ކަންވީ ގޮތް ސާފުކޮށް ދެއްވާ އިޔާޒަށް މިނިސްޓަރު މުއްތަލިބުގެ ވަރުގަދަ ރައްދެއް

ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި މި ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެ ދީނީ އިލްމުވެރިޔާ / ސިޔާސީ އެކްޓިވިސްޓް ޑރ. މުހައްމަދު އިޔާޒް އަބްދުލްލަތީފް ކުރެއްވި ޕޯސްޓަކަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވަރުގަދަ ރައްދެއް ދެއްވައިފި އެވެ.

އުމުރުން ދުވަސްވީ މީހުންގެ އެލަވަންސަށް ބަދަލު ގެންނަން ސަރުކާރުން ނިންމުމާއި ގުޅިގެން އިޔާޒު ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި މި ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެ ޕޯސްޓެއް ކުރައްވާފަ އެވެ. އަނބިކަނބަލުންނަށް ދައުވާ ކުރަން ފޮނުވި މައްސަލާ ގައި ސަރުކާރު ދެކެ ވަރަށް ބޮޑަށް ކޯފާވެފައިވާ އިޔާޒު ވަނީ އޭނާގެ ޕޯސްޓް ގައި ރައީސް ސޯލިހަށް ވަރަށް ބޮޑަށް ތައުރީފު ކުރައްވާފަ އެވެ.

އިޔާޒު ވިދާޅުވީ ކޮވިޑްގެ ދަތިދުވަސްވަރު އިގްތިސާދަށް ބައިރުފިޔާ އެއްވެސް ނުވަންއިރުވެސް ރައްޔިތުންނަށް ބޭނުންވާ އަސާސީ އެއްވެސް ކަމަކަށް ލޮޅުން ނާރާ ކަމަށެވެ. އެއީ ސޯލިހްގެ ހިކްމަތްތެރި ސިޔާސަތުގެ ސަބަބުން ކަމަށް ވިދާޅުވި އެވެ.

އަދި ވިދާޅުވީ ރައީސް މުއިއްޒަށް މެނޭޖްކުރަން ނޭގުމަކީ ރައްޔިތުންނަށް ދުއްތުރާ ދައްކަންޖެހޭ ސަބަބެއް ނޫން ކަމަށެވެ.

"އިސްތިއުފާ ދެއްވާފައި [ރައީސްގެ އަމިއްލަފުޅު ގެކޮޅު] ދިމްޔާތު ގައި ކުލި ނަންގަވައިގެން ހުންނެވުން, ރައްޔިތުނަށް ފައިދާ ބޮޑުވެފައި, މަނިކު ފާނަށް ވެސް ރަނގަޅުވާނެ،" ރައީސް މުއިއްޒަށް ކުރީން ވެސް ވަރަށް ބޮޑަށް ފާޑުވިދާޅުވި ސިޔާސީ އެކްޓިސްޓެއްގެ ގޮތުގައި ގިނަ ބަޔަކު ދެކޭ އިޔާޒު ވިދާޅުވި އެވެ.

އިޔާޒަށް ރައްދު ދެއްވާ މިނިސްޓަރު މުއްތަލިބު ވަނީ މިދިޔަ ދުވަސްތަކުގައި ކަންކަން ހިނގާ ގޮތް ވަރަށް ތަފްސީލުކޮށް ވިދާޅުވެ ދެއްވާފަ އެވެ. ވިދާޅުވީ ޒިއްމާދާރު ކަމެއް ނެތި ދަރަނި ނަގައިގެން އަދި ފައިސާ ޗާޕުކޮށްގެން ރިކަރަންޓު ހަރަދު ކުރުމުގެ ނަތީޖާއަކީ ނޮވެންބަރު 17، 2023 އައި އިރު ދައުލަތުގެ ދަރަނި 123 ބިލިއަން ރުފިޔާއަށް އިތުރުވެ ދަރަނި ދެއްކުމަށް ކުރަން ޖެހޭ ހަރަދު އަހަރަކު ހަތް ބިލިއަނަށް ވުރެ އިތުރުވެގެން ދިއުން ކަމަށެވެ. އަދި ވިދާޅުވީ މީގެ ތެރެއިން ބޮޑު ބަޔަކީ އިންޓަރެސްޓަށް ދައްކަންޖެހޭ ފައިސާ ކަމަށެވެ.

"މީގެ އިތުރަށް ދަރަންޏަށް ފައިސާ ލިބުން ދަތިވެ ސަރުކާރުން ކޮންޓްރެކްޓަރުންނަށް ދޭންޖެހޭ އެތައް ބިލިއަން ރުފިޔާއެއް ނުދެވި އެތައް ވިޔަފާރިއަކަށް އަސަރުކޮށް ގައުމުގެ އިގުތިސާދަށް އޭގެ ނޭދެވޭ އަސަރު ކުރި. ދައުލަތުގެ ބަޖެޓަށް ނުކަތާ ވަރަށް، ހަރަދު ކުރަން ފައިސާ ހޯދޭނެ ގޮތަކަށް ބެލުމެއް ނެތި 39 ބިލިއަން ރުފިޔާއަށް ވުރެ ގިނަ މަޝްރޫއު ފެށުމުގެ ނަތީޖާ އަކީ ގިނަ ޕްރޮޖެކްޓްތަކެއް ރިޔާސީ އިންތިހާބު ނިމުމާއެކު ހުއްޓާލަން ޖެހުން،"

މިނިސްޓަރު ވިދާޅުވީ މިއީ ޒިންމާދާރު ކަމާއެކު ކޮށްފައިވާ ކަމެއް ނޫން ކަމަށެވެ. އަދި ގައުމުގެ މަސްލަހަތު ވަކި ބައެއްގެ މަސްލަހަތަށް ވުރެ ބޮޑުވާނެ ކަަމަށެވެ.

"ހަގީގީ އިހްލާސްތެރި ވެރިންނަކީ ރައްޔިތުންނަށް އޮޅުވާލުމެއް ނެތި ގައުމަށް ދެމެހެއްޓެނިވި ތަރައްގީ ގެނެސް ރައްޔިތުންނަށް ދެމެހެއްޓެނިވި ހިދުމަތްތަކެއް ދެވޭނެ ގޮތަކަށް ސިޔާސަތު ބައްޓަންކުރާ ވެރިން،" މިނިސްޓަރު މުއްތަލިބު ވިދާޅުވި އެވެ.