އަދުލުވެރިކަން ކަށަވަރު ކުރަން ގެންނަން ޖެހޭ އިސްލާހުތައް ގެންނާނެ: ރައީސް

ޢަދުލުވެރިކަމާއި، އިންސާފާއި، ހަމަހަމަކަމާއެކު، ވަކި މީހަކަށް ބެލުމެއްނެތި، ހަލުއި ދުވެލީގައި މަސައްކަތްކުރަމުން ދޭތޯ ކަށަވަރުކުރުމަށް ޤާނޫނާއި ޤަވާޢިދަށް ގެންނަންޖެހޭ އިސްލާހެއްވާނަމަ އެ އިސްލާޙެއް ގެންނަން ސަރުކާރުން ހުށަހަޅަމުން ގެންދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ އެކްސް ގައި ކުރެއްވި ޕޯސްޓެއްގަ އެވެ. މިފަދަ މޭރުމަކުން އެމަނިކުފާނު ޕޯސްޓެއް ކުރެއްވީ ސަރުކާރުގެ ފަރާތުން އެންޓި ކޮރަޕްޝަން ކޮމިޝަނުގެ ގާނޫނު އިސްލާހުކޮށް އެ ކޮމިޝަނުގެ ރައީސާއި ނައިބުރައީސަކީ ރައީސުލްޖުމްހޫރިއްޔާ މަޖިލީހަށް ނަން ފޮނުއްވައިގެން މަޖިލީހުން ރުހުން ލިބިގެން އައްޔަންކުރާ ބޭފުޅުންތަކެއްގެ ގޮތުގައި ހަމަޖެއްސުމަށް ހުށަހަޅާފައިވާ ބިލާއި ގުޅިގެން ބޮޑު ކަންބޮޑުވެއް އުފެދުމާއި ގުޅިގެންނެވެ.

ގިނަ ބަޔަކު ދެކޭ ގޮތުގައި މިއީ އޭސީސީގެ ބާރުތައް ރައީސުލްޖުމްހޫރިއްޔާގެ އަތްޕުޅަށް ނަންގަވާން ކުރައްވަވާ ކަމެކެވެ.

ރައީސް ވިދާޅުވީ ދައުލަތުގެ އެއްވެސް ބާރެއްގެ، ނުވަތަ މިނިވަން މުއައްސަސާއެއްގެ، ނުވަތަ އިންތިޚާބު ކުރެވޭ އެއްވެސް ބައެއްގެ ބާރުތަކުގެ ތެރެއަށް ނުފޫޒު ފޯރުވުމަކީ މިއަދާ ހަމަޔަށްވެސް އެމަނިކުފާނު ކުރެއްވި ކަމެއް ނޫނެވެ. އަދި ކުރިޔަށް އޮތް ތާނގައިވެސް ކުރައްވާނެ ކަމެެއް ނޫން ކަމަށް ވިދާޅުވި އެވެ.

".. އޭގެ ބަދަލުގައި، އެފަދަ ފަރާތްތަކުން ޢަދުލުވެރިކަމާއި، އިންސާފާއި، ހަމަހަމަކަމާއެކު، ވަކި މީހަކަށް ބެލުމެއްނެތި، ހަލުއި ދުވެލީގައި މަސައްކަތްކުރަމުން ދޭތޯ ކަށަވަރުކުރުމާއި އެ މަގަށް ކަންކަން ބައްޓަން ކުރުމަށް ކުރަންޖެހޭ އެންމެހާ ކަންކަން ކުރުމަށް، ޤާނޫނާއި ޤަވާޢިދަށް ގެންނަންޖެހޭ އިސްލާހެއްވާނަމަ އެ އިސްލާޙެއް ގެންނަން ސަރުކާރުން ހުށަހަޅަމުން ގެންދާނެ ވާހަކަ ދަންނަވަން،" ރައީސްގެ ޕޯސްޓްގައި ވިދާޅުވި އެވެ.