ދެ ހިތް ވަކިވެވި ނުދާ – އެޕިސޯޑް 19
ރުޅިވެރިކަމާ ހަރުކަށިކަން ފާޅުވެގެން ދިޔައެވެ. ވެއްޓިފައި އޮތް މުނީރާއަށް ބަލައިލެވުނީ ލައިލާގެ މޫނަށެވެ. މިހާރު ފެންނަން ހުރީ ލައިލާގެ ސޫރައެއް ނޫނެވެ. އެއީ ބިރުވެރި ސޫރައެއްގައި ހުރި ސިފަ ހުތުރު ޖިންނި އެކެވެ.
- އެޕިސޯޑް 19 –
މުނީރާ ދެލޯ ބޮޑު ކޮށްގެން ކަޅި ޖަހާ ނުލައި އެ ބިރުވެރި ސޫރައަށް ބަލަމުން ކޮޅަށް ތެދުވިއެވެ. އެއީ ބިރުވެރި ސޫރައެއްގައި ހުރި އެއްޗެކެވެ. ބޮޑަށް ވައްތަރީ ވެސް ފިރިހެނަކާ އެވެ. ކުއްލިއަކަށް ލައިލާގެ ސިފައަށް އޭތި އަނެއްކާ ވެސް ބަދަލުވިއެވެ.
"އަހަރެންގެ އަސްލު ސިފަ ބަލަން ބޭނުން ނުވަންޏާ، އަހަރެންގެ އެއްވެސް ކަމަކަށް ހުރަސް ނާޅާތި!"
ލައިލާ ވަރަށް ހަމަޖެހިލަމުން އޭނާގެ އަތުގައި ކޭތިފައި ހުރި ލޭތައް ބޯލަމުން ވާހަކަދެއްކިއެވެ.
އެ މަންޒަރު ބަލަން މުނީރާއަކަށް ކެތެއް ނުވިއެވެ. އަނގަ މަތީގައި އަތް އަޅާލަމުން ދުވެފައި ކަހަލަ ގޮތަކަށް މުނީރާ އެތަނުން ނުކުތެވެ. މުނީރާގެ ފަހަތުން ކާސިމް ވެސް ހިނގައިގަންނަން އުޅުނެވެ. ނަމަވެސް އޭނާއަށް އެކަމެއް ނުވިއެވެ. އޭނާގެ ދެފައި ތިލަ ހުރީ ތަތްލާފައެވެ. ހީވީ ލޮކް ވެފައި ވާހެންނެވެ.
ކާސިމް ޖެހިލުންވެ ހުރެ ބަލައިލީ ލައިލާ އަށެވެ. ކާސިމްއަށް ފެނުނީ ލައިލާ އެއް ނޫނެވެ. އެތަނުގައި ހުރީ ބަތާން އެވެ.
"އަހަރެން ދެން ލައިލާއާ އެކުގައި ދިރިއުޅޭނީ މިގޭގަ. އޯކޭ އެއްނު! ދޯ؟ މުނީރާގެ އެދުމަށް ލައިލާ ބޭނުންވީ ވެސް އެގޮތް.. ލައިލާ އާދޭސް ކުރި، މިގެއަށް އަންނަން.. ވަރަށް ޙާލުގަ އޭނާ އޮތީ... ކިރިޔާ ދުނިޔޭގަ އޮންނަކަން.. އެކަމު، އަހަރެން މަޑުމަޑުން ލައިލާއަށް ލޯބި ދީގެން މި ބަލަނީ ލައިލާ ހަމައަކަށް އަޅުވަން.. އެކަމު ލައިލާ ގަދަ ދައްކަނީ... އެހެންވެ އަހަރެންނަށް އަނިޔާ ވެސް ކުރެވޭ.. ހައްހައްހާ.."
ބަތާންގެ ވާހަކަ ވެގެން ދިޔައީ ކާސިމަށް އަޑު އަހާލަން އެއްވެސް ވަރަކަށް ފަސޭހަ ވާހަކައަކަށް ނޫނެވެ. ކާސިމަަށް ވަރަށް އަސަރުކޮށްފިއެވެ.
"ތިހެން ނުހަދާ! އެ ދަރިފުޅުގެ އެއްވެސް ކުށެއް ނެތް.. ކުށް ކުރީ އަހަރެން.. އަހަރެން ކުރި ކުށެއްގެ އަދަބު އޭނާއަށް ނުދީ.. ހެޔޮނުވާނެ.."
ކާސިމްގެ ދެލޯ ކަރުނައިން ފުރިގެން ދިޔައެވެ. ކާސިމްގެ ވާހަކަ އަޑު އަހާފައި ބަތާނަށް އައީ ހިންޏެވެ.
"ތީ ވަރަށް މަޖާ ވާހަކައެއް... ކަލޭގެ ދަރިފުޅު ލައިލާ.. އެއީ މާތް އަންހެނެއްތަ؟ އަހަރެންނަށް އޭނާ އެންމެ ފުރަތަމަ ވެސް ކަލޭ ދެއްކީ، ދަންވަރުގެ ވަގުތެއްގަ.. އޭނާ ޒިނޭ ކުރަން އޮއްވާ.. ހައްހައްހާ.. އަހަރެން އޮތީ އެ މަންޒަރު ބަލަން... ފެށިގެން ނިމެންދެން ބަލަން.. ދެން ކަލޭ އެގެއަށް ފަހުން ވަދެ، ކުރި ކަންތައް ވެސް އަހަރެން ހުރީ ބަލަން.. އެކަމު، އަހަރެން ކަލޭއަށް ހެދުން ގޯސް އަހަރެން ނުބުނީ، އެއީ އަހަރެން ލައިލާ ބޭނުން ވީމަ.. އަހަރެންނަށް އެނގޭ ކަލޭގެ އެ އަމަލުން އަހަރެންނަށް ލައިލާ ލިބޭނެ ކަން.." ބަތާންގެ ހުނުމުގެ އަޑުން މުޅިތަން ގުގުމަމުން ދިޔައެވެ.
"ތިހެން ނުހަދާ! އަހަރެންނަށް މާފު ކުރޭ! އަހަރެންގެ ދަރިފުޅު ދޫކޮށްލާ! އާދޭސްކޮށްފަ މިބުނީ..."
ކާސިމްގެ އާދޭސްތަކަށް ބަތާން ދިނީ ބީރު ކަންފަތެކެވެ. ކުއްލިއަކަށް ކާސިމްގެ ފައިގައި ޖެހިފައިވާ ލޮކް އެއްކޮށް ފިލައިގެން ދިޔަ ކަހަލައެވެ. ކާސިމް ވަރަށް އަވަސްކޮށް ހިނގައިގަތީ އެތަނުން ނުކުންނާށެވެ. މުނީރާގެ ޚަބަރެއް ބަލާށެވެ.
ކާސިމް ކޮޓަރިއަށް ވަތް އިރު، އެނދުގައި އިށީންދެގެން މުނީރާ އިނީ ރޯންށެވެ. މުނީރާއަށް ވަނީ ވަރަށް އަސަރުކޮށްފައެވެ. ކާސިމް މަޑުމަޑުން މުނީރާގެ ގާތުގައި މުނީރާއާ ޖެހިގެން އިށީންނެވެ. މުނީރާއަށް ހިތްވަރު ދެވޭތޯ ކާސިމް މަސައްކަތް ކުރިއެވެ. ނަމަވެސް ކާސިމަށް އެކަމެއް ނުވިއެވެ. ލައިލާގެ ނަން ކިޔުމާ އެކުގައި ކާސިމަށް ވެސް ރޮވިއްޖެއެވެ. މުނީރާ އަށް ބޭއިޙްތިޔާރުގައި ކާސިމްގެ ގައިގައި ބައްދައިގަނެވުނެވެ. އެއާ އެކުގައި މުނީރާއަށް ވެސް ރޯން ފެށުނެވެ. މުޅި ރޭ އެދަމަފިރިން ހޭދަކުރީ އެގޮތުގައެވެ.
މުޅިން އައު ދުވަހަކަށް އިރު ދުނިޔެއަށް މަރުޙަބާ ކިޔައިފިއެވެ. މުނީރާ އިލޮށިފަތި ހިފައިގެން ނުކުތީ ގޭގެ އިމާ ގުޅިފައިވާ މަގުތައް ކުނި ކަހާށެވެ. އެއްވެސް ވަރެއް ނެތް މީހެއް ފަދައިން މުނީރާ ހިނގަމުން ގޮސް މަގުމައްޗަށް ނުކުމެ ބިންމަތީގައި އިލޮށިފަތި ކާތާލިއެވެ. ކުޑަ އިރުކޮޅެއް ނުވަނީސް ކޮންމެވެސް މީހެއް އިލޮށިފަތި މައްޗަށް ފައިން އެރިހެން ހީވެގެން މުނީރާ ކުއްލިއަކަށް ކޮޅަށް ތެދުވެ، ސީދާވެލަމުން ކުރިއަށް ބަލާލިއެވެ. މުނީރާގެ ކުރިމަތީގައި ހުރީ މިކާލް އެވެ.
"އަހަރެން ރޭގަ ނުވެސް ނިދަން.. އޭގެ ކުރީ ރޭގަ ވެސް.. ލައިލާ ގެއްލުން ހިސާބުން ފެށިގެން އަހަރެން މިއުޅެނީ ނުނިދާ.. ނުކައި.. ނުބޮއި.. ކިރިޔާ ދުނިޔޭގަ ހުންކަން.."
މީކާލްގެ އަޑުންނާއި މޫނުމަތިން އެ ދެއްކި ވާހަކަތަކަކީ ތެދުކަން ކިތަންމެހާ ވެސް ބޮޑަށް ޔަޤީންވެއެވެ.
"އަހަރެންނަށް އެނގޭ ލައިލާގެ މަންމަ އަހަރެން ދެކެ ވަރަށް ނަފުރަތު ކުރާކަން.. ދުވަހަކު ވެސް ލައިލާގެ މަންމަ އެއްޗެއް އަހަންނާ ދިމާލަށް އަޑު އިވޭ ސިހާބެއްގަ ނުބުނޭ.. ކާސިމް ވެސް ނުބުނޭ... ވެދާނެ ބިރުން ކަމަށް ވެސް.. އެކަމު، ކާސިމް އަހަންނާ ދެކޮޅަށް ކަންކަން ރާވާކަން އަހަރެންނަށް އެނގޭ! އަސްލު އަހަންނަށް އަހަރެންގެ މައްސަލައަކީ ކޮބާކަމެއް ނޭނގެ.. ނޫން.. އެނގޭ! އަހަރެންމީ ގޭންގެއްގަ އުޅޭ މީހަކަށް ވީމަ.. ދޯ؟ އަހަރެން އިސްތަށިގަނޑު ދިގުކޮށްފަ ހުރީމަ ދޯ؟ އެކަމު ލައިލާއާ ދިމާވި ފަހުން އަަހަރެން ވަރަށް ބޮޑަށް ބަދަލުވެފަ މިހުރީ.. މި ހިތުގަ އަދިވެސް މުނީރާއަށް ރެސްޕެކްޓް އެބަ އޮތް.. އިހުތިރާމް ކުރަން.. އަހަރެން ދެކެ ކިތަންމެ ނަފްރަތް ކުރިޔަސް.. އެކަމު އަހަރެން ދުވަހަކުވެސް.. ދުވަހަކުވެސް.. ކާސިމަށް މާފެއް ނުކުރާނަން!"
މީކާލް އެހެން ބުނުމާ އެކުގައި މުނީރާގެ ދެލޯ ބޮޑު ވެެގެން ދިޔައެވެ. މީކާލްއަށް ކަމެއް އެނގުނީބާއޭ ހިތަށް އަރާފައެވެ.
"ކީއްވެ ތިހެން ތި ބުނީ؟"
މުނީރާ ބަލަން ހުރީ މީކާލްގެ މޫނަށެވެ. މީކާލް ހިތްދަތި ގޮތަކަށް ހިންދިރުވާލިއެވެ. އަދި ލުއިކޮށް ހީނލިއެވެ.
"ލައިލާގެ މަންމަ ތި ސާބިތުކޮށް ދެނީ ކަމެއް ވަމުން ދާކަން.. އެހެން ނޫން ނަމަ، ތީ އަހަންނާ ވާހަކަދައްކާނެ މީހެއް ވެސް ނޫން.. ތިހެން ތި ސުވާލު ކުރާނެ މީހެއް ވެސް ނޫން.."
މީކާލްގެ ޖުމުލައިން މުނީރާގެ ހިތުގެ ތެޅުން އަވަސްވިއެވެ. އަދި އެތަނުން ހިނގައިގަންނަން އުޅުނެވެ. ނަމަވެސް މީކާލް އަނެއްކާ ވެސް ވާހަކަދައްކަން ފެށުމުން މުނީރާ މަޑުކޮށްލިއެވެ.
"އަހަރެން ލައިލާ ދެކެ ވަރަށް ލޯބިވޭ! ލައިލާ އެންމެ ފަހު ނޭވާއާ ހަމައަށް ވެސް އަހަރެންނަށްޓަކާ ހިތްވަރު ކުރާނެ... ލައިލާ އަހަރެން ދޫކޮށްފަ ނުދާނެ... ލައިލާ ދުނިޔޭގަ އެބަ ހުރި.. އެކަން އަހަންނަށް އެބަ އިޙްސާސްވޭ! ލައިލާގެ މަންމަ ވީމަ އަހަރެން މިހެން މިބުނީ... އެކަމު ތީ ލައިލާގެ ބައްޕަ ނަމަ، އަހަރެންގެ ރާގު އަދި ދައްކާ ވާހަކަތައް ވެސް ބަދަލުވާނެ.."
މީކާލް ދެއްކި ވާހަކަތައް، އިލޮށިފަތި ހިފައިގެން ކޮޅަށް ހުރި މުނީރާ ކަނުލާ އަޑުއެހިއެވެ. އެއްވެސް އެއްޗެއް ނުބުނެ މުނީރާ ހިނގައިގަތީ ގޭތެރެއަށް ވަންނާށެވެ. (ނުނިމޭ)
ކޮމެންޓް
Republic of Maldives