ސެޕްޓެންބަރުގެ ނިޔަލަށް އާސަންދައިން 2.5 ބިލިއަން ހަރަދުކޮށްފި

މި އަހަރުގެ ފުރަތަމަ ތިން ކުއާޓާގެ ނިޔަލަށް ޖުމްލަ 2.5 ބިލިއަން ރުފިޔާ އާސަންދައިން ހަރަދުވެފައިވާކަން އެ ކުންފުނީގެ ތަފާސްހިސާބުތަކުން ދައްކައިފި އެވެ. 

އާސަންދައިން ހާމަކޮށްފައިވާ ހިސާބުތަކަށް ބަލާއިރު ސެޕްޓެންބަރުގެ ނިޔަލަށް އާސަންދައިން ހިދުމަތް ހޯދި މީހުންގެ އަދަަދު 821.989 އަށް އަރައެވެ. އަދި އެ މުއްދަތުގައި އާސަންދަ މެދުވެރިކޮށް ރާއްޖެއިން ބޭރުން ހިދުމަތް ހޯދާފައިވަނީ 6،868 މީހުންނެވެ. 

އާސަންދައިން ހާމަކޮށްފައިވާ ހިސާބުތަކަށް ބަލާއިރު މި އަހަރުގެ ތިންވަނަ ކުއާޓާގައި އެކަނި 903 މިލިއަން ރުފިޔާ އާސަންދައިގެ ހިދުމަތްތަކަށް ހަރަދުވި އެވެ. އެއީ ނިމުނު އަހަރުގެ ޖުލައި އެކަކުން ސެޕްޓެންބަރުގެ ނިޔަލަށް އާސަންދައިން ހަރަދުވި އަދަދަށްވުރެ 8.4 އިންސައްތަ އަދަދެއްކަމަށް އާސަންދައިން ބުނެފައިވެ އެވެ. 

އަދި މި އަހަރުގެ ތިންވަނަ ކުއާޓާގައި އާސަންދައިން ހިދުމަތް ހޯދި މީހުންގެ އަދަދުވެސް ފާއިތުވި އަހަރުގެ އެ މުއްދަތާ އަޅާބަލާއިރު އިތުރުވެފައިވެ އެވެ. ނިމުނު އަހަރުގެ އެ މުއްދަތުގައި އާސަންދައިން ހިދުމަތް ހޯދީ 278،255 މީހުންކަމަށްވީ ނަމަވެސް މި އަހަރު އެ އަދަދުވަނީ 280،491 އަށް އިތުރުވެފަ އެވެ.

މި އަހަަރު އާސަންދަ މެދުވެރިވެގެން ޖުމްލަ 4،057 މެޑިކަލް އިވެކުއޭޝަން ހަދާފައިވާ ކަމަށް އެ ކުންފުނިން ބުނެފައިވެ އެވެ. ޖުލައި އެކަކުން ސެޕްޓެންބަރުގެ ނިޔަލަށް ތިންވަނަ ކުއާޓާގައި އެކަނިވެސް 1،226 އެމަޖެންސީ އިވެކުއޭޝަން ހަދާފައިވެ އެވެ.