ޓުރަމްޕަށް މަރުހަބާ ވިދާޅުވެ އެކުގައި މަސައްކަތްކުރައްވަން ބޭނުންފުޅުވާކަން ހާމަކުރައްވައިފި

އެމެރިކާގެ އިންތިހާބީ ރައީސް އަދި އެ ގައުމުގެ ކުރީގެ ރައީސް ޑޮނާލްޑް ޓްރަމްޕަށް މަރުހަބާ ވިދާޅުވެ އެކުގައި މަސައްކަތްކުރައްވަން ބޭނުންފުޅުވާކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ހާމަކުރައްވައިފި އެވެ. 

ޓުރަމްޕުވަނީ އިންތިހާބު ކާމިޔާބުކުރެއްވިފައިވާކަން އިއުލާނު ކުރައްވާފަ އެވެ. ރަސްމީކޮށް އިންތިހާބުގެ ނަތީޖާ ހާމަނުކުރި ނަމަވެސް މިހާތަނަށް ހާމަކޮށްފައިވާ ނަތީޖާތަކަށް ބަލާއިރު ޓުރަމްޕާ ވާދަކުރައްވާ ނައިބުރައީސް ކަމަލާ ހެރިސްއަށް ދެން ޓުރަމްޕުގެ މައްޗަށް ކުރިނުހޯއްދެވޭނެކަމަށް ނަންބަަރުތަކުން ފެނެ އެވެ.

އިއްޔެ ބޭއްވި އިންތިހާބުގެ ނަތީޖާތައް އިއުލާނުކުރަން ފެށުމާއެކު ދުނިޔޭގެ އެކި ގައުމުތަކުގެ ލީޑަރުން ގެންދަވަނީ ޓުރަމްޕަށް މަރުހަބާ ވިދާޅުވެ، އެމަނިކުފާނާއެކު މަސައްކަތްކުރުމަށް ޝައުގުވެރިވެވަޑައިގަންނަވާކަން ހާމަކުރައްވަމުންނެވެ.

ރައީސް މިއަދު ކުރެއްވި ޓުވީޓެއްގައި ވިދާޅުވީ އިންތިހާބުގައި ޓުރަމްޕަށް ލިބިވަޑައިގެންނެވި ކާމިޔާބަށް މަރުހަބާ ވިދާޅުވާ ކަމަށެވެ. އަދި އެމެރިކާއާއި ދިވެހިރާއްޖޭގެ މެދުގައި، އެއް ގައުމުން އަނެއް ގައުމަށް އިހުތިރާމުކުރުމާއި ހެޔޮ ނިޔަތް އޮތުމާއި ފަހުމުވުމުގެ މައްޗަށް ވިނާވެފައިވާ ވަރުގަދަ ގުޅުމެއް އޮތްކަމަށް ރައީސް ވިދާޅުވި އެވެ. 

ރައީސް އިތުރަށް ވިދާޅުވީ އެމެރިކާއާއެކު އޮތް އެކުވެރިކަމުގެ ގުޅުން އިތުރަށް ބަދަހިކުރައްވައި ދެ ގައުމުން ހިއްސާކުރަނަވި ގޮންޖެހުންތަކުން އަރައިގަތުމުގައި އެކީ މަސައްކަތްކޮށް ދުނިޔޭގައި ސުލްހައާއި ފުދުންތެރިކަން ކުރިއެރުވުމަށް އެކުއެކީ މަސައްކަތްކުރައްވަން ބޭނުންފުޅުވާ ކަމަށެވެ. 

ރައީސް މުއިއްޒު ވެރިކަމަށް ވަޑައިގެންނެވިފަހުން ދުނިިޔޭގެ އެކި ބާރުތަކާއެކު އެއްހަމައަކުން ގާތް ގުޅުންތައް ގާއިމުކުރެއްވުމަށް ގެންގުޅުއްވާ ސިޔާސަތުގެ ތެރެއިން އެމެރިކާއާއެކު އޮތް ގުޅުންވަނީ ބަދަހިކުރައްވާފަ އެވެ. 

ނަތީޖާއެއްގެ ގޮތުން އެމެރިކާއިން ރާއްޖެއަށް ފޯރުކޮށްދޭ އެހީތެރިކަން އިތުރުކޮށް، ދެ ގައުމުގެ މެދުގައި ޑިޕްލޮމެޓިކް ފެންވަރުގައި ކުރިން ނެތް މިންވަރުގެ ގާތްކަމެއް މިހާރު އޮތީ އުފެދިފަ އެވެ.