"ޔާމީން ގެއަށް ބަދަލުކޮށްދޭން އެދި ރައީސް ސޯލިހަށް ރައީސް މުއިއްޒުކުރެއްވި މެސެޖުތައް އެބަހުރި"

ކުރީގެ ރައީސުލްޖުމްހޫރިއްޔާ ރައީސް އަބްދުﷲ ޔާމީން ޖަލުން ގެކޮޅަށް ބަދަލުކޮށްދެއްވަން އެދިވަޑައިގެން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުރީގެ ރައީސް އިބްރާހީމް މުހައްމަދު ސޯލިހަށް ފޮނުއްވި މެސެޖުތައް އެބަހުރިކަމަށް ފަންޑް މެނޭޖުމެންޓު ކޯޕަރޭޝަން (އެމްއެފްއެމްސީ)ގެ މެނޭޖިން ޑިރެކްޓާ އަހްމަދު ނާޒިމް އަބޫބަކުރު (ހެރިސް އައްމަޑޭ) ވިދާޅުވެއްޖެ އެވެ. 

މިފަދައިން އައްމަޑޭ ވިދާޅުވެފައިވަނީ 2023 ވަނަ އަހަރުގެ ރިޔާސީ އިންތިހާބުން ރައީސް ސޯލިހުު ނާކާމިޔާބުވެވަޑައިގަތުމަށްފަހު ރައީސް ޔާމީން ގެކޮޅަށް ބަދަލުކުރެއްވީ ރައީސް މުއިއްޒު އެދިވަޑައިގެން ނޫންކަމަށް ރައީސް ޔާމީން ތަކުރާރުކޮށް ވިދާޅުވަމުންގެންދަވާތީ އެކަމަށް ރައްދުދެއްވައި އެކްސްގައި ކުރެއްވި ޕޯސްޓެއްގަ އެވެ. 

ރައީސް ޔާމީނު ރާއްޖެޓީވީއަށް ދެއްވި ބަސްދީގަތުމުގައިވެސް ވިދާޅުވީ އެމަނިކުފާނު ގެކޮޅަށް ބަދަލުކުރެއްވީ ރައީސް ސޯލިހު ކަމަށެވެ. އެއީ އެއިރު އެމަނިކުފާނު އެ ޕާޓީއެއްގެ ލީޑަރުގެ ގޮތުގައި ހުންނެވި ޕީޕީއެމް އަދި އެ ޕާޓީއާ ގުޅިފައި އޮތް ޕީއެންސީގެ އިސްވެރިން އެދިވަޑައިގެން ކުރެއްވި ކަމެއް ނޫންކަމަށްވެސް ރައީސް ޔާމީން ވިދާޅުވި އެވެ. 

އިތުރަށް ރައީސް ޔާމީން ތުހުމަތުކުރައްވާ ގޮތުގައި ރިޔާސީ އިންތިހާބުގައި އެމަނިކުފާނަށް ވާދަކުރެއްވުމުގެ ފުރުސަތު ގެއްލިވަޑައިގަތުމަށް މެދުވެރިވި ހައިކޯޓުގައި އެއިރު އޮތް އިސްތިއުނާފު މައްސަލަ ލަސްވުމުގެ ފަހަތުގައިވެސް ތިއްބެވީ ރައީސް މުއިއްޒާއި ޕީޕީއެމް/ޕީއެންސީ ލީޑާޝިޕުގައި ތިއްބެވި ބޭފުޅުންނެވެ. 

"[އަޅުގަނޑު] ޖަލުން ނުނެރެން ކުރެވެން ހުރި ހުރިހާ މަސައްކަތެއް ކުރުމާއި ވެރިކަން ބަދަލުވީމަ އަޅުގަނޑު ގެއަށް ބަދަލުކުރަން އިބޫ މަސައްކަތްކުރީމާ އެކަމާވެސް ދެކޮޅުހެދީ މުއިއްޒާއި އަބްދުއްރަހީމާ އިނގޭތޯ؟،" ރައީސް ޔާމީން ވިދާޅުވި އެވެ. 

ރައީސް ޔާމީނުގެ މިވާހަކަފުޅުތަކާ ގުޅުގެން އައްމަޑޭ އެކްސްގައި ކުރެއްވި ޕޯސްޓެއްގައި ވިދާޅުވީ ރައީސް ޔާމީން ހައްދަވަނީ ކަނޑައެޅިގެން އިތުރުފުޅު ކަމަށެވެ. އަދި ރައީސް ޔާމީން ޖަލުން މިނިވަންކުރުމަށާއި، ގެއަށް ބަދަލުކުރެއްވުމަށް އެދިވަޑައިގެން ރައީސް ޑރ.މުއިއްޒު ރައީސް ސޯލިހަށް ކުރެއްވި މެސެޖުތައް އެބަހުރި ކަމަށްވެސް އައްމަޑޭ ވިދާޅުވި އެވެ. 

އައްމަޑޭއަކީ ރައީސް މުއިއްޒުގެ އެންމެ އަރިސް އަދި އެންމެ އިތުބާރުކުރައްވާ ބޭފުޅުންގެ ތެރޭގައި ހިމެނޭ އަބްދުﷲ ނާސިރުގެ ކޮއްކޯފުޅެވެ.