ލަގެޖުން ޑްރަގް ފެނިގެން މީހަކު ހައްޔަރު ކޮށްފި

މަސްތުވާތަކެތި ފެނުނު ލަގެޖަކީ އޭނާގެ އެއްޗެއް ނޫން ކަމަށާއި އެއީ އޭނާ އާއެކު އެ ފްލައިޓުން އައި އެހެންމީހެއްގެ ލަގެޖެއް ކަމަށް މަސްތުވާތަކެއްޗާއެކު ހައްޔަރުކުރި މީހަކު ކޯޓުގައި ބުނެފި އެވެ.

ރާއްޖެއަށް މަސްތުވާތަކެތި އެތެރެކުރި މި މައްސަލައިގައި ހައްޔަރުކޮށްފައިވަނީ ތ. ކަނޑުދޫ، މިދިލިމާގެ، ޔޫސުފް ޝާހީން 33އ، ކިޔާ މީހެކެވެ.

އޭނާ ބަންދު ކުރުމަށް ކުރި އަމުރުގައި ބުނެފައިވަނީ ތުހުމަތު ކޮށްފައިވާ ކުށް މީނާ ކުރިކަމަށް ތުހުމަތު ކުރެވޭ ކޮންމެވެސް މިންވަރެއްގެ ހެކި ގަރީނާ ހުށަހަޅާފައިވާ ކަމަށެވެ. އެގޮތުން ސީނަށް ދިޔަ ފުލުހަކާއި ކަސްޓަމް އޮފިސަރެއްގެ ބަޔާނާއި، ސީންގެ ފޮޓޯ ހުށަހަޅާފައިވާ ކަމަށް އަމުރުގައި ވަނ ބުނެފައެވެ.

އަމުރުގައި ވާގޮތުން، އޭނާ ގެންގުޅުނު ލަގެޖަކީ އޭނާ އާ އެކު އެ ފްލައިޓުން ދަތުރުކުރި އެހެން މީހެއްގެ ލަގެއްޖެއް ކަމަށާއި އެމީހާވެސް މި ފްލައިޓުން އައި ކަމަށް ކޯޓުގައި ބުނެފައިވެއެވެ. އަދި އޭނާ އަކީ ކުށުގެ ރެކޯޑެއް ނެތްތާ ގިނަ ދުވަސްވެފައިވާ ވަޒީފާ އަދާކުރަމުންދާ މީހެއް ކަމަށްވެސް އަމުރުގައިވެއެވެ.

ކޯޓުން މިއަދު އަމުރުކޮށްފައިވަނީ 20 ދުވަހުގެ މުއްދަތަށް އޭނާ ބަންދުގައި ބަހައްޓައިގެން މައްސަަލައިގެ ތަހުގީގު ހިންގުމަށެވެ. 

އަމުރުގައިވާ ގޮތުން މި ލަގެޖު އިނީ އޭނާގެ ނަންމަތީގައެވެ. އަދި އޭގެއިން ކިލޯއެއްގެ މަސްތުވާތަކެތި ވަނީ ފެނިފައިވާ ކަމަށާއި ކޮންޓްރޯލް ޑެލިވަރީއަށް އެއްބާރލުން ދީފައިވާ ނުވާ ކަމަށް އަމުރުގައިވެއެވެ.

މި މައްސަލައިގައި އިތުރި ފަރާތެއްގެ ބައިވެރިވުން އޮތްތޯ ތަހުގީގު ކުރަމުންދާ މައްސަލަ ބަލާ އިންވެސްޓިގޭޝަން އޮފިސަރު ވަނީ ފާހަގަކޮށްފައެވެ