ރައީސް ހައްދަވަނީ ދޮގު، ކަންކުރައްވަނީ ވިދާޅުވި ގޮތާ ހިލާފަށް: ފައްޔާޒު

އެތައް ޖަލްސާއެއްގައި ވިދާޅުވެ މެނިފެސްޓޯ ގައި ވަރަށް ސާފުކޮށް ބަޔާންކުރިޔަސް ވެރިކަމަށް ވަޑައިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ވަރަށް ގިނަ ކަންކަން ކުރައްވަމުން ގެންދަވަނީ ސީދާ ވިދާޅުވި ގޮތާ އިދިކޮޅަށް، ލިޔެފައިވާ ގޮތާ ހިލާފަށް ކަމަށް އެމްޑީޕީގެ ޗެއާޕާސާން އަދި ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ އެކްސް ގައި މިރޭ ކުރެއްވި ޕޯސްޓެއްގަ އެވެ. ފައްޔާޒު ވިދާޅުވީ މިއަދު، ސަރުކާރުން ހަތް ރަށެއް އާބަން ސެންޓަރުގެ ގޮތުގައި ތަރައްގީ ކުރަން އިއުލާނު ކުރީ އެއްވެސް މަޝްވަރާ ކުރުމެއް ނެތި، ރައްޔިތުންގެ ހިޔާލު ހޯދުމެއް ވެސް ނެތި ކަމަށެވެ.

އަދި ވިދާޅުވީ ގައުމީ ތަރައްގީގެ 20 އަހަރުގެ މާސްޓާޕްލޭން ވެސް އެކުލަވާލާނީ އެހެންކަމާއި އެ ޕްލޭނާ އެއްގޮތަށް ކަންކަން ވެސް ނުކުރައްވާނެކަން ދިވެހި ރައްޔިތުންނަށް މިއަދު ޔަގީންވާ ކަމަށެވެ.

"ހުއްޓުމެއް ނެތި ހައްދަވަނީ ހުސް ދޮގު،" ރައީސް މުއިއްޒަށް އިޝާރާތް ކުރައްވާ ފައްޔާޒު ވިދާޅުވި އެވެ.

ރާއްޖޭގެ ސަރަހައްދީ ތަރައްގީއަށް ހާއްސްކޮށްގެން އާބަން ސެންޓަރުތައް ގާއިމް ކުރަން ނިންމާފައިވާ ރަށްތައް ރަސްމީކޮށް މިއަދު ވަނީ އިއުލާނު ކޮށްފަ އެވެ. މި ރަށްތަކުގެ ތެރޭގައި އެންމެ އުތުރާއި އެންމެ ދެކުނުގެ ރަށެއް ހިމެނިފައި ނުވާތީ ބައެއް ފަރާތަކުން ދަނީ ކަންބޮޑުވުން ފާޅުކުރަމުންނެވެ.

އެ ވާހަކަތައް ސާފުކޮށް ދެއްވާ ރައީސް ވަނީ އެކްސް ގައި ޕޯސްޓެއް ކުރައްވާފަ އެވެ. ރައީސް ވިދާޅުވީ ތަރައްގީގެ ސިޔާސަތު ‏އެމަނިކުފާނުގެ މެނިފެސްޓޯގެ -- ޗެޕްޓަރ 4، ނަންބަރު 12، 13 އަދި 14 ގައި ވަރަށް ސާފުކޮށް ބަޔާންކޮށް ފައިވާ ކަމަށެވެ. އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމަޔަށް އެތައް ޖަލްސާއެއްގައި އެމަނިކުފާނު ބަޔާންކޮށްފައިވާ ފަދައިން، ދެމެހެއްޓެނިވި ސަރަހައްދީ ތަރައްގީގެ ސިޔާސަތުގެ ދަށުން މާލެ އާބަން ރީޖަންގެ އިތުރުން އެންމެ މަތީ ފަންތީގެ ހިދުމަތްތައް ހިމެނޭހެން އެންމެ އުތުރުގެ ތިން އަތޮޅު ހިމެނޭހެން ނޮދަން އިންޓާގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ ހަތަރު އަތޮޅު ހިމެނޭހެން ސަދަން އިންޓާގްރޭޓަޑް ޑިވެލޮޕްމަންޓް ޒޯނެއް ތަރައްގީ ކުރުން އަދި އޭގެ އިތުރަށް ހަތް އާބަން ސެންޓަރު -- މާލެއިން އުތުރުން 3 އަތޮޅާއި މާލެއިން ދެކުނުން 4 އަތޮޅު ތަރައްގީ ކުރުން އެއީ ސަރުކާރުގެ ސިޔާސަތު ކަމަށެވެ.

އަދި މިކަންކަމަކީ ކުރިޔަށް 20 އަހަރު ދުވަހަށް އެކަށައަޅަން މަސައްކަތް ފަށާފައިވާ ތަރައްގީގެ މާސްޓާޕްލޭންގައި ރާއްޖޭގެ ހުރިހާ ރަށެއްގެ ރައްޔިތުންގެ ހިޔާލާއި ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުމާއެކު އެކަށައެޅުމަށް ގަސްދުކުރާ ކަންކަން ކަމަށް ރައީސް ވިދާޅުވި އެވެ.