އެމްޕީއެލްއަށް ފުލުހުން ވަދެއްޖެ | ކޮންޓެއިނަރެއްގެ ތެރެއިން ގިނަ އަދަދެއްގެ މަސްތުވާތަކެތި
އެމްޕީއެލް ސަރަހައްދުގައި ފުލުހުން ހިންގަމުންދާ އޮޕަރޭޝަނުގައި މިހާތަނަށް ބަލައިފާސްކުރި އެއް ކޮންޓެއިނަރުގެ ތެރެއިން ގިނަ އަދަދެއްގެ މަސްތުވާތަކެތިވަނީ ފެނިފަ އެވެ.
އެމްޕީއެލްގެ ނޯތު ހާބަރު ސަރަހައްދަށް ފުލުހުން ވަދެ ހާއްސަ އޮޕަރޭޝަނެއް ފަށައިގެން ކުރިއަށްގެންދާކަމުގެ މައުލޫމާތު "މިރާ"އަށް ލިބިއްޖެ އެވެ.
"މިރާ"އަށް އިތުބާރުކުރެވޭ މަސްދަރުތަކުން މައުލޫމާތު ލިބިފައިވާ ގޮތުގައި އެމްޕީއެލްއަށް ފުލުހުންވަނީ އެ ސަރަހައްދުގައި ހުރި ކޮންޓެއިނަރެއްގެ ތެރެއިން މަސްތުވާތަކެތި ކަމުގައި ޝައްކުވާ އެއްޗެހިތަކެއް ފެނިގެން ބަލައިފާސްކުރުމަށެވެ.
އެމްޕީއެލްގެ މުވައްޒަފަކު ނަން ހާމަނުކުރުން ޝަރުތުކޮށް މައުލޫމާތު ދިން ގޮތުގައި ފުލުހުން ދަނީ އެތަނުގައި ހުރި ކޮންޓެއިނަރުތަކެއް ބަލައިފާސްކުރަމުންނެވެ. އަދި މިހާތަނަށް އެއް ކޮންޓެއިނަރު ބަލައިފާސްކުރިއިރު އެ ކޮންޓެއިނަރުގެ ތެރެއިން މަސްތުވާތަކެތި ކަމަށް ބެލެވޭ އެއްޗެހިތަކެއް ފެނިފައިވާކަމަށް އޭނާ ބުންޏެވެ.
އޭނާ އިތުރަށް ބުނި ގޮތުގައި މަސްތުވާތަކެތި ކަމަށް ބެލެވޭ ތަކެތި ފެނުނީ އަވަނުތަކެއްގެ ތެރޭގައި ރައްކާކޮށްފަައި ހުއްޓަ އެވެ.
މި މައްސަލައާ ގުޅިގެން ފުލުހުންގެ ބަހެއް ހޯދުމަށް އެ ހިދުމަތުގެ މީޑިޔާ އޮފިޝަލުންނަށް މެސެޖުކުރި ނަމަވެސް އެއިން އެއްވެސް ބޭފުޅަކު ޖަވާބުނުދެއްވާތީ އެ ހިދުމަތުގެ ބަހެއް މިކަމުގައި ނުލިބެ އެވެ.
ކޮމެންޓް
Republic of Maldives