އާބަން ސެންޓަރުތައް ގާއިމްކުރާ 7 ރަށް ރަސްމީކޮށް އިއުލާނުކޮށްފި
ސަރުކާރުން ވަނީ މިކަމަށް ހާއްސަކޮށް، އާބަން ޑިވެލޮޕްމެންޓް ބިލު ރައްޔިތުންގެ މަޖިލީހަށް ހުށަހަޅާފަ އެވެ.
ރާއްޖޭގެ ސަރަހައްދީ ތަރައްގީއަށް ހާއްސްކޮށްގެން އާބަން ސެންޓަރުތައް ގާއިމް ކުރަން ނިންމާފައިވާ ރަށްތައް ރަސްމީކޮށް މިއަދު އިއުލާނުކޮށްފި އެވެ.
ރާއްޖޭގެ އެންމެ އުތުރުގެ ހަތަރު އަތޮޅާއި ދެކުނުގެ ހަތަރު އަތޮޅު ޑިވެލޮޕްމަންޓް ޒޯނެއްގެ ގޮތުގައި ތަރައްގީ ކުރައްވަން ރައީސް ޑރ. މުހައްމަދު މުއިއްޒު ވަނީ ނިންމަވާފަ އެވެ. އަދި މާލެސިޓީ ނުހިމަނައި، އިތުރު ހަތް އާބަން ސެންޓަރު އެންމެ މަތީ ފެންވަރުގެ ހިދުމަތްތަކާއެކު ތަރައްގީ ކުރައްވަން ނިންމަވައި، އެކަން ވަނީ އެކި ފަހަރުމަތިން އިއުލާނު ކުރައްވާފަ އެވެ.
ރައީސްގެ ވައުދުފުޅާ އެއްގޮތަށް، އާބަން ސެންޓަރުތައް ގާއިމްކުރާ ރަށްތައް ހައުސިން މިނިސްޓްރީން ވަނީ އިއުލާނުކޮށްފަ އެވެ. އެއީ؛
- ރ. އުނގޫފާރު
- ބ. އޭދަފުށި
- ޅ. ނައިފަރު
- އދ. މަހިބަދޫ
- ފ. ނިލަންދޫ
- ދ. ކުޑަހުވަދޫ
- ލ. ފޮނަދޫ
ސަރުކާރުން ވަނީ މިކަމަށް ހާއްސަކޮށް، އާބަން ޑިވެލޮޕްމެންޓް ބިލު ރައްޔިތުންގެ މަޖިލީހަށް ހުށަހަޅާފަ އެވެ. އެ ބިލުގައި ބަޔާންކޮށްފައިވާ ގޮތުން އާބަން ސަރަހައްދުތައް ތަރައްގީކުރުމުގެ ސިޔާސަތާއި އާބަން ސަރަހައްދުތައް ކަނޑައަޅުއްވާނީ ވަޒީރުންގެ މަޖިލީހުގެ ލަފާގެ މަތިން ރައީސެވެ. އަދި އެ ސިޔާސަތުގައި ކަނޑައަޅާ ކަންކަން ތަންފީޒުކުރުން ހަވާލުކުރާ ފަރާތްތަކުން އެކަން ކުރާކަން މިނިސްޓަރު ބައްލަވައި ކަށަވަރުކުރެއްވުން ލާޒިމުކޮށްފަައިވެ އެވެ.
އަދި އާބަން ސަރަަހައްދުތައް ތަރައްގީކުރުމުގެ މުހިއްމު މަސައްކަތްތައް ކުރުމަށް އާބަން ޑިވެލޮޕްމެންޓު އޮތޯރިޓީއެއް އުފަައްދައި، އެ އޮތޯރިޓީއަކީ އާބަން ސަރަހައްދުތަކުގެ ތަރައްގީގެ ޕްލޭންތައް ތައްޔާރުކޮށް، ތަރައްގީކުރާ ފަރާތްތަކަށް ދޫކުރަންޖެހޭ އެކި ހުއްދަތައް ދޫކުރުމާއެކު، ތަރައްގީގެ މަސައްކަތްތައް ވިލަރެސްކުރުމުގެ ޒިންމާ އެ އޮތޯރިޓީއާ ބިލުން ހަވާލުކުރެ އެވެ. އަދި އެ ބިލު ގާނޫނަކަށްވުމުން އާބަން ޑިވެލޮޕްމެންޓާ ގުޅޭ ހުރިހާ މުވައްޒަފުންނާއި ވަސީލަތްތައް އެ ޑިޕާޓުމެންޓަށް ބަދަލުވާނެ އެވެ.
އެ ބިލުގައި ބަޔާންކޮށްފައިވާ ގޮތުން ތިން ބާވަތެއްގެ ސަރަހައްދު އާބަން ސަރަހައްދުތައް ކަމަށް ކަނޑައެޅޭނެ އެވެ. އެއީ މެޓްރޮޕޮލިޓަން ސަރަހައްދާއި އާބަން ރީޖަންއާއި އާބަން ސެންޓަރެވެ.
ކޮމެންޓް
Republic of Maldives