ބަޖެޓް ބަހުސް މިރޭ 11 ޖަހަންދެން ކުރިއަށް ގެންދަނީ

އަންނަ އަހަރަށް ލަފާކުރާ ދައުލަތުގެ ބަޖެޓުގެ ބަހުސް މިރޭ 11 ޖަހަންދެން ކުރިއަށް ގެންދަން ރައްޔިތުންގެ މަޖިލީހުން ފާސްކޮށްފި އެވެ.

ބަޖެޓު ބަހުސް ނިންމުމަށް ވަގުތު އިތުރުކުރަން ހުށަހެޅުއްވީ ރިޔާސަތުންނެވެ. މަޖިލީހުގެ ރައީސް އަބްދުއްރަހީމް އަބްދުﷲ ހުށަހެޅުއްވީ މިއަދު ބަޖެޓަށް ބަހުސް ކުރައްވަން ބޭނުންވާ ހުރިހާ މެންބަރުންނަށް ފުރުސަތު ދިނުމަށް މިރޭ 11 ޖަހަންދެން ޖަލްސާ ކުރިއަށް ގެންދިއުމަށެވެ.

އަދި މާދަމާގެ ޖަލްސާގައި ވެސް ބަޖެޓަށް ބަހުސް ކުރަން އެދިވަޑައިގަންނަވާ ހުރިހާ މެންބަރުންނަށް ފުރުސަތު ދިނުމަށް ޖަލްސާ ދަންމާލަން ހުށަހެޅުއްވި އެވެ. ޖަލްސާ ކުރިއަށް ގެންދާނީ ބްރޭކް ވެސް ނަގަމުންނެވެ.

ރިޔާސަތުގެ ހުށަހެޅުން މަޖިލީހުން ފާސްކޮށްފައި ވަނީ 52 މެންބަރުންގެ ވޯޓުންނެވެ. ވޯޓަށްފަހު މިހާރު ވަނީ ބަޖެޓަށް ބަހުސް ކުރަން ފަށާފަ އެވެ.

އަންނަ އަހަރުގެ ބަޖެޓުގެ ޖުމްލައަކީ 56.6 ބިލިއަން ރުފިޔާ އެވެ. މި ބަޖެޓުގައި ފިސްކަލް ރިފޯމް އެޖެންޑާގައި ހިމެނޭ ކަންކަން ތަންފީޒުކޮށްގެން ހަރަދު ކުޑަކޮށް، 6.6 ބިލިއަން ރުފިޔާ ސަލާމަތް ކުރެވޭނެ ކަމަށް އަންދާޒާކޮށްފައިވެ އެވެ.