އެކުއިޒިޝަން ކޯސްޓުގެ ގޮތުގައި ލިބުނު އާމްދަނީ ދެގުނަ އިތުރުވެއްޖެ

ފަތުރުވެރިކަމުގެ ބޭނުމަށް ދޫކުރާ ފަޅާއި ފަޅުރަށްތަކުގެ އެކުއިޒިޝަން ކޯސްޓުގެ ގޮތުގައި ދައުލަތަށް ލިބުނު އާމްދަނީ ފާއިތުވި އަހަރަށްވުރެ ދެގުނަ އިތުރުވެފައިވާކަމަށް މީރާގެ ހިސާބުތަަކުން ދައްކައިފި އެވެ. 

މީރާއިން ކޮންމެ މަހަކު އާންމުކުރާ އާމްދަނީގެ ހިސާބުތައް ދައްކާ ގޮތުން ނިމުނު އަހަރުގެ ސެޕްޓެންބަރު މަހުގައި އިކުއިޒިޝަން ކޯސްޓުގެ ގޮތުގައި ދައުލަތަށް އެއްވެސް އާމްދަނީއެއް ނުލިބެ އެވެ. މި އަހަަރުގެ ސެޕްޓެންބަރު މަހުގައި 4،566،000 (ހަތަރު މިލިއަން ފަސްލައްކަ ފަސްދޮޅަސް ހަހާސް) ޑޮލަރު ލިބިފައިވެ އެވެ. އެއީ 69.9 މިލިއަން ދިވެހި ރުފިޔާ އެވެ. 

އެކުއިޒިޝަންގެ ގޮތުގައި ލިބުނު އާމްދަނީގެ އިތުރަށް ޓޫރިޒަމށް ދޫކޮށްފައިވާ ތަންތަނުގެ ލީސް މުއްދަތު އިތުރުކުރުމަށް ނަގާ ފީގެ ގޮތުގައިވެސް ސެޕްޓެންބަރު މަހު 15 މިލިއަން ޑޮލަރު ނުވަތަ 229.9 މިލިއަން ރުފިޔާ ދައުލަތަށް ލިބުނެވެ. 2023 ވަނަ އަހަރުގެ ސެޕްޓެންބަރު މަހު ލީސް މުއްދަތު އިތުރުކުރުމުގެ ފީގެ ގޮތުގައިވެސް އެއްވެސް އާމްދަނީއެއް ލިބިފައި ނެތެވެ. 

މީރާގެ ހިސާބުތައް ދައްކާ ގޮތުން އެކުއިޒިޝަން ކޯސްޓުގެ ގޮތުގައި މި އަހަރުގެ ސެޕްޓެންބަރު މަހުގެ ނިޔަލަށް ޖުމްލަ 6.3 މިލިއަން ޑޮލަރު ލިބިފައިވެ އެވެ. ނިމުނު އަހަރު ލިބިފައިވަނީ 2.9 މިލިއަން ޑޮލަރެވެ. އެހެންކަމުން މި އަހަރު އެކުއިޒިޝަން ކޯސްޓުގެ ގޮތުގައި ލިބުނު އާމްދަނީވަނީ ދެގުނަ އިތުރުވެފަ އެވެ. 

ފަތުރުވެރިކަމުގެ ބޭނުމަށް ރަށްތަކެއް ދޫކުރަން ކުރީ ސަރުކާރުގައި މަސައްކަތްކުރި ނަމަވެސް އެއިރު ދޫކުރެވުނީ އެންމެ ދެ ރަށެވެ. މި އަހަރު ތެރޭގައި އެކަނި މި ސަރުކާރުން ބާޒާރަށް ނެރުނު ރަށްތަކާއި ފަޅުތަކުގެ ތެރެއިން ބައެއް ރަށްތައް މިހާރުވަނީ ވިކިފަ އެވެ.