ހުރިހާ ހިދުމަތަކާއެކު މިމަހު 16 ގައި ދަރުމަވަންތަ ހޮސްޕިޓަލް ހުޅުވަނީ

ރާއްޖޭގައި ހުރި އެންމެ ބޮޑު އެއް އިމާރާތް ކަމަށްވާ ދަރުމަވަންތަ ހޮސްޕިޓަލް މަރާމާތު ކުރުމަށްފަހު ޓާޝަރީ ފެންވަރުގައި މިމަހުގެ 16 ވަނަ ދުވަހު ހުޅުވަން ތައްޔާރުވެއްޖެ އެވެ.

މިކަން އިއުލާނު ކުރެއްވީ ޖުމްހޫރީ ދުވަހުގެ ރަސްމީ ޖަލްސާގައި ރޭ ވާހަކަ ދައްކަވަމުން، ރައީސް ޑރ. މުހައްމަދު މުއިއްޒެވެ.

އައިޖީއެމްއެޗާ އިންވެގެން ހަދާފައިވާ ދަރުމަވަންތަ ހޮސްޕިޓަލުގައި މިހާރު ދެނީ މަދު ހިދުމަތެކެވެ. އެ ހޮސްޕިޓަލުގައި 25 ފަންގިފިލާ ހުރިނަމަވެސް، ބޭނުންކުރަނީ އެތަނުން ވަރަށް މަދު ބައެކެވެ. 

ރައީސް ރޭ ވިދާޅުވީ ވޭތުވެދިޔަ ފަސް އަހަރު އެތަނުގެ ބޮޑުބައެއް އެއްވެސް ބޭނުމެއް ނުކޮށް ހުރުމުގެ މެޝިނަރީތައް ހަލާކުވެ، މަރާމާތައް ވަރަށް ބޮޑު ހޭދައެއް ކުރަން ޖެހުނު ކަމަށެވެ. އެ ހޮސްޕިޓަލް ހުޅުވަނީ މަރާމާތުކޮށް، ހުރިހާ ހިދުމަތެއް ގާއިމްކުރުމަށްފަހު އެވެ.

"ދައުމަވަންތަ ހޮސްޕިޓަލް ހަގީގީ ހޮސްޕިޓަލަކަށް ހަދައި، ޓާޝަރީ ހޮސްޕިޓަލެއްގެ ގޮތުގައި ހުރިހާ ފެސިލިޓީއެއް ގާއިމްކޮށްފަ ނޮވެމްބަރު 16 ގައި އިރާދަކުރެއްވިއްޔާ އަޅުގަނޑުމެން ހުޅުވާނަން،" ރައީސް ވިދާޅުވި އެވެ.

ދަރުމަވަންތަ ހޮސްޕިޓަލަކީ ރައީސް އަބްދުﷲ ޔާމީންގެ ޒައާމަތުގައި އިމާރާތް ކޮށްފައިވާ ތަނެކެވެ. 25 ބުރީގެ ބިޔަ / އުސް އިމާރާތަކީ ރާއްޖޭ ގައި ހުރި އެންމެ އުސް ބިނާ އެވެ. އަދި މިއީ މުޅި ރާއްޖޭ ގައި ހުރި އެންމެ ޒަމާނީ ހޮސްޕިޓަލެވެ. 

މި ހޮސްޕިޓަލުގެ މަސައްކަތްތައް ރައީސް ޔާމީނުގެ ވެރިކަމުގައި ނިމުނު ނަމަވެސް ފާއިތުވި ފަސް އަހަރު މި ހޮސްޕިޓާ ބޭނުން ނުކުރެ އެވެ. ވައްކަމުން އެޅި ހޮހަޅައެއްކަމަށް އެމްޑީޕީން ސިފަކުރި ހޮސްޕިޓާ ބޭނުންނުކޮށް ހުރުމުގެ ސަބަބުން އެތަނުގައި ހުރި ބައެއް ވަސީލަތްތައްވެސް ވަރަށް ބޮޑަށް ވީރާނާވެފައިވެ އެވެ. 

މި ހޮސްޕިޓަލުގެ ޗީފް އެގްޒެކެޓިވް އޮފިސަރު (ސީއީއޯ) ގެ މަގާމަށް ރައީސް އައްޔަނު ކުރައްވާފައި ވަނީ އިބްރާހީމް އަބްދުއްރައްޒާގު ހަލީމެވެ.