާނޫނުން ގަވައިދުތައް ތަންފީޒު ކުރަން ޖެހެނީ އެ މިނިސްޓްރީއަށް ކަމުގައިވީނަމަވެސް ޓޫރިސްޓުންގެ ސަލާމަތާއި ރައްކާތެރިކަމަށްޓަކައި ހަދާފައިވާ ގަވައިދު 2020 ގައި ގެޒެޓު ކުރިނަމަވެސް އެއަށް އަމަލު ކުރުން 31، އޮގަސްޓް 2021 ގައި މިނިސްޓްރީން ހުއްޓުވާފައިވާ ކަމަށެވެ.

މީގެ ސަބަބެއްގެ ގޮތުގައި ޓޫރިޒަމް މިނިސްޓްރީން ކޮމެޓީގައި މައުލޫމާތު ދެއްވި ނާޒިމް ވިދާޅުވީ ގަވައިދު ގެޒެޓުކޮށް އެ ގަވައިދަށް އަމަލު ކުރުން މުއްދަތެއް ނެތް ގޮތުގައި ދަންމާލަން މިނިސްޓްރީން ޓޫރިޒަމް ހިދުމަތްދޭ ފަރާތްތަކަށް އަންގާފައިވުމެވެ. އަދި މި މައްސަލަ މި ސަރުކާރު އައިފަހުން ފާހަގަވުމާއެކު އެ ގަވައިދު ތަންފީޒު ކުރުމުގެ ކަންކަމުގައި އިންޑަސްޓްރީއާއެކު ބައްދަލުވުންތަކެއް ބާއްވައި ގެންނަން ޖެހޭ ބަދަލުތައް ދެނެގަނެވިފައިވާ ކަމަށް އޭނާ ވިދާޅުވި އެވެ.  

ގަވައިދަށް ވީ ގޮތް - ޓޫރިސްޓުންނަށް ހިތާމަވެރި ގިނަ ހާދިސާތަކެއް ހިންގަމުންދާތީ ކުރީގެ ޓޫރިޒަމް މިނިސްޓަރު އަލީ ވަހީދުގެ މިނިސްޓަރުކަމުގައި ޓޫރިޒަމާ ގުޅޭ ތިން ގަވައިދެއް އޭޖީ އޮފީހަށް ފޮނުވި އެވެ. އެ ދުވަސްވަރު ހެދި ގަވައިދުތަކަކީ ޓޫރިސްޓް ސޭފްޓީ ގަވައިދު، ހޮޓެލް ގަވައިދާއި ގެސްޓްހައުސް ގަވައިދު އަދި ފިއުލް ގަވައިދެވެ. ނަމަވެސް މިނިސްޓަރުކަމުން އަލީ ވަހީދު ވަކި ކުރިފަހުން ދެން އައި ޓޫރިޒަމް މިނިސްޓަރު ޑރ. އަބްދުﷲ މައުސޫމްގެ ޒައާމަތުގައި މީގެ އެއްވެސް ގަވައިދެއް ހެދިފައެއް ނެތެވެ.