ދިވެހިރާއްޖޭގެ ތައުލީމަށް ހިދުމަތްކުރުމުގެ އެންމެ މަތީ ޝަރަފު ޑރ.ޒާހިރަށް ދެއްވައިފި

ދިވެހިރާއްޖޭގެ ތައުލީމަށް ހިދުމަތްކުރުމުގެ އެންމެ މަތީ ޝަރަފު ޑރ. މުހައްމަދު ޒާހިރު ހުސައިނަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވައިފި އެވެ. 

މިވަގުތު ދިވެހިރާއްޖޭގެ އިސްލާމިކް ޔުނިވާސިޓީގެ ޗާންސެލާގެ މަގާމުގައި ހުންނެވި ޑރ.ޒާހިރަަކީ، ރައީސް އަލްއުސްތާޛު މައުމޫން އަބްދުލްގައްޔޫމުގެ ވެރިކަމުގައި ތައުލީމީ ވަޒީރުކަން ކުރައްވާފައިވާ އިލްމުވެރިއެކެވެ. އޭނާގެ ގައުމީ ހިދުމަތް ފެއްޓެވީ އަމީނިއްޔާ ސްކޫލުގެ ޓީޗަރެއްގެ ގޮތުންނެވެ. 

އިސްލާމް މުދައްރިސެއްގެ ގޮތުގައި ހިދުމަތް ފެއްޓެވި ޑރ.ޒާހިރަކީ މިނިސްޓްރީ އޮފް އެޑިއުކޭޝަންގެ ވަކީލުކަމާއި ޑިޕާޓުމެންޓު އޮފް އެޑިއުކޭޝަންގެ ނައިބުގެ މަގާމުވެސް އަދާކުރެއްވި އެވެ. އަދި ރައީސް އިބްރާހީމް ނާސިރުގެ ވެރިކަމުގައި ކޮމިއުނިޓީ ސްކޫލުތައް ފެށުމުގެ މަރުހަލާގައި އެންމެ އިސްކޮށް މަސައްކަތްކުރެއްވީ ޑރ.ޒާހިރެވެ. 

ޑރ.ޒާހިރު ވިދާޅުވި ގޮތުގައި އެއިރު ބައެއް ރަށްރަށުގައި ކޮމިއުނިޓީ ސްކޫލުތައް ފެށުމަށް ބައެއް ރަށްތަކުން ދެކޮޅުހެދި އެވެ. ނަމަވެސް އެމަނިކުފާނު ކުރެއްވި މަސައްކަތްޕުޅުން އެ މަޝްރޫއު ކުރިއަށްގެންދެވުނެވެ. 

1979 ވަނަ އަހަރުގެ ޖުލައި މަހުގެ 23 ވަނަ ދުވަހުގައި ތައުލީމީ ވުޒާރާއާ ހަވާލުވެވަޑައިގެން ކޮމިއުނިޓީ ސްކޫލުތަކުގެ މަސައްކަތް ހަލުއިކުރެއްވި އެވެ. އަދި އެ މަސައްކަތް ހިނގަމުންދާ ގޮތް ބެއްލެވުމަށް ރާއްޖޭގެ ހުރިހާ ރަށަކަށް ވަޑައިގެން މަސައްކަތް ވަރަށް ކައިރިން ބައްލަވަމުން ގެންދެވި އެވެ. 

އޭގެ އިތުރަށް އަތޮޅު މަދުރަސާތައް ރަށްރަށުގައި ބިނާކުރުމުގެ މަސައްކަތްވެސް ފެށުނީ އެމަނިކުފާނުގެ މިނިސްޓަރު ކަމުގަ އެވެ. އަދި މަތީ ސާނަވީ ކިޔަވައިދޭން ފެށި އެސްއީސީވެސް ބިނާކުރެވުނީ އެމަނިކުފާނުގެ މިނިސްޓަރުކަމުގަ އެވެ. 

ރައީސް މައުމޫނުގެ ވެރިކަމުގައި ދިވެހިންނަކީ ލިޔެންކިޔަން ދަންނަ މީހުންނަށް ހެދުމަށް ފެށި އަސާސީ ތައުލީމުގެ މަޝްރޫއުވެސް ހިންގީ އެމަނިކުފާނުގެ ވަޒީރުކަމުގަ އެވެ. 

އަރަބި ތައުލީމު ފުޅާކުރުމަށް މައުހަދާއި މަދްރަސަތުލް އަރަބިއްޔަތުލް އިސްލާމިއްޔާވެސް ގާއިމުކުރެވިގެންދިޔައީ އެމަނިކުފާނުގެ ވަޒީރުކަމުގަ އެވެ. 

ރައީސް އޮފީހުގެ މިނިސްޓަރުކަމުގެ އިތުރަށް ކުޅިވަރުގެ ދާއިރާގެ ވަޒީރުކަން ކުރައްވައި އެ ދާއިރާގައިވެސް ގިނަ ހިދުމަތްތަކެއްވެސް އެމަނިކުފާނު ކުރެއްވި އެވެ. މަޖިލީހުގައި ރައީސްގެ މެންބަރުކަން ކުރައްވައި ދުސްތޫރީ ނިޒާމު ހަރުދަނާކުރެއްވުމުގައިވެސް ހިދުމަތް ކުރެއްވި އެވެ. 

1989 ވަނަ އަހަރު ނޫސްވެރިކަމުގެ ދާއިރާއިން އާންމު ހިދުމަތުގެ އިނާމު ހާސިލުކުރެއްވި ޒާހިރަކީ ރާއްޖޭގައި އެންމެ ގިނަ ދުވަސްވީ ހަވީރު ނޫހުގެ މުއައްސިސެވެ. އެމަނިކުފާނު ދައުލަތަށް ހިދުމަތްކުރައްވާތާ 48 އަހަރުވެފައިވެ އެވެ.