މި ސަރުކާރަކީ ކޮރަޕްޝަނަށް ދޫދޭނެ ސަރުކާރެއް ނޫން: އަޒާން
އަޒާން ފާހަގަކުރެއްވި ގޮތުގައި ނުހައްގު މުއްސަނދިކަން ހުއްޓުވުމަށް މި ސަރުކާރުން މުހިއްމު ތިން ބިލެއް ހުށަހަޅަން ތައްޔާރުވަމުންދެ އެވެ. އެހެންކަމުން މި ސަރުކާރުން ކޮރަޕްޝަނާއި ވައްކަމަށް ފުރުސަތު ނުދޭނެކަން ފެންނަކަމަށް އޭނާ ވިދާޅުވި އެވެ.
މިހާރު މިއޮތް ސަރުކާރަކީ ކޮރަޕްޝަނާއި ފަސާދައިގެ އަމަލުތަކަށް ދޫދޭނެ ސަރުކާރެއް ނޫންކަމަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަހްމަދު އަޒާން މަރުޒޫގު ވިދާޅުވެއްޖެ އެވެ.
އަޒާނު މިފަދައިން ވިދާޅުވީ ދައުލަތުގެ މަގާމުތަކުގައި ތިއްބަވާ ބޭފުޅުން މަގާމުގެ ބޭނުންކުރައްވައިގެން ހޯއްދަވާ ނުހައްގު މުއްސަނދިކަމާ ގުޅިގެން ދައުވާކުރުމަށް ގާނޫނުލް އުގޫބާތުގައި ހިމަނާފައިވާ 115 ވަނަ މާއްދާ އިސްލާހުކުރުމަށް ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހަޅާފައިވާ އިސްލާހަށް ބަހުސްކުރައްވަމުންނެވެ.
ސަރުކާރުގެ ފަރާތުން ގުރައިދޫ ދާއިރާގެ މެންބަރު ހުސައިން ރިޒާ ހުށަހަޅުއްވާފައިވާ އިސްލާހުގައި މައިގަނޑު ގޮތެއްގައި ގެންނަ ބަދަލުތަކުގެ ތެރޭގައި ނުހައްގު މުއްސަނދިކަން ހޯދައިގެން ދައުވާކުރެވޭނީ ޖިނާއީ ބޮޑު ކުށެއް ކޮށްގެން ނުހައްގު މުއްސަނދިކަން ހޯދުމުންކަމަށް ކަމުގައި ބަޔާންކުރާ މާއްދާ ބަދަލުކޮށް ޖިނާއީ ބޮޑު ކުށެއް ނުކޮށް ނަމަވެސް ނުހައްގު މުއްސަނދިކަމެއް ހޯދައިފިނަމަ އެ މާއްދާގެ ދަށުން ދައުވާކުރެވޭ ގޮތަށް ބަދަލުކުރުން ހިމެނެ އެވެ.
އޭގެ އިތުރަށް ރައީސުލްޖުމްހޫރިއްޔާއާއި ވަޒީރުންނާއި ރައްޔިތުންގެ މަޖިލީހުގެ މެންބަރުންގެ މަގާމުގައި ތިއްބަވައިގެން ނުހައްގު މުއްސަނދިކަން ހޯދާ ފަރާތްތަކުގެ މައްޗަށް 15 އަހަރުގެ ޖަލު ހުކުމެއް އިއްްވޭ ގޮތަށް އެ މާއްދާ އިސްލާހުކުރަން ސަރުކާރުން ހުށަހަޅާފައިވެ އެވެ.
އެ ބިލުގެ ބަހުސްގައި ދެއްކެވި ވާހަކަފުޅުގައި އަޒާން ފާހަގަކުރައްވާފައިވަނީ 19 ވަނަ މަޖިލީހުން އެ މާއްދާ ފާސްކުރިއިރު ކޮށްފައިވަނީ ނަމެއްގައި ކަމެވެ. އެއިރު މާއްދާ ފަރުމާކޮށްފައި އޮތް ގޮތުން ނުހައްގު މުއްސަނދިކަން ހޯދުމުގެ މައްސަލަތަކުގައި ދައުވާކުރުމަށް ބޮޑެތި ހުރަސްތަކެއް ހުރިކަން އަޒާން ފާހަގަކުރެއްވި އެވެ.
އެގޮތުން އެއިރު މާއްދާ އޮތް ގޮތުން ނުހައްގު މުއްސަނދިކަމެއް ހޯދައިފިނަަމަ އެއީ ޖިނާއީ ބޮޑު ކުށެއް ކޮށްގެން ހޯދި މުއްސަނދިކަމެއްކަން ސާބިތުކޮށްދެވޭ މިންވަރަށް ހެކި ހުންނަންޖެހޭކަން ފާހަގަކުރައްވަމުން އަޒާން ވިދާޅުވީ ނުހައްގުން މުއްސަނދިވަނީ ޖިނާއީ ބޮޑެތި ކުށްތައް ހިންގަައިގެން ނޫން ކަމަށެވެ.
"ނުހައްގުން މުއްސަނދިވަނީ ޖިނާއީ ބޮޑެތި ކުށްތައް ކޮށްގެން އެކަންޏެއް ނޫން. އާއްމު ގޮތެއްގައި ދައުލަތުގެ ބޮޑެތި މަގާމުތަކުގައި ތިއްބަވާ ބޭފުޅުން ނުހައްގުން މުއްސަނދިވަނީ އެ ކެޓަގަރީއަށް ނުފެތޭ ކުށްތައް ކޮށްގެން. މިހާރު ގާނޫނު އޮތް ގޮތުން އެއްވެސް ކަމެއް ސާބިތުކޮށްދެވޭނެ ގޮތެއް ނެތް.،" އަޒާން ވިދާޅުވި އެވެ.
އަޒާން ފާހަގަކުރެއްވި ގޮތުގައި މިހާރު ގާނޫނަށް ގެންނަ އިސްލާހުގެ ސަބަބުން ނުހައްގުން މުއްސަނދިވުމުގެ މައްސަލަތަކުގައި ދައުވާކޮށް ކުށް ސާބިތުކުރަން ފަސޭހަވާނެ އެވެ.
މިހާރު ގާނޫނަށް ގެންނަ ބަދަލާއެކު ދައުލަތުގެ މުހިއްމު މަގާމުތަކުގައި ތިއްބަވާ ބޭފުޅުން ހޯއްދަވާ ނުހައްގު މުއްސަނދިކަމުގެ މައްސަލަތައް ބެލުމަށް މަގުފަހިވާނެކަން ފާހަގަކުރައްވައި އަަޒާން ވިދާޅުވީ އޭނާ ދެކެވަޑައިގަންނަވަން ބޭނުންވަނީ ސިންގަޕޫރު ފަދައިން ރާއްޖޭގައިވެސް ދައުލަތުގެ ބޮޑުން ހިންގާ ކުދިކުދި ކޮރަޕްޝަނުގެ މައްސަލަތައްވެސް ބެލި ދައުވާކުރެވޭ ދުވަސް ކަމަށެވެ.
މިހާރު ހުށަހަޅާފައިވާ އިސްލާހުގެ އިތުރަށްވެސް މުހިއްމު ގާނޫނުތަކެއް ބޭނުންވާކަން ފާހަގަކުރައްވަމުން އަޒާން ވިދާޅުވީ އެސެޓް ޑިކްލަރޭޝަން ބިލެއްވެސް ފަރުމާކުރަމުންދާކަމަށް ބަންޑާރަނައިބުގެ އޮފީހުން މައުލޫމާތު ދީފައިވާ ކަމަށެވެ. އޭގެ އިތުރަށް ނުހައްގު މުއްސަނދިކަން ހޯދުމަކީ ހުރިހާ ރައްޔިތުންގެ މައްޗަށްވެސް މަނާކުރަންޖެހޭކަމެއްކަން ފާހަގަކުރައްވަމުން އެކަމަށް ބޭނުންވާ ގާނޫނުވެސް ސަރުކާރުން ހުށަހަޅަން ތައްޔާރުވަމުންދާކަމަށް އަޒާން ވިދާޅުވި އެވެ.
"މިއަދުގެ ސަރުކާރަކީ ވައްކަމާއި ކޮރަޕްޝަނަށް ދޫދޭނެ ސަރުކާރެއް ނޫން. އަދި މިއަދުގެ ރައްޔިތުންގެ މަޖިލީހުންވެސް އެކަންކަމަށް ޖާގައެއް ނުދޭނެ،" އަޒާން ވިދާޅުވި އެވެ.
ކޮމެންޓް
Republic of Maldives