ރާއްޖެ ތަރައްގީ ކުރުމުގެ ސިޔާސަތު ރައީސް ސާފުކޮށް ދެއްވައިފި

ރާއްޖޭގެ ސަރަހައްދީ ތަރައްގީއަށް ހާއްސްކޮށްގެން އާބަން ސެންޓަރުތައް ގާއިމް ކުރަން ނިންމާފައިވާ ރަށްތައް އާންމުކުރުމުން މި ސަރުކާރުގެ ތަރައްގީގެ ސިޔާސަތާމެެދު ސުވާލު އުފައްދާ ވާދަވެރީން ދައްކާ ވާހަކަތަކާއި ގުޅިގެން ކަން އޮތްގޮތް އެމަނިކުފާނު ސާފުކޮށް ދެއްވައިފި އެވެ.

ރާއްޖޭގެ ސަރަހައްދީ ތަރައްގީއަށް ހާއްސްކޮށްގެން އާބަން ސެންޓަރުތައް ގާއިމް ކުރަން ނިންމާފައިވާ ރަށްތައް ރަސްމީކޮށް މިއަދު ވަނީ އިއުލާނު ކޮށްފަ އެވެ. ރާއްޖޭގެ އެންމެ އުތުރުގެ ހަތަރު އަތޮޅާއި ދެކުނުގެ ހަތަރު އަތޮޅު ޑިވެލޮޕްމަންޓް ޒޯނެއްގެ ގޮތުގައި ތަރައްގީ ކުރައްވަން ރައީސް ޑރ. މުހައްމަދު މުއިއްޒު ވަނީ ނިންމަވާފަ އެވެ. އަދި މާލެސިޓީ ނުހިމަނައި، އިތުރު ހަތް އާބަން ސެންޓަރު އެންމެ މަތީ ފެންވަރުގެ ހިދުމަތްތަކާއެކު ތަރައްގީ ކުރައްވަން ނިންމަވައި، އެކަން ވަނީ އެކި ފަހަރުމަތިން އިއުލާނު ކުރައްވާފަ އެވެ.

ރައީސްގެ ވައުދުފުޅާ އެއްގޮތަށް، އާބަން ސެންޓަރުތައް ގާއިމްކުރާ ރަށްތައް ހައުސިން މިނިސްޓްރީން ވަނީ އިއުލާނުކޮށްފަ އެވެ. އެއީ؛

މި ރަށްތަކުގެ ތެރޭގައި އެންމެ އުތުރާއި އެންމެ ދެކުނުގެ ރަށެއް ހިމެނިފައި ނުވާތީ ބައެއް ފަރާތަކުން ދަނީ ކަންބޮޑުވުން ފާޅުކުރަމުންނެވެ.

އެ ވާހަކަތައް ސާފުކޮށް ދެއްވާ ރައީސް ވަނީ އެކްސް ގައި ޕޯސްޓެއް ކުރައްވާފަ އެވެ. ރައީސް ވިދާޅުވީ ތަރައްގީގެ ސިޔާސަތު ‏އެމަނިކުފާނުގެ މެނިފެސްޓޯގެ -- ޗެޕްޓަރ 4، ނަންބަރު 12، 13 އަދި 14 ގައި ވަރަށް ސާފުކޮށް ބަޔާންކޮށް ފައިވާ ކަމަށެވެ. އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމަޔަށް އެތައް ޖަލްސާއެއްގައި އެމަނިކުފާނު ބަޔާންކޮށްފައިވާ ފަދައިން، ދެމެހެއްޓެނިވި ސަރަހައްދީ ތަރައްގީގެ ސިޔާސަތުގެ ދަށުން މާލެ އާބަން ރީޖަންގެ އިތުރުން އެންމެ މަތީ ފަންތީގެ ހިދުމަތްތައް ހިމެނޭހެން އެންމެ އުތުރުގެ ތިން އަތޮޅު ހިމެނޭހެން ނޮދަން އިންޓާގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ ހަތަރު އަތޮޅު ހިމެނޭހެން ސަދަން އިންޓާގްރޭޓަޑް ޑިވެލޮޕްމަންޓް ޒޯނެއް ތަރައްގީ ކުރުން އަދި އޭގެ އިތުރަށް ހަތް އާބަން ސެންޓަރު -- މާލެއިން އުތުރުން 3 އަތޮޅާއި މާލެއިން ދެކުނުން 4 އަތޮޅު ތަރައްގީ ކުރުން އެއީ ސަރުކާރުގެ ސިޔާސަތު ކަމަށެވެ.

އަދި މިކަންކަމަކީ ކުރިޔަށް 20 އަހަރު ދުވަހަށް އެކަށައަޅަން މަސައްކަތް ފަށާފައިވާ ތަރައްގީގެ މާސްޓާޕްލޭންގައި ރާއްޖޭގެ ހުރިހާ ރަށެއްގެ ރައްޔިތުންގެ ހިޔާލާއި ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުމާއެކު އެކަށައެޅުމަށް ގަސްދުކުރާ ކަންކަން ކަމަށް ރައީސް ވިދާޅުވި އެވެ.

"‏ކަންކަމުގެ ހަގީގަތް ނުބައްލަވާ، ނުވަތަ ހަގީގަތް އެނގިވަޑައިގެން ތިއްބަވައިގެން، ސިޔާސީ ފައިދާ ހޯދުމުގެ ނިޔަތުގައި ސިޔާސީ ބައެއް ފަރާތްތަކުން ކުރައްވާ ކަންކަމަށް ޒިންމާވާނީ އެކަންކަން ކުރައްވާ ބޭފުޅުން،" 

ރައީސް މިހެން ވިދާޅުވިއިރު ކުރީގެ ފޮރިން މިނިސްޓަރު އަބްދުﷲ ޝާހިދު ވަނީ އާބަން ސެންޓަރު ކަނޑައެޅުމުގައި ބޮޑުތިލަދުންމައްޗާއި ރާއްޖޭގެ ދެކުނުގެ ސަރަހައްދު އުނިވެފައި މިވާ ސަބަބު އެ ސަރަހައްދު ތަކުގައި ދިރިއުޅޭ ރައްޔިތުންނަށް ސަރުކާރުން ސާފުކޮށްދޭން ޖެހޭ ކަމަށް ވިދާޅުވެފަ އެވެ. އަދި މިފަދަ ކަންކަން ނިންމުމުގައި ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ހޯދުމަކީ މުހިންމު ކަމެއް ކަމުގައި ދޭ ކަމަށް ވިދާޅުވި އެވެ.

"އާބަން ސެންޓަރުގެ ގޮތުގައި ރަށްތަކެއް ކަނޑައެޅުމުގެ މަގްސަދަކީ ލާމަރުކަޒީ ނިޒާމުން ރަށް ރަށް ހިންގުމުގެ ނިޒާމުން އެރަށްތައް ވަކިކޮށް މާލޭން ހިންގަން ފެށުން ކަމުގައިވެގެން ނުވާނެ،" ޝާހިދު ވިދާޅުވި އެވެ.