ފަހު ތިން މަހުގެ ގްރާފް | ޑޮލަރުގެ އާމްދަނީއަށް 11 ޕަސެންޓް އިތުރުވުމެއް

ނިމިދިޔަ ތިން ވަނަ ކުއާޓަރު ނުވަތަ "ތިން މަހުގެ ގްރާފް" ދައްކާ ގޮތުގައި ދައުލަތަށް ޑޮލަރުން ލިބުނު އާމްދަނީ ކުރީ އަހަރަށްވުރެ 11 ޕަސެންޓް އިތުރުވެއްޖެ އެވެ. 

ދައުލަތުގެ ޓެކްސް އިދާރާ މީރާގެ ރަސްމީ ހިސާބުތައް ދައްކާ ގޮތުގައި މިދިޔަ ތިން މަހު ދައުލަތަށް ޑޮލަރުން އާމްދަނީގެ ގޮތުގައި ވަނީ 240.65 މިލިއަން ޑޮލަރު ނުވަތަ ގާތްގަނޑަކަށް 3.69 ބިލިއަން ރުފިޔާ ލިބިފަ އެވެ. މި އަދަދަކީ މިދިޔަ އަހަރުގެ މި މުއްދަތުގައި ލިބުނު 236.02 މިލިއަން ޑޮލަރާ އަޅާ ބަލާއިރު 11 ޕަސެންޓް އިތުރުވުމެކެވެ. 

ނިމިދިޔަ ކުއާޓާގެ ހިސާބުތައް ދައްކާ ގޮތުގައި އެންމެ ބޮޑު އާމްދަނީއެއް ލިބުނީ ޓީޖީއެސްޓީގެ ގޮތުގަ އެވެ. މި އަހަރު 115 މިލިއަން ޑޮލަރުގެ އާމްދަނީއެއް ޖީއެސްޓީން  ލިބިފައިވެ އެވެ. ނަމަވެސް މިދިޔަ އަހަރު ޓީޖީއެސްޓީގެ ގޮތުގައި ލިބުނު އަދަދު އުޅެނީ 104.45 މިލިއަން ޑޮލަރުގަ އެވެ. މި އަހަރު ވަނީ ޓީޖީއެސްޓީގެ އާމްދަނީ 10.7 ޕަސެންޓް އިތުރުވެފަ އެވެ.

މި ހިސާބުތައް ދައްކާ ގޮތުން އިންކަމް ޓެކުހުގެ ޑޮލަރު އާމްދަނީ ވަނީ ދަށްވެފަ އެވެ. މި އަހަރު 33.23 މިލިއަން ޑޮލަރު ލިބުނު ނަމަވެސް މިދިޔަ އަހަރު 38.22 މިލިއަން ޑޮލަރު ލިބިފައިވެ އެވެ. މިއީ 13 ޕަސެންޓުގެ ދަަށްވުމެކެވެ. 

މި ކުއާޓަރުގައި ތިން މަހަށް ބަލާއިރު ޑޮލަރުގެ އާމްދަނީ ޖުލައި މަހު ވަނީ ދަށްވެފަ އެވެ. ނަމަވެސް  އޮގަސްޓް އަދި ސެޕްޓެމްބަރު މަހު އިތުރުވެފައިވެ އެވެ. ޖުލައި މަހު 75.77 މިލިއަން ޑޮލަރުގެ އާމްދަނީއެއް ލިބިފައިވެ އެވެ. މިއީ މިދިޔަ އަހަރުގެ ޖުލައި މަހު ލިބުނު 104.80 މިލިއަން ޑޮލަރާ އަޅާ ބަލާއިރު 27.7 ޕަސެންޓުގެ ދަށްވުމެކެވެ. މި އަހަރު އޮގަސްޓް މަހު 62.83 މިލިއަން ޑޮލަރު ލިބިފައިވާއިރު މިދިޔަ އަހަރުގެ އޮގަސްޓް މަހު ލިބުނީ 62.02 މިލިއަން ޑޮލަރެވެ. އަދި މި އަހަރުގެ ސެޕްޓެމްބަރު މަހު 102.05 މިލިއަން ޑޮލަރު އާމްދަނީގެ ގޮތުގައި ލިބިފައިވެ އެވެ. ނަމަވެސް މިދިޔަ އަހަރުގެ ސެޕްޓެމްބަރު މަހު ލިބިފައިވަނީ 50.06 މިލިއަން ޑޮލަރެވެ. މިއީ 103 ޕަސެންޓުގެ އިތުރުވުމެކެވެ.