ލުބުނާނަށް ދެމުންދާ ހަމަލާތައް ހުއްޓައިލަން އިސްރާއީލުން ވިސްނަނީ

އދގެ ސަލާމަތީ މަޖިލީހުން އިސްރާއީލާ ދެކޮޅަށް ނިންމުމެއް ނިންމަފާނެތީ ލުބުނާނަށް އިސްރާއީލުން ދެމުންދާ ހަމަލާތައް ހުއްޓައިލަން އެ ގައުމުން ވިސްނަމުންދާކަމަށް އިސްރާއީލުގެ ޗެނަލް-12 އިން ރިޕޯޓުކޮށްފި އެވެ. 

އެ ޗެނަލުން ރިޕޯޓުކުރި ގޮތުގައި އެމެރިކާގެ ރައީސް ޖޯ ބައިޑަންގެ ސަރުކާރުން އަންނަނީ ލުބުނާނަށް ދެމުންދާ ހަމަލާތައް ހުއްޓައިލުމަށް އިސްރާއީލަށް ވަރަށް ބޮޑަށް ފިއްތުން ކުރިމަތިކުރަމުންނެވެ. އަދި އިސްރާއީލް ޓުޑޭ ނޫހުން އެ ގައުމުގެ މަސްއޫލުވެރިޔަކާ ހަވާލާދީ ރިޕޯޓުކުރި ގޮތުގައި ލުބުނާނަށް ދެމުންދާ ހަމަލާތައް ހުއްޓައިލުމާމެދު ކުރަމުންދާ މަޝްވަރާތަކުގައި ކުރިއެރުންތަކެއް ލިބިފައިވެ އެވެ. 

އަދި ހަމަލާ ބަދަލުކުރުން ހުއްޓައިލުމާ ގުޅޭ ގޮތުން ކުރަމުންދާ މަޝްވަރާތަކުގައި މިހާރު ހުށަހަޅާފައިވާ އެއްބަސްވުމަކީ އިސްރާއީލަށް "ވަރަށް ރަނގަޅު" އެއްބަސްވުމެއްގެ ގޮތުގައި އެ އޮފިޝަލު ސިފަކުރެއްވި އެވެ. އަދި އެ އެއްބަސްވުމުގައި އިސްރާއީލުގެ މަސްލަހަތުތައް އެންމެ އެކަށީގެންވާ ގޮތަށް ހިމާޔަތްކުރެވޭ ކަމަށްވެސް އެ އޮފިޝަލު ވިދާޅުވެފައިވެ އެވެ. 

އިސްރާއީލުގެ އެހެން ބައެއް މީޑިޔާތަކުން ރިޕޯޓުކުރި ގޮތުގައި އިސްރާއީލުން ލުބުނާނުގައި ފެށި އަސްކަރީ އޮޕަރޭޝަން ނިމުމަކަށް އައިސްފައިވާކަން އިއުލާނުކުރަން އިސްރާއީލުގެ އަސްކަރިއްޔާ އޮތީ ތައްޔާރަށެވެ. އެ އޮޕަރޭޝަން ފެށިތާ މަހެއްހައި ދުވަސްވީއިރު އިސްރާއީލުން އެއްގަމު މަގުން ލުބުނާނަށް އަރައިގެން ލިބުނު ބޮޑު ކާމިޔާބެއް ނެތެވެ. 

އަދި ޗެނަލް-12 އިން ރިޕޯޓުކުރި ގޮތުގައި އިސްރާއީލުން ލުބުނާނުގައި އެއްގަމު މަގުން ހިންގަން ފެށި އޮޕަރޭޝަންތަކުގެ 90 އިންސައްތަ މިހާރުވަނީ ނިމިފަ އެވެ. ނަމަވެސް ސިޔާސީ އެެއްބަސްވުމެއް ގާއިމުނުވަނީސް އޮޕަރޭޝަންތައް ނިމުނުކަން އިއުލާނުކުރަން އިސްރާއީލު އަސްކަރިއްޔާއިން ބޭނުންނުވެ އެވެ. 

އެ ރިޕޯޓުގައި ބުނެފައިވަނީ އިސްރާއީލުން ފެށި އެއްގަމު އޮޕަރޭޝަނުގައި ބޮޑެތި ކާމިޔާބީތަކެއް ލިބިފައިވާ ކަމަށެވެ. އެގޮތުން ހިޒްބުﷲއިން ގާއިމުކޮށްފައިވާ އުމްރާނީ ވަސީލަތްތައް ދެނެގަނެވި، ހަތިޔާރު ރައްކާކޮށްފަައިވާ ގުދަންތައް ސުންނާފަތިކުރެވި އެ ޖަމާއަތުގެ ސިއްރުތައް އިސްރާއީލަށް ހާމަކުރާނެ އަސީރުންތަކެއް ހައްޔަރުކުރެވިފައިވެ އެވެ. 

އިސްރާއީލުގެ އަސްކަަރިއްޔާގެ އެންމެ މަތީ ކޮމާންޑަރު ހާޒޭ ހަލޭވީ ވިދާޅުވެފައިވަނީ ހިޒްބުﷲގެ އެންމެ މަތީ ލީޑާޝިޕު ނައްތާލެވިފައިވާތީ ހަނގުރާމަ ނިމުމަކަށް ގެނައުމުގެ ފުރުސަތު މިހާރު އެބައޮތް ކަމަށެވެ. 

އިސްރާއީލުން ބުނާ ގޮތުން ލުބުނާނަށް ހަމަލާތައް ދޭން ފެށީ މީގެ އަހަރެއްހައި ދުވަސް ކުރިން އިސްރާއީލާއި ހިޒްބުﷲގެ މެދުގައި ހަމަލާ ބަދަލުކުރަން ފެށުމާއެކު އުތުރު އިސްރާއީލުގެ އަވަށްތައް ދޫކޮށް ހިޖުރަކުރަން މަޖުބޫރުވި އެތައް ހާސް އިސްރާއީލު މީހުންނަށް އަނބުރާ އެމީހުންގެ ގެދޮރަށް އާދެވޭނެ މަގުފަހިކުރުމަށެވެ. 

ހިޒްބުﷲއާއި އިސްރާއީލުގެ މެދުގައި ހަމަލާ ބަދަލުކުރުންތައް ފެށުނީ އިސްރާއީލުން ޣައްޒާއަށް ދޭން ފެށި ހަމަލާތަކާ ގުޅިގެންނެވެ. މިހާތަނަށް އެ ހަމަލާތަކުގައި 45،000 އާ ގާތްކުރާ އަދަދަކަށް މީހުން މަރާލާފައިވެ އެވެ. އަދި އެތައް މިލިއަން މީހުންނެއް ގެދޮރުން ބޭރުވެ މަގުމަތިވެފައިވެ އެވެ.