އަލްޖީރިއާގެ މިނިވަންކަމުގެ ބަތަލު ބިން މަހްދީ މެރިކަމަށް ފުރާންސުން އެއްބަސްވެއްޖެ

އަލްޖީރިއާގެ މިނިވަންކަމަށް ކުރި ހަނގުރާމައިގެ މުހިއްމު ޝަހުސިއްޔަތެއް ކަމުގައިވާ ލަރްބީ ބިން މަހްދީ 1957 ވަނަ އަހަރު ހައްޔަރުކުރުމަށްފަހު ފުރާންސް ސިފައިންތަކެއް އޭނާ އަވަހާރަކޮށްލިކަމަށް ފުރާންސްގެ ރައީސް އިމެނުއެލް މެކްރޯން އެއްބަސްވެވަޑައިގެންފި އެވެ. 

އަލްޖީރިއާގެ މިނިވަންކަމުގެ ހަރަކާތް ފެށުމަށް 70 އަހަރު ފުރުނު މުނާސަބަތާ ގުޅިގެން ހުކުރުދުވަހު ފަރަންސޭސި ރިޔާސީ ގަނޑުވަރުން ނެރުނު ބަޔާނެއްގައި ބުނެފައިވަނީ ލަރްބީ ބިން މަހްދީ އަވަހާރަކޮށްލީ ފުރާންސްގެ ސިފައިންކަމަށް ފަރަންސޭސި ރައީސް އެއްބަސްވެވަޑައިގަތީ އަލްޖީރިއާއާއި ފުރާންސްގެ ގުޅުން އިތުރަށް ރަނގަޅުކުރެއްވުމަށް އަޅުއްވަމުންދާ ފިޔަވަަޅުތަކުގެ ތެރެއިން ކަމަށެވެ. 

ފަރަންސޭސިވިލާތުން ގަރުނަކަށްވުރެ ގިނަ ދުވަހު އިސްތިއުމާރުކޮށްފައި އޮތް އަލްޖީރިއާ އިސްތިއުމާރުން މިނިވަންވުމަށް 1954 ވަނަ އަހަރުން 1962 ވަނަ އަހަރަށް ކުރި ހަނގުރާމައިގެ ސަބަބުން ދެ ގައުމުގެ މެދުގައި އޮތް ގުޅުން އަބަދުވެސް އޮންނަނީ ނާޒުކު ހާލަތެއްގަ އެވެ. 

ފަރަަންސޭސި އިސްތިއުމާރާއި އިމްބްރާތޯރީ ހަންފެތުރުމާމެދު މައާފަށް އެދިވަޑައިނުގެންނެވި ނަމަވެސް ފާއިތުވި އަހަރުތަކުގައި މެކްރޯންވަނީ ދެ ގައުމުގެ މެދުގައި އޮތް ނުތަނަވަސްކަން ކުޑަކުރުމަށް ބައެއް ފިޔަވަޅުތައް އަޅުއްވާފަ އެވެ. 

އެގޮތުން 2017 ވަނަަ އަހަރު ވެރިކަމަށް ވަޑައިގަތުމަށްފަހު މެކްރޯންވަނީ އަލްޖީރިއާގައި ފަރަންސީސި އިސްތިއުމާރު އޮތް ދުވަސްވަރުގެ ތާރީހަށާއި އެ ގައުމުގެ މިނިވަންކަމުގެ ހަނގުރާމައިގެ ތާރީހަށް ބައްލަވައި މައާފަށް މުރާޖައާކުރަންޖެހޭ ތާރީހީ ހަގީގަތްތައް މުރާޖައާކުރެއްވުމުގެ މަސައްކަތް ފައްޓަވާފައިކަމަށް ރިޔާސީ ގަނޑުވަރުން ނެރުނު ބަޔާނުގައި ބުނެފައިވެ އެވެ. 

ބިން މަހްދީއަކީ ފަރަންސޭސި ވެރިކަމާ ދެކޮޅަށް އަލްޖީރިއާގައި މިނިވަންކަމުގެ ހަރަކާތް ފަށައިގަތް ނޭޝަނަލް ލިބަރޭޝަން ފްރޮންޓުގެ ހަ މުއައްސިސުންގެ ތެރެއިން ބޭފުޅެކެވެ. 

މީގެ ކުރިން ފަރަންސޭސި ސަރުކާރުން ބުނަމުން ގޮސްފައިވަނީ ބިން މަހުދީ ހައްޔަރުކުރުމުން އަމިއްލައަށް އަވަހާރަވާން މަސައްކަތްކުރެއްވިކަމަށާއި ދުނިޔެ ދޫކުރެއްވި ފަރުވާ ދިނުމަށް ހޮސްޕިޓަލަށް ގެންދިޔަ މަގުމަތީގައި ކަމަށެވެ. 

ރިޔާސީ ގަނޑުވަރުގެ ބަޔާނުގައި ބުނެފައިވަނީ ހަގީގަތުގައި ބިން މަހްދީ ހައްޔަރުކުރުމަށްފަހު ޖެނެރަލް ޕޯލް އޯސަރެސެސްގެ އަމުރަށް އޭނާަގެ ދަށުން މަސައްކަަތްކުރި ސިފައިން ބިން މަހްދީ އަވަހާރަަކޮށްލީ ކމަަށެވެ. އަދި އޯސަރެސެސްވަނީ 2000 ގެ ކުރީ ކޮޅުގައި އެކަމަށް އެއްބަސްވެވަޑައިގެންފަ އެވެ. 

2017 ވަނަ އަހަރުގެ ރިޔާސީ އިންތިހާބުގައި މެކްރޯން ވިދާޅުވެފައިވަނީ އަލްޖީރިއާ އިސްތިއުމާރުކޮށްފައި އޮތް ދުވަސްވަރު ފަރަންސޭސިން އެ ގައުމުގައި އިންސާނިއްޔަތާ ދެކޮޅު ޖަރީމާތައް ހިންގާފަައިވާ ކަމަށެވެ.