ސިޔާސީ ޕާޓީތަކަށް ފައިސާ ދޭ އުސޫލަށް ބަދަލު ގެންނަން މަޖިލީހަށް

ސިޔާސީ ޕާޓީތަކަށް ފައިސާ ދޫކުރާ އުސޫލު ބަދަލުކޮށް، ބައެއް އިސްލާހުތައް ގެންނަން ސިޔާސީ ޕާޓީތަކުގެ ގާނޫނަށް އިސްލާހު ހުށަހަޅައިފި އެވެ. 

ސަރުކާރު ހިންގާ ޕާޓީ ޕީއެންސީގެ ރައްޔިތުން މަޖިލީހުގެ ދިއްދޫ ދާއިރާ ތަމްސީލް ކުރާ މެންބަރު އަބްދުލް ލަތީފު މުހައްމަދު ސްޕޮންސާކޮށްގެން މަޖިލީހަށް ހުށަހެޅި އިސްލާހުގައިވާ ގޮތުން ދައުލަތުގެ ބަޖެޓުން ޕާޓީތަކަށް ފައިސާ ދޫކުރާނީ އެ އަހަރަކަށް ކަނޑައަޅާ ދައުލަތުގެ ބަޖެޓުގެ އާމްދަނީގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދެކެވެ. 

މި ގާނޫނުގައި ކުރިން އޮންނަ ގޮތަކީ ދައުލަތުގެ ކޮންމެ އަހަރެއްގެ ބަޖެޓްގެ 0.1 ޕަސެންޓް ސިޔާސީ ޕާޓީތަކަށް ދޫކުރަން ޖެހެ އެވެ. މި ފައިސާ ދޫކުރަނީ ސިޔާސީ ޕާޓީތަކުގެ ތެރެއިން 10،000 މެމްބަރުން ހަމަވާ ޕާޓީތަކަށެވެ. 

ކިހާ ވަރެއް ހޭދަކުރޭ ؟ - ސިޔާސީ ޕާޓީތަކަށް ވޭތުވެދިޔަ 19 ވަރަކަށް އަހަރުތެރޭގައި ދޫކުރި ފައިސާގެ އަދަދު 350 މިލިއަން ރުފިޔާއަށްވުރެ ގިނަ އެވެ. މިދިޔަ އަހަރު ވެސް 37 މިލިއަން ރުފިޔާ ޕާޓީތަކަށް ދޫކޮށްފައިވެ އެވެ. 

މީގެ އިތުރުން ގެންނަ އިސްލާހާއެކު ދައުލަތުން ދޫކުރާ ފައިސާ ބަހައިލާނީ 3،000 މެންބަރުން ހަމަވާ ޕާޓީތަކަށް އެ ފައިސާގެ 25 އިންސައްތަ އަދި 10،000 މެންބަރުން ހަމަވާ ޕާޓީތަކަށް 25 އިންސައްތަ ލިބޭ ގޮތަށެވެ. ބާކީ ބައިގެ 30 އިންސައްތަ ބަހާނީ ރައްޔިތުންގެ މަޖިލީހުގެ އިންތިހާބުގައި ޕާޓީތަކަށް ލިބޭ ވޯޓުގެ ނިސްބަތަށް ބަލައިގެންނެވެ. އަދި 20 އިންސައްތަ ބަހާނީ ލޯކަލް ކައުންސިލު އިންތިހާބުގައި ޕާޓީތަކަށް ލިބޭ ވޯޓަށް ބަލައިގެންނެވެ. މިހެން ހެދުމުން ކުދި ޕާޓީތަކަށްވެސް ފައިސާ ލިބުމާއެކު ފައިސާގެ ބޮޑު ބައެއް ލިބުން އިންތިހާބުތަކުގައި ޕާޓީތަކުން ނެރޭ ނަތީޖާއަށް ބަރޯސާވާނެ އެވެ.