ކާރެއްގަައި މީހަކު ރަހީނުކޮށްގެން ފައިސާ ހޯދަން އުޅުނު މައްސަލައެއްގައި މީހަކު ހައްޔަރުކޮށްފި

ހުޅުމާލޭގައި ކާރެއް ތެރޭގައި މީހަކު ރަހީނުކޮށްގެން ފައިސާ ހޯދަން އުޅުނު މައްސަލައެއްގައި މީހަކު ހައްޔަރުކޮށްފި އެވެ. 

ދިވެހި ފުލުހުންގެ ހިދުމަތުން މީޑިޔާއަށް މައުލޫމާތު ދިން ގޮތުގައި މި ހާދިސާ ހިނގީ އިއްޔެ ހުޅުމާލޭގެ އޯކިޑްމާ ހިނގުމުގަ އެވެ. އެ މަގުގައި އޮތް ކާރެއް ތެރޭގައި ރަހީނުކޮށްގެން ހިފަހައްޓާފައިވަނީ ދިވެހި ފިރިހެނެއްކަމަށް ފުލުހުން ބުންޏެވެ. 

މި މައްސަލާގައި ހައްޔަރުކުރި މީހާގެ ވަނަވަރުވެސް ފުލުހުން ހާމަކުރި އެވެ. ހައްޔަރުކުރީ މާލޭ، ދަފްތަރު ނަންބަރު ރސ 9022، އުމުރުން 37 އަހަރުގެ ތަލާލު މޫސާ އެވެ. 

ފުލުހުން ބުނި ގޮތުގައި ކާރުގެ ތެރޭގައި އެ ފިރިހެންމީހާ ރަހީނުކުރުމަށްފަހު އޭނާއަށް އަނިޔާކޮށް ބިރުދައްކާފައިވެ އެވެ. އަދި އެއަށްފަހު އެމީހާގެ އާއިލާ މީހުންނަށް ގުޅައި ފައިސާއަށް ޑިމާންޑުކޮށްފައިވެ އެވެ. 

މި މައްސަލައާ ގުޅިގެން އިތުރަށް ބަލަންޖެހޭ ކަންކަން އެ އިދާރާއިން މިހާރު ތަހުގީގުކުރަމުންދާ ކަމަށް ފުލުހުން ބުނެފައިވެ އެވެ. 

ފާއިތުވި ހަފުތާ ތެރޭގައި ހުޅުމާލޭގެ ހިޔާ ފުލެޓެއްގައި މީހަކު ރަހީނުކޮށްގެން އުޅޭ ކަމުގެ މައުލޫމާތު ލިބިގެން ފުލުހުން އެ އެޕާޓުމެންޓުގެ ދޮރު ވައްޓާލައިގެން ވަދެ ރަހީނުކޮށްފައި ހުރި މީހާ ސަލާމަތްކުރި އެވެ. އެ މައްސަލާގައި 12 މީހަކު ހައްޔަރުކޮށްފައިވެ އެވެ. 

އޭގެ ކުރިން މާލޭގެ ކޮޓަރިއެއް ތެރޭގައި މީހަކު ރަހީނުކޮށް އޭނާއަށް އަނިޔާކޮށް އިނގިލިތަކެއް ބުރިކުރި މައްސަލައެއް ފެންމަތިވެފައިވެ އެވެ. ހިޔާ ފުލެޓުގައި ރަހީނުކުރި މީހާ ސަލާމަތްކުރިއިރު އޭނާގެ އިނގިލި ބުރިކުރަން މަސައްކަތްކުރަމުން އައި ކަމަށް މައުލޫމާތު ލިބިފައިވެ އެވެ.