ވިޔަފާރިއަށް ފަހިކަން ހޯދަން ތުރުކީ-ރާއްޖެ މިނިވަން ވިޔަފާރީގެ އެއްބަސްވުމަކަށް
މި އެއްބަސްވުމުގެ ސަަބަބުން އެންމެ ބޮޑު ފައިދާއެއް ކުރާނީ މަސްވެރިކަމަށެވެ. މީގެ އިތުރުން 100 އަށްވުރެ ގިނަ ބާވަތަކުން ޑިއުޓީ ބޮޑުތަނުން ލުއި ވެގެންދާނެ އެވެ.
ރާއްޖޭގެ ވިޔަފާރިއަށް ފަހިކަން ލިބޭނެ ގިނަ ބައިތަކެއް ހިމެނޭ ތުރުކީ-ރާއްޖެ މިނިވަން ވިޔަފާރީގެ އެއްބަސްވުމުގައި މިއަދު ސޮއިކޮށްފި އެވެ.
ރާއްޖޭގެ މަހުގެ އިތުރުން ދިވެހި ގިނަ އުފެއްދުންތަކަކަށް ތުރުކީގެ މާކެޓުން ޖާގަ ލިބިގެންދާނެ މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ އިކޮނޮމިކް މިނިސްޓަރު މުހައްމަދު ސައީދު އެވެ. އަދި އެ ގައުމުގެ ޓްރޭޑް މިނިސްޓަރު ޕްރޮފެސާ ޑރ. އޮމާރު ބޮލަޓް އެވެ.
ރާއްޖެ-ތުރުކީ މިނިވަން ވިޔަފާރީގެ އެއްބަސްވުމަކަށް ގޮސްފައިވަނީ ރައީސް ޑރ. މުހައްމަދު މުއިއްޒު މިދިޔަ އަހަރުގެ ނޮވެމްބަރު މަހު ތުރުކީ އަށް ކުރެއްވި ފުރަމާނަ ދަތުރުފުޅުގައި ކުރެއްވި މަޝްވަރާގެ ތެރޭންނެވެ. ތުރުކީގެ ބޮޑު ވަޒީރު ތައްޔިބު އުރުދުޣާން އާ އެކު ކުރެއްވި މަޝްވަރާއަށްފަހު ސަރުކާރުން ވަނީ މި އެއްބަސްވުމުގައި ސޮއިކުރުމުގެ މަސައްކަތް ފަށާފަ އެވެ.
މި އެއްބަސްވުމާ ބެހޭ ގޮތުން އިކޮނޮމިކް މިނިސްޓްރީން ބުނީ މި އެއްބަސްވުމުގެ ދަށުން ތުރުކީއަށް އެކްސްޕޯޓު ކުރާ މަހުގެ ބާވަތްތަކަށް ލުއި ލިބުމާ އެކު ދިވެހި މަސް އެކްސްޕޯޓު ކުރާ ފަރާތްތަކަށް ތުރުކީ މާކެޓްގައި ވިޔަފާރި ފުޅާ ކުމުގެ ފުރުސަތު ފަހިވެގެންދާނެ ކަމަށެވެ. މީގެއިތުރުން، މި އެއްބަސްވުމާއެކު ދެ ގައުމުގެ ދެމެދު ކުރެވޭ ވިޔަފާރީގެ ހުރަސްތައް ކުޑަ ކުރެވި، ވިޔަފާރީގެ ގުޅުން ވަރުގަދަ ވުމުގެ އިތުރުން ދިވެހި ވިޔަފާރިތަކަށް ތުރުކީގެ އުފެއްދުންތައް އަގުހެޔޮކޮށް ލިބުމުގެ ފަހިވާނެ ކަމަށް އިކޮނޮމިކް މިނިސްޓްރީން ބުނެފައިވެ އެވެ.
ރާއްޖެއަށް ޑިއުޓީގެ ލުއި ލިބޭނެ ބާވަތްތައް
- ކާބޯ ތަކެތި
- މަހުގެ އުފެއްދުންތައް
- ސިނާއީ އަދި ކޮންސްޓްރަކްޝަން މެޓީރިއަލްސް
- މެރިން އަދި ޓްރާންސްޕޯޓް
- ގޭގައި ހިފާ ގެންގުޅޭ ތަކެތި
- ފަރުނީޗަރު
އިކޮނޮމިކް މިނިސްޓަރު ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ މި އެއްބަސްވުމުގެ ދަށުން 100 އަށް ވުރެ ގިނަ ބާވަތްތަކުން ޑިޔުޓީ ކުޑަވެގެން ވާނެ އެވެ. އަދި ތުރުކީއަށް ޑިއުޓީ ނުނަގައި ދިވެހި މަސް އެކްސްޕޯޓް ކުރުމުގެ ދޮރު ހުޅުވިގެންދާނެ ކަން ސައީދު ފާހަގަ ކުރެއްވި އެވެ.
ކޮމެންޓް
Republic of Maldives