ސީ-ޓު-އެއާ | އެއް މަހުން 96 ކޮންޓެއިނަރު، މަހަކު 400 ކޮންޓެއިނަރާ ހަމައަށް ފުޅާކުރެވޭނެ

ފާއިތުވި އޮކްޓޯބަރު މަހުގައި އެކަަނި ކަނޑު މަގުން ރާއްޖެއަށް މުދާ އެތެރެކުރުމަށްފަހު ވައިގެ މަގުން މުދާ އެހެން ގައުމުތަކަށް އެކްސްޕޯޓުކުރަން ފެށި ވިޔަފާރީގެ ތެރެއިން 400 ޓަަނުގެ މުދާ ބޭރުކޮށްފައިވާ ކަމަށް އެމްޕީއެލްގެ ސީއީއޯ މުހައްމަދު ވަޖީހު ވިދާޅުވެއްޖެ އެވެ. 

ވަޖީހު މިފަދައިން ވިދާޅުވީ ބަންގުލަދޭޝްއިން އަންނަައުނު ބޭރުކުރުމަށް އިންޑިޔާގެ ބަދަލުގައި ރާއްޖެ ބޭނުންކުރަން ފަށާފައިވާކަމަށް ބުނެ އިންޑިޔާ ނޫހަކުން ގެނެސްދީފައިވާ ހަބަރެއް ހިއްސާކުރައްވައި ފޭސްބުކުގައި ޝާއިއުކުރެއްވި ޕޯސްޓެއްގަ އެވެ. 

ވަޖީހު ފާހަގަަކުރެއްވި ގޮތުގައި މި ސިނާއަތަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވެރިކަމަށް އަހަރު ދުވަސް ނުވަނީސް އެމަނިކުފާނު ދިވެހިރާއްޖޭގެ އިގުތިސާދު އިތުރަށް ހަރުދަނާކުރެއްވުމަށް ފެއްޓެވި މުޅިން އައު ސިނާއަތެކެވެ. 

"އެމަނިކުފާނުގެ ވެރިކަމަށް 1 އަހަރު ނުވަނީސް، “ސީޓު އެއަރ ކާގޯ” ނަމުގައި މިވަނީ އިގުތިސާދަށް ދިރުން ގެނެސްދޭނެ އިތުރު ދާއިރާ އަކުން މަސައްކަތް ފެށި، އެމަސައްކަތް ތަރައްގީ ވާން ފަށާފަ،" އެމްޕީއެލްގެ ސީއީއޯ ވިދާޅުވި އެވެ. 

ވަޖީހުވަނީ މި މަސައްކަތް ފެށުނު ގޮތަށް އަލިއަޅުވައިލައްވާފަ އެވެ. އެގޮތުން އެންމެ ފުރަތަމަ މި ހިދުމަތް ދިނުމަށް ޓާކިޝް އެއާލައިނާއެކު އެއްބަސްވުމެއް ގާއިމުކުރެވުނީ މި އަހަރުގެ މާޗު މަހުގައި ކަމަށާއި، ފުރަތަމަ ޝިޕްމެންޓު ރާއްޖެއިން ބޭރުކުރީ މޭ މަހުގައިކަން ވަޖީހު ފާހަގަކުރެއްވި އެވެ. 

މި ހިދުމަތުގެ ތެރެއިން މިހާރު ރާއްޖެއިން އެންމެ ގިނައިން ބޭރުކުރަނީ ބަންގުލަދޭޝުގައި އުފައްދާ ގާމެންޓުކަން ވަޖީހު ފާހަގަކުރެއްވި އެވެ. އަދި މިހާތަނަށް ބަންގުލަދޭޝްގައި އުފައްދާ އަންނައުނުގެ ބާވަތްތައް ވައިގެ މަގުން ޔޫރަޕަށް ބޭރުކުރަމުން އައީ އިންޑިޔާއާއި ލަންކާ މަގުންކަމަށް ވަޖީހު ވިދާޅުވި އެވެ. 

ވަޖީހު އިތުރަށް ފާހަގަކުރެއްވީ ރާއްޖެއިން މި ހިދުމަތް ދޭން ފެށުމާއެކު ފާއިތުވި ކުޑަ ދުވަސްކޮޅުގެ ތެރޭގައި އެ ހިދުމަތަށް ލިބުނު ތަރުހީބުގެ ބޮޑުކަމެވެ. އެގޮތުން ފާއިތުވި އޮކްޓޯބަރު މަހުގައި އެކަނި 96 ކޮންޓެއިނަރުގެ މުދާ ރާއްޖެއިން ބޭރުކުރިކަން އޭނާ ފާހަގަކުރެއްވި އެވެ. އެއީ 400 ޓަނު ނުވަތަ 34،946 ދާގީނާ އެވެ. 

އެންމެ އެއާލައިނަކާއެކު ފެށި ހިދުމަަތުގައި މިހާރު ހަތް އެއާލައިނެއް ބައިވެރިވެފައިވާކަަން ފާހަގަކުރައްވައި ވަޖީހު ވިދާޅުވީ މި ހިދުމަތް ފުޅާވާތީ ސަރަހައްދީ ބައެއް ވާދަވެރިން ކަންބޮޑުވާން ފަށާފައިވާ ކަމަށެވެ. 

ހިދުމަތް ފުޅާކޮށް ކަސްޓަމަރުންގެ އިތުބާރު ހޯދުމަށް ކުރާ މަސައްކަތުގެ ތެރެއިން އެ ހިދުމަތް ދިނުމުގައި އިސްކޮށް އުޅުއްވާ އިނަ މޯލްޑިވްސްގެ އެމްޑީ މުހައްމަދު ފިރާގާއި އެމްޕީއެލްގެ ޓީމެއް ބަންގުލަދޭޝްގެ ޗިޓަގޮންގަށް ޒިޔާރަތްކޮށް އެތަނުގެ އަންނައުނު އުފައްދާ ކާރުހާނާތަކުގެ ވެރިންނާ ބައްދަލުކޮށް މަޝްވަރާކޮށްފަައިވާަ ކަމަށް ވަޖީހު ވިދާޅުވި އެވެ. 

އެ މަޝްވަރާތަކުގެ އަލީގައި މި ވިޔަފާރި ފުޅާކުރުމަށް އޮތް ފުރުސަތު ބޮޑުކަން އެނގުނުކަމަށާއި، އެގޮތުން މަހެއްގެ މައްޗަށް 400 އަށްވުރެ ގިނަ ކޮންޓެއިނަރު ބޭރުކުރެވޭ މިންވަަރަަށް އެ ހިދުމަތް ފުޅާކުރެވިދާނެ ކަމުގައި ވިދާޅުވި އެވެ. 

" ކޮންޓއިނަރ ތައް ރާއްޖެ ގެނައުމަށްޓަކައި ރާއްޖެ އަށް ދަތުރު ކުރާ ޝިޕިންގ ލައިން ތަކާއި އެކު ވާހަކަ ދެކެވެމުން އެބަ ގެންދެވޭ. އަދި މިމަސައްކަތަށް ބެއިނުންވާ، މެޝިނަރީ ތަކާއި އިކުއިޕުމެންޓުސް ތައް ހަމަކޮށް، ކަސްޓަމަރުން ހިތްހަމަ ޖެހޭފަދަ ހިދުމަތްތަކެއް ފޯރު ކޮށްދެވޭތޯ ވަރަށް ބޮޑަށް މަސައްކަތް ކުރެވެމުން އެބަ ގެންދެވޭ،" ހިދުމަަތް ފުޅާކުރުމަށް ކުރަމުންދާ މަސައްކަތާމެދު ވަޖީހު ވިދާޅުވި އެވެ. 

އިތުރަށް އޭނާ ވިދާޅުވީ މި ހިދުމަތަކީ އިގުތިސާދަށް ހެޔޮ ބަދަލެއް އަންނާނެ ފަދަ ހިދުމަތެއް ކަމަށް ހެދުމަށް އެމްޕީއެލްއާއި އެމްއޭސީއެލް ގުޅިގެން މަސައްކަތްކުރުމަށް ރައީސް މުއިއްޒު އިރުޝާދު ދެއްވާފައިވާ ކަމަށެވެ.