މާލޭ މަގުތަކުގެ ސާވޭ މަސައްކަތް ފަށައިފި
މިސާވޭގައި އެއްކުރާ މައުލޫމާތަކީ މި މަޝްރޫއު ފަރުމާކޮށް، މަޝްރޫއުގެ މަސައްކަތްތައް ކުރިއަށްގެންދާނެ ގޮތް ރާވައި އިންތިޒާމުކުރުމަށް ބޭނުންވާ މުހިއްމު މައުލޫމާތުތަކެވެ.
ޗައިނާ ސަރުކާރުގެ ހިލޭ އެހީގެ ދަށުން ހިންގުމަށް ރާވާފައިވާ މާލެއާއި ވިލިމާލޭގެ މަގުުތައް ޒަމާނީ ފެންވަރަކަށް ތަރައްގީކުރުމުގެ މަޝްރޫއުގެ ފީޒިބިލިޓީ ހެދުމަށް ބޭނުންވާ ސާވޭތަކުގެ މަސައްކަތް ޗައިނާގެ ފަންނީ ޓީމަކުން ފަށައިފި އެވެ.
މާލެއާއި ވިލިމާލޭގެ މަގުތައް ހެދުމުގެ މަޝްރޫއަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު މި އަހަރުގެ ޖަނަވަރީގައި ޗައިނާއަށް ކުރެއްވި ފުރަމާނަ ދަތުރުފުޅުގައި އެ ގައުމުގެ ރައީސް ޝީ ޖިންޕިންއާ ކުރެއްވި މަޝްވަރާތަކުގެ ތެރެއިން ޗައިނާގެ ހިލޭ އެހީގައި ހިންގުމަށް އެއްބަސްވެވުނު މަޝްރޫއެކެވެ.
މި މަޝްރޫއު ކުރިއަށްގެންދިއުމަށް ޗައިނާއިން ޖުމްލަ 130 މިލިއަން އެމެރިކާ ޑޮލަރު (ދެ ބިލިއަން ރުފިޔާ) ހިލޭ އެހީގެ ގޮތުގައި ދިނުމަށްވަނީ ނިންމާފަ އެވެ.
ފާއިތުވި އާދީއްތަދުވަހު މި މަޝްރޫއަށް ހަދަންޖެހޭ ސާވޭ ހެދުމަށް ޗައިނާގެ ފަންނީ ޓީމެއް ރާއްޖެއަށް އައިސްފަައިވެ އެވެ. އެ ޓީމާއެކު ކޮންސްޓްރަކްޝަން މިނިސްޓްރީގެ ފަންނީ ޓީމުން ބައްދަލުކޮށް މަސައްކަތް ކުރިއަށްގެންދާނެ ގޮތާމެދު މަޝްވަރާކޮށްފައިވެ އެވެ.
މަޝްރޫއު ހިންގުމަށް ބޭނުންވާ ސާވޭ ހެދުމާއި ބޭނުންވާ މައުލޫމާތު އެއްކުރުމުގެ މަސައްކަތް މިއަދުން ފެށިގެން މި މަހުގެ 21 ވަނަ ދުވަހުގެ ނިޔަލަށް ކުރިއަށްދާނެ ކަމުގައި މިނިސްޓްރީން ބުނެފައިވެ އެވެ. އަދި މަގުތަކުގެ ޑިޒަައިން ތައްޔާރުކުރާނީ މި ސާވޭއިން އެއްކުރާ މައުލޫމާތުގެ މައްޗަށް ބިނާކޮށެވެ.
މިސާވޭގައި އެއްކުރާ މައުލޫމާތަކީ މި މަޝްރޫއު ފަރުމާކޮށް، މަޝްރޫއުގެ މަސައްކަތްތައް ކުރިއަށްގެންދާނެ ގޮތް ރާވައި އިންތިޒާމުކުރުމަށް ބޭނުންވާ މުހިއްމު މައުލޫމާތުތަކެވެ.
މާލޭގެ ގިނަ މަގުތަކަކީ ރައީސް އަލްއުސްތާޛު މައުމޫން އަބްދުލްގައްޔޫމުގެ ވެރިކަމުގައި ހެދި މަގުތަކެކެވެ. އޭގެ ފަހުން އިތުރަށް މަރާމާތުކޮށް އަލަށް ހަދާފައިވަނީ ރައީސް އަބްދުﷲ ޔާމީނުގެ ވެރިކަމުގައި ހެދި މަޖީދީމަގާއި ބޮޑުތަކުރުފާނުގެ މަގުގެ އިތުރަށް ރައީސް އިބްރާހީމް މުހައްމަދު ސޯލިހުގެ ވެރިކަމުގައި ހެދި އަމީނީމަގެވެ.
ގައު އަޅައިގެން ހަދާފައިވާ މަގުތައް ބާވެ މަގުތަކަށް ބޮޑެތި ގެއްލުންތައް ލިބިފައިވާއިރު މަގުތައް ފަރުމާކޮށްފައި ހުރި ގޮތުންނާއި ވަޅުލާފައިވާ ނަރުދަމާއާއި ފެން ހިންދުމުގެ ނިޒާމުތައް މާލޭގެ އާބާދީއާ އެކަށޭނެ މިންވަރަށް އަދާހަމަކުރެވިފައިނުވާތީ ގިނަ މައްސަލަތައް އަންނަނީ ކުރަމަތިވަމުންނެވެ.
ސަރުކާރުން ބުނެފައިވާ ގޮތުން ޗައިނާގެ ހިލޭ އެހީގައި ހިންގާ މަގުހެދުމުގެ މަޝްރޫއުގެ ސަބަބުން މާލޭގެ މަގުތަކަށް ކުރިމަތިވެފައިވާ ގިނަ މައްސަލަތައް ހައްލުކުރެވޭނެ އެވެ. އެގޮތުން އެ މަޝްރޫއު ނިމޭއިރު މާލޭގައި ފެންބޮޑުވުމުގެ މައްސަލައަށް ދާއިމީ ހައްލެއް ލިބޭނެ ކަމަށް ސަރުކާރުން ބުނެފައިވެ އެވެ.
ކޮމެންޓް
Republic of Maldives