މޫސުމީ ބަދަލުތަކާ ގުޅިގެން މާލީ އެހީ ބޭނުންވަނީ ޓްރިލިއަނުން: ރައީސް

މޫސުމީ ބަދަލުތަކުން ކުރާ ނޭދެވޭ އަސަރުތައް ކުޑަކުރުމަށާއި، އެ މައްސަލަ ހައްލުކުރުމަށް ބޭނުންވާ މާލީ އެހީތެރިކަމަކީ އެ ކާރިސާގެ ބޮޑުމިނާ އެއްވަރުގެ އަދަދަކަށް ހަދަންޖެހޭކަމަށާއި، މިހާރު ބޭނުންވަނީ ބިލިއަނުން ނޫން ކަމަށާއި ޓްރިލިއަނުންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. 

އަޒަރްބައިޖާނުގެ ވެރިރަށް ބާކޫގައި ކުރިއަށްދާ ކޮޕް-29 ސަމިޓުގެ ޕްލެނަރީ ސެޝަަނުގައި މިއަދު ތަގުރީރުކުރައްވަމުން ރައީސް ވިދާޅުވީ މޫސުމީ ބަދަލުތަކުން ރާއްޖެއަށް ކުރާ އަސަރުތައް ކުޑަކޮށް އިގުތިސާދީ ގޮތުންނާއި މޫސުމީ ގޮތުން ވިލުންތެރިކަން އިތުރުކުރުމަށް ރާއްޖެއިން ގިނަގުނަ މަސައްކަތްތަކެއް ކުރަމުންދާ ކަމަށެވެ. 

އެމަނިކުފާނު ވިދާޅުވީ މިހާރު އެކުލަވައިލަމުންދާ ކުރިއަށް އޮތް 20 އަހަރުގެ ތަރައްގީގެ ތަސައްވުރަކީ ދެމެހެއްޓެނެވި ތިމާވެށީގެ ގޮތުން ވިލުންތެރި ތަރައްގީވެފައިވާ ގައުމަކަށް 2040 ވަނަ އަހަރުގެ ނިޔަލަށް ރާއްޖެ ހެދުމުގެ އަމާޒުގައި އެކުލަވައިލާ އެކަމަށް ވާސިލުވާނެ ގޮތުގެ ދެލިކަރުދާހެއް ކަމަށެވެ. 

ނަމަވެސް މި އަމާޒުުތައް ހާސިލުކުރުމަށް ރާއްޖެއަށް އޮތް ހުރަހަކީ މާލީ އެހީތެރިކަން ނުލިބުންކަން ފާހަގަކުރައްވައި ރައީސް ވިދާޅުވީ ކޮޕް-29 އަކީ ފައިނޭންސްގެ ކޮޕް ސަމިޓަށް ހަދައި މި ސަމިޓުން ނަތީޖާ ނެރެން ކޮންމެހެންވެސް ޖެހޭ ކަމަށެވެ. 

"މޫސުމީ ބަދަލުތަކަށް މާލީ އެހީތެރިކަން ހޯދުމުގެ އަމާޒުވާންޖެހެނީ މޫސުމީ ކާރިސާގެ ބޮޑުމިން އެއިން ރިވެލިވާ އަމާޒަކަށް. ބޭނުން އޮތީ ބިލިއަނަކުން ނޫން އެތައް ޓްރިލިއަނަކުން،" މޫސުމީ ކާރިސާގެ ބޮޑުކަމާއި އެ ކާރިސާއިން އަރައިގަތުމަށް ބޭނުންވާ ފައިސާގެ އަދަދުގެ ބޮޑުކަން ފާހަގަކުރައްވަމުން ރައީސް ވިދާޅުވި އެވެ. 

ހަނގުރާމައަށް ގިނަ އަދަދެއްގެ ފައިސާ ހޭދަވަމުންދާތަން ދުނިޔެ ތެރެއިން ފެނިވަޑައިގަންނަވާކަން ފާހަގަކުރައްވައި ރައީސް ވިދާޅުވީ އިސްކަންްދޭ ކަންކަން އަލުން ތަރުތީބުކުރަންޖެހިފައިވާ ކަމަށެވެ. ބައިނަލްއަގުވާމީ މާލީ ނިޒާމު އަލުން މުރާޖައާކުރަން ގޮވައިލައްވައި ރައީސް ވިދާޅުވީ އަޒަރްބައިޖާނަށް އެމަނިކުފާނާއި ޓީމު ވަޑައިގަތީ ކޮޕް ސަމިޓުގެ މާލީ އަމާޒުތައް ހާސިލުކުރެއްވުމުގެ އަޒުމާއެކު ކަމަށެވެ. 

އިތުރަށް ރައީސް ވިދާޅުވީ ރާއްޖެއިން އިހުއްސުރެ ގޮވައިލަމުން އައި ގޮވައިލުމަކަށް ރާއްޖޭގެ ރާސްތާއަކަށް ބަދަލެއް ނާންނަ ކަމަށެވެ. ތިމާވެއްޓާއި ތަބީއީ މާހައުލާއި ކަނޑުތަކަކީ ދިވެހިންނަށް ހައެކަނި ވަސީލަތްތަކެއް ނޫންކަމަށާއި އެއީ ދިވެހިންގެ ސަގާފީ ޝަހުސިއްޔަތުގެ ބައެއް ކަމުގައި ރައީސް ވިދާޅުވި އެވެ. އަދި އެކަންކަން ރައްކާތެރިކޮަށް ހިމާޔަތްކުރުމަކީ ދިވެހިންގެ ޝަރަފުވެރި ޒިންމާއެއް ކަމަށްވެސް ވިދާޅުވި އެވެ.