ކައުންސިލްތަކުގެ ބްލޮކް ގްރާންޓް އިތުރު ކުރަނީ

ލޯކަލް ކައުންސިލް ތަކަށް ދައުލަތުގެ އަންނަ އަހަރުގެ ބަޖެޓުން ބްލޮކް ގްރާންޓްގެ ގޮތުގައި ދޭ އަދަދު ކޮންޓިންޖެންސީ ބަޖެޓުގެ ތެރެއިން އިތުރު ކޮށްދިނުމަށް ފިނޭންސް މިނިސްޓަރު މޫސާ ޒަމީރު ރައްޔިތުންގެ މަޖިލީހަށް ލަފާ ދެއްވައިފި އެވެ.

ސަރުކާރުން އަންނަ އަހަރަށް ލަފާކޮށް ހުށަހެޅި ބަޖެޓުގައި ކައުންސިލްތަކުގެ ބްލޮކް ގްރާންޓުގެ ގޮތުގައި ހިމަނާފައި ވަނީ 1.4 ބިލިއަން ރުފިޔާ އެވެ. އެކަމަކު ކޮންޓިންޖެންސީ ބަޖެޓުގެ ތެރެއިން 699.6 މިލިއަން ރުފިޔާ ހަމަޖައްސައިދިނުމަށް މިއަދު މަޖިލީހަށް ފޮނުއްވި ސިޓީއެއްގައި މިނިސްޓަރު ވަނީ އެދިވަޑައިގެންފަ އެވެ. އެހެންކަމުން ސަރުކާރުން ކައުންސިލްތަކަށް ކަނޑައަޅާފައިވާ ބްލޮކް ގްރާންޓް، 2.1 ބިލިއަން ރުފިޔާ އަށް އިތުރުވެގެން ދާނެ އެވެ.

މަޖިލީހަށް ފިނޭންސް މިނިސްޓަރު ފޮނުއްވި ސިޓީގައި ބަޔާންކުރައްވާފައި ވަނީ، އެގޮތަށް ހުށަހެޅުއްވީ ބަޖެޓުގައި ބްލޮކް ގްރާންޓް ހިސާބު ކުރުމުގައި ލާމަރުކަޒީ ގާނޫނުގައި ކަނޑައަލާފައިވާ މިންގަނޑުގައި ހިފަހައްޓުމަށް ކަމަށެވެ. ސިޓީގައި މިނިސްޓަރު އެދިވަޑައިގެންފައި ވަނީ ބަޖެޓުގެ ޖުމްލަ އަދަދު އިތުރުނުވާ ގޮތަށް ކޮންޓިންޖެންސީ ބަޖެޓުން ކައުންސިލްތަކުގެ ބްލޮކް ގްރާންޓަށް ބަދަލު ގެނައުމަށެވެ.

މަޖިލީހުގެ ރިޔާސަތުން ވަނީ އެ ސިޓީ ބަޖެޓު ދިރާސާ ކުރާ ކޮމިޓީ އަށް ފޮނުވާފަ އެވެ.

ކައުންސިލްތަކުގެ ބްލޮކް ގްރާންޓް ބޮޑު ކުރަން ނިންމާފައި މިވަނީ ކައުންސިލްތަކުން އެކަމާ ގުޅިގެން ކަންބޮޑުވުން ފާޅުކުރަން ފެށުމުންނެވެ.