ފްލެޓް ލިސްޓް ބާތިލެއް ނުކުރެވޭނެ، އެއީ ދައުލަތާއެކު އޮތް އަހުދެއް: ޔާމީން

ފްލެޓް ލިބޭނެ ކަމުގެ ޔަގީންކަން ދީ ސަރުކާރުން ލިޔުންދީފައިވާ ބަޔަކާމެދު ބޭނުންހާ ގޮތަކަށް އަމަލު ނުކުރެވޭނެ ކަމަށާ ސަރުކާރުން ބޭނުން ނުވުމުން ފްލެޓް ލިސްޓު ބާތިލު ކުރުމަކީ ކުރެވޭނެ ކަމެއް ނޫން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.

ރައީސް ސޯލިހްގެ ސަރުކާރުން ފެށި ގެދޮރުވެރިޔާ ސްކީމުގެ ދަށުން 15،000 އަށްވުރެ ގިނަ ފަރާތުންވަނީ ފުލެޓު ހޯދުމަށް ހުށަހަޅާފަ އެވެ. އެއިން 9،000 މީހުން ފުލެޓަށް ޝަރުތު ފުރިހަމަވާކަމަށް އެމްޑީޕީ ސަރުކާރުގައި ނިންމި އެވެ. އަދި ފަހި ދިރިއުޅުން ކޯޕަރޭޝަނުން އަޅަމުންދާ 4،000 ފުލެޓުގެ ހައްގުވެރިންގެ ލިސްޓެއްވެސް އެއިރު އާންމުކުރި އެވެ.  

ނަމަވެސް އެ 4،000 ފުލެޓުގެ ހައްގުވެރިން ކަނޑައަޅައި އާންމުކުރި ލިސްޓުގައި ގިނަ މައްސަލަތަކެއް ހުރިކަން އޭސީސީން ފާހަގަކުރުމާއެކު، އެ ފަރާތްތަކަށް ފުލެޓު ދޫކުރުން މެދުކެނޑިގެން ދިޔަ އެވެ. އެއަށްފަހު މި ސަރުކާރުން އެ ލިސްޓު އެވެލުއޭޓުކުރުމުގެ މަސައްކަތް ފެށި އެވެ. އެ މަސައްކަތް ކުރާތާ މަސްތަކެއް ވެއްޖެ އެވެ.

ސަރުކާރުގެ ވިސްނުން ހުރީ ފްލެޓް ލިސްޓަށް ބޮޑު ބަދަލެއް ގެނައުމަށް ކަމަށް ބެލެވެ އެވެ. އެކަމާ މެދު ފްލެޓް ލިބުނު މީހުންގެ ބޮޑު ކަންބޮޑުވުމެއް އެބަ އޮތެވެ.

އެކަމަށް އިޝާރާތް ކުރައްވާ ފްރަންޓް އޮފީސް ޖަލްސާގައި ރައީސް ޔާމީން ރޭ ވިދާޅުވީ ފްލެޓް ލިބުނު މީހުންނާއެކު ސަރުކާރުން އެއްބަސްވުމެއް ހަދާފައިވާ ކަމަށާ އެކަން އެހެން އޮއްވާ ދެން އަންނަ ސަރުކާރަކަށް އެކަން ބަދަލު ނުކުރެވޭނެ ކަމަށެވެ. އަދި މައްސަލަ ބެލުމަށް ފަހު ލިސްޓް ބާތިލުކުރަން އޭސީސީން ބުނާނަމަ އެކަމުގެ ފުރިހަމަ ހަގީގަތް ބުނެދޭން ޖެހޭނެ ކަމަށެވެ.

"އެއީ ފްލެޓް ލިބުނު މީހުންނާއި ސަރުކާރާމެދު އޮތް އަހުދެއް. ދެން އެހެން ސަރުކާރެއް އައިސް އެކަން ބަލަނީ ކަމުގައި ބުނެ ހައިދަރު [ހައުސިން މިނިސްޓަރު] މި ބުނަނީ ކީއްހެއްޔޭ. އެހެނެއް ނުހެދޭނެއޭ. ސަރުކާރަކާ އެކީ އޮންނަ އެގްރީމަންޓަކީ ބައިންޑިން އެގްރީމަންޓެއް،"

ޔާމީން ވިދާޅުވީ މިހާރު އަމަލު ކުރަމުންދާ ގޮތުން މިނިސްޓަރު ހައިދަރުގެ މައްސަލަ ބަލަން ޖެހޭ ކަމަށެވެ. އަދި ފްލެޓް ލިސްޓް ހިފަހައްޓާ، ބަދަލު ކުރުމަކީ ކުރެވިގެން ވާނެ ކަމެއް ނޫން ކަމަށް ވިދާޅުވި އެވެ.

ހައުސިން މިނިސްޓްރީން ކުރީން ބުނެފައިވަނީ މިދިޔަ އޮކްޓޯބަރު މަސް ނިމުމުގެ ކުރިން ފުލެޓު ހައްގުވެރިންގެ ލިސްޓު އެކުލަވައިލާ އާންމުކުރާނެ ކަމަށެވެ. އެކަން ތަކުރާރުކޮށް އިއުލާނު ވެސް ކުރި އެވެ. ނަމަވެސް ފުލެޓު ލިބޭ މީހުންގެ ލިސްޓު ބެލުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ލަފާފުޅުގެ މަތިން އެކުލަވައިލި ކޮމިޓީން އެވިލުއޭޓުކޮށް އެކުލަވައިލި ލިސްޓު ކަމުނުދާ ކަމަށް ބުނެ އެންމެ ފަހު ވަގުތު ނިންމީ ލިސްޓް އާންމު ކުރުން ފަސްކުރާށެވެ.