ޝަރުއީ ދާއިރާއަށް އުފާވެރިކަން؛ ސުޕްރީމް ކޯޓާއި ސުޕީރިއާ ކޯޓުތަކަށް ބިން، މުސާރަތައް ބޮޑުވާނެ

ޝަރުއީ ދާއިރާގެ މިނިވަންކަން ކަށަވަރުކޮށް އެ ދާއިރާއަށް ދިމާވެފައިވާ ވަސީލަތްތަކުގެ ދަތިކަން ހައްލުކުރުމުގެ ގޮތުން ސުޕްރީމް ކޯޓުގެ އިމާރާތް އެޅުމަށް މާލެއިން ބިމެއް ހަމަޖައްސައި ސުޕީރިއާ ކޯޓުތަކަށް ހުޅުމާލެއިން ބިމެއް ހަމަޖެއްސުމާއެކު އެ ދާއިރާގެ މުވައްޒަފުންގެ މުސާރަަތައް އަންނަ އަހަރު ބޮޑުކުރަން ނިންމައިފި އެވެ. 

ޖުމްހޫރީ ދުވަހުގެ މުނާސަބަތުގައި ރޭ ބޭއްވި ރަސްމިއްޔާތުގައި ވާހަކަދައްކަވަމުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ އެމަނިކުފާނު ވެރިކަމާ ހަވާލުވެވަޑައިގެން އެންމެ ފުރަތަމަ ގައުމާ މުހާތަބުކުރައްވައި ދެއްވި ތަގުރީރުގައި ޝަރުއީ ދާއިރާއަށް ސަރުކާރުން ސިޔާސީ ނުފޫޒު ފޯރުވުން ނިމުމަކަށް ގެންނަވާނެކަމަށް ވައުދުވެވަޑައިގެންނެވި ކަމަށެވެ. އަދި އެ ދުވަހުން ފެށިގެން ޝަރުއީ ދާއިރާއަށް ނުފޫޒު ފޯރުވުން ނިމުމަކަށް ގެންނަވާފައިވާކަމަށްވެސް ވިދާޅުވި އެވެ. 

"17 ނޮވެންބަރު 2023 ވަނަ ދުވަހުގެ ހަވީރު ގަޑިން ފަސް ގަޑި ތިނެއްގައި އިއުލާނުކުރިން ޝަރުއީ ދާއިރާއަށް ނުފޫޒު ފޯރުވުން ނިމުނީކަމަށް. 17 ނޮވެންބަރު 2023 ވީ ހުކުރުދުވަހުގެ ފަސްގަޑި ތިނަކުން ފެށިގެން މިރާއްޖޭގައި ސަރުކާރުން ޝަރުއީ ދާއިރާއަކަށް ނުފޫޒު ނުފޯރުވާ. ކުރިއަށް އޮތް ތާނގައިވެސް ނުފޯރުވާނެ.،" ރައީސް ވިދާޅުވި އެވެ. 

ޝަރުއީ ދާއިރާއަށް ސަރުކާރުން ނުފޫޒު ފޯރުވުމުގެ ބަދަލުގައި ސަރުކާރުން ކުރާނެ މަސައްކަތަކީ ޝަރުއީ ދާއިރާއަށް ބޭނުންވެފައި ހުރި ކަންކަމަށް މަގުފަހިކުރާނީކަމަށް ރައީސް ވިދާޅުވި އެވެ. އަދި ޝަރުއީ ދާއިރާއަށް ބޭނުންވެފައި ހުރި ބައެއް ކަންކަން އަންނަ އަހަރު ސަރުކާރުން ހަމަޖައްސާނެ ކަމުގައި އެމަނިކުފާނު ވިދާޅުވި އެވެ. 

އެގޮތުން މިހާރު ޝަރުއީ ދާއިރާއަށް ކުރިމަތިވެފައި އޮތް އެންމެ ބޮޑު އެއް ގޮންޖެހުމަކީ ޖާގައިގެ ދަތިކަން ކަމުގައި ފާހަގަކުރައްވައި ރައީސް ވިދާޅުވީ ކުރިމިނަލް ކޯޓަށް ދިމާވެފައިވާ ޖާގައިގެ ދަތިކަން ހައްލުކުރުމުގެ ގޮތުން ހުޅުމާލޭގައި އެ ކޯޓަށް ގާއިމުކޮށްދޭ އިމާރާތުގެ މަސައްކަތް އަންނަ އަހަރުގެ މާޗު އޭޕްރީލް ހިސާބުގައި ނިންމަައިލެވި ކޯޓު އެ އިމާރާތަށް ބަދަލުކުރެވޭނެ ކަމަށެވެ. 

"އަޅުގަނޑުމެން މި ސަރުކާރުން ހަވާލުކޮށްގެން ކުރަމުންދާ ކުރިމިނަލް ކޯޓުގެ އިމާރާތް ހުޅުމާލެއަށް ބަދަލުކުރުމުގެ މަސައްކަތް އަންނަ އަހަރުގެ މާޗު އޭޕްރީލަށް ނިމޭނެ ކަމުގައި ކަމާ ބެހޭ ވުޒާރާއިން އަޅުގަނޑަށް މައުލޫމާތު ދީފައިވޭ،" ރައީސް ވިދާޅުވި އެވެ. 

އިތުރަށް ރައީސް ފާހަގަކުރެއްވީ ސުޕީރިއާ ކޯޓު ކޮމްޕްލެކްސްގެ އިމާރާތް ހުޅުމާލޭގައި އެޅުމަށް އަންނަ އަހަރުގެ ބަޖެޓުގައި ހިމަނާފައި އޮންނާނެ ކަމަށާއި، އެކަމުގެ އަމަލީ މަސައްކަތްތައް އަންނަ އަހަރު ފެށިގެންދާނެ ކަމުގަ އެވެ. އޭގެ އިތުރަށް ސުޕްރީމް ކޯޓަކީ މާލޭގައި ހުންނަންޖެހޭ ތަނެއްގެ ގޮތުގައި ގަބޫލުކުރެއްވޭތީ މާލެއިން ސުޕްރީމް ކޯޓަށް ބިމެއް ހަމަޖައްސަވާފައިވާކަމަށް ވިދާޅުވި އެވެ. 

އޭގެ އިތުރަށް ސިވިލް ސާވިސްގެ މުވައްޒަފުންނާއެކު އަންނަ އަހަރު ޖުޑީޝަރީގެ މުވައްޒަފުންގެ މުސާރައަށްވެސް ރަނގަޅު ހެޔޮ ބަދަލެއް ގެނެވޭނެ ކަމުގައި ރައީސް ވިދާޅުވި އެވެ. 

"އެހެންކަމުން ޝަރުއީ ދާއިރާ މިނިވަންކޮށް އެހެން ބަޔަކަށް ބަަރޯސާނުވެ އުޅެވޭނެ ގޮތް ހަމަޖެއްސުން އެއީ އިހުލާސްތެރިކަމާއެކު އެކަންކުރާ ގޮތަކީ،" ރައީސް ވިދާޅުވި އެވެ.