މަސްތުވާތަކެތި އެތެރެކުރިކަމުގެ ތުހުމަތުގައި ތިން މީހަކު ހައްޔަރުކޮށް ބަންދަށް

ރާއްޖެއަށް މަސްތުވާތަކެތި އެތެރެކުރި ކަމުގެ ތުހުމަތުގައި ހައްޔަރުކުރި ތިން މީހަކު ބަންދުގައި ބޭތިއްބުމަށް ކްރިމިނަލް ކޯޓުން އަމުރުކޮށްފި އެވެ. 

މިއަދު ފުލުހުން ބުނެފައިވަނީ މި މައްސަލާގައި ހައްޔަރުކޮށްފައިވަނީ ހއ.ދިއްދޫ، ފާގަތިގެ، އަހްމަދު ނަސީރު (45 އ)އާއި، ގއ.ކަނޑުހުޅުދޫ، ނެސްޓު، އަލީ އައިހަމް (18 އ) އަދި ރޮހަމާން ބަންގްލަދޭޝް (29 އ) އެވެ. 

ފުލުހުން ބުނި ގޮތުގައި މި މައްސަލާގައި ހައްޔަރުކޮށްފައިވާ އަހްމަދު ނަސީރު ހައްޔަރުކުރީ ކަސްޓަމުން ފުލުހުންނާ ހިއްސާކުރި މައުލޫމާތަކާ ގުޅިގެން އޮކްޓޯބަރު 31 ވަނ ދުވަހުގެ ރޭ ވެލާނާ އިންޓަނޭޝަނަލް އެއާޕޯޓުންނެވެ. 

ދެން މި މައްސަލާގައި ހައްޔަރުކުރި ދެ މީހުންނަކީ ފުލުހުންގެ ނާޓޮކިސް އިންޓެލިޖެންސާއި، ޑްރަގް އެންފޯސްމެންޓު ގުޅިގެން ކުރިއަށްގެންދިޔަ ކޮންޓްރޯލު ޑެލިވަރީ އޮޕަރޭޝަނެއްގައި މާލެއިންނެވެ. 

މި ތިން މީހުން ހައްޔަރުކުރީ ރާއްޖެއަށް މަސްތުވާތަކެތި އެތެރެކޮށް، ގެންގުޅެ ބޭނުންކޮށް އަދި މަސްތުވާތަކެތީގެ ވިޔަފާރިކުރާކަމުގެ ތުހުމަތުގައި، އެމީހުން ބަލައި ފާސްކުރުމުގެ ތެރެއިން ޖުމްލަ ފަސް ކިލޯ 936 ގުރާމުގެ މަސްތުވާކެތި ފެނިފައިވާ ކަމަށް ފުލުހުން ބުނެފައިވެ އެވެ. 

މި މައްސަލާގައި ހައްޔަރުކުރި ތިން މީހުންގެ ތެރެއިން އަހްމަދު ނަސީރު ފަސް ދުވަހަށް ބަންދުކުރުމަށް އަދި އައިހަމްއާއި ރޮހަމާން ހަތް ދުވަހަށް ބަންދުކުރުމަށް ކޯޓުންވަނީ އަމުރުކޮށްފަ އެވެ. 

ފުލުހުން ބުނެފައިވަނީ އެ މައްސަލަ އިތުރަށް ތަހުގީގުކުރަމުންދާ ކަމަށެވެ.