އޮކްޓޯބަރު ކުރީ ކޮޅު ރާއްޖެއަށް އައުމާއެކު ފެނަކަ ސައީދުގެ ޕާސްޕޯޓު ހިފަހައްޓައިފި
މި މަހުގެ 9 ވަނަ ދުވަހުން ފެށިގެން ސައީދުގެ ޕާސްޕޯޓު ހިފަހެއްޓުމާއެކު އެސީސީން އަންނަނީ އޭނާއަށް ތުހުމަތުވާ ގިނަ މައްސަލަތަކެއް ތަހުގީގުކުރަމުންނެވެ.
އެންޓި ކޮރަޕްޝަން ކޮމިޝަނުން އޭނާއާމެދު ތުހުމަތުވާ ކޮރަޕްޝަނުގެ މައްސަލަތައް ތަހުގީގުކުރަމުން ދަނިކޮށް ރާއްޖެއިން ބޭރަށް ވަޑައިގެންނެވި، ފެނަކަ ކުންފުނީގެ ކުރީގެ މެނޭޖިން ޑިރެކްޓާ އަހްމަދު ސައީދު (މައިފޫނާ) ރާއްޖެއަށް ވަޑައިގަތުމާއެކު އޭނާގެ ޕާސްޕޯޓު ހިފަހައްޓައިފި އެވެ.
ފެނަކައިގެ އެމްޑީގެ މަގާމުގައި ހުންނެވިއިރު ހިންގެވިކަމަށް ތުހުމަތުވާ ކޮރަޕްޝަނުގެ މައްސަލަތަކާ ގުޅިގެން އޭނާ އޭސީސީއަށް ހާޒިރުކޮށް ސުވާލުކުރަން ފެށިތާ ކުޑަ ދުވަސްކޮޅެއްފަހުން އާލާސްކަންފުޅާ ކަމަށް ވިދާޅުވެ ރާއްޖެއިން ބޭރަށް ސައީދު ވަޑައިގެންނެވި އެވެ. އޭނާ ބޭރުގައި ހުންނެވުމަށްފަހު ރާއްޖެ ވަޑައިގަތުމުން ހިނގަމުންދާ އޮކްޓޯބަރު މަހުގެ ކުރީ ކޮޅުގައި އޭސީސީން އެދިގެން ކޯޓުން އޭނާގެ ޕާސްޕޯޓު ހިފަހައްޓާފައިވެ އެވެ.
އޭސީސީގެ އޮފިޝަލަކު ނަން ހާމަނުކުރުން ޝަރުތުކޮށް "މިރާ"އަށް މައުލޫމާތު ދެއްވި ގޮތުގައި ސައީދު ރާއްޖެއިން ބޭރުގައި އުޅުއްވިއިރުވެސް ކޮމިޝަނުން ދިޔައީ އޭނާގެ ހަރަކާތްތައް ވަރަށް ކައިރިން ބަލަމުންނެވެ. އަދި އޭނާ ރާއްޖެއަށް ވަޑައިގަތުމާއެކު މި މަހުގެ ނުވަވަނަ ދުވަހުން ފެށިގެން ކޯޓު މެދުވެރިކޮށް ސައީދު ޕާސްޕޯޓު ހިފަހައްޓާފަައިވާކަމަށް އޭސީސީން ބުންޏެވެ.
"މިކޮޅަށް ސައީދު ވަޑައިގަތުމާއެކު ތަހުގީގުގެ ބޭނުމަށް އޭނާގެ ޕާސްޕޯޓު ހޯލްޑްކޮށްފިން. އޮކްޓޯބަރު ނުވައަކުން ފެށިގެން ސައީދުގެ ޕާސްޕޯޓު އޮންނާނީ ހިފަހައްޓާފައި. އަދި މިހާރު އޭނާއާ ދެކޮޅަށް ކުރަމުންދާ ތަހުގީގުތައް ބާރު ދުވެލީގައި ދަނީ ކުރިއަށް،" އޮފިޝަލު ވިދާޅުވި އެވެ.
ސައީދު ރާއްޖެ ދޫކުރައްވައި ވަޑައިގެންނެވިއިރު އޭނާއަށް ތުހުމަތުވާ ބައެއް މައްސަލަތަކުގެ ތަހުގީގު އޮތީ ނިމި ދައުވާކުރަން ފޮނުވުމުގެ މަރުހަލާގަަ އެވެ. އެގޮތުން ކުންފުނިން ހިދުމަތާއި މުދަލާ ހޯދުމަށް އެއްބަސްވެ އެ މުދަލާއި ހިދުމަތް ދިނުމުގެ ކުރީން ކުންފުނިތަކަކަށް ފައިސާ ދޫކުރި މައްސަލަތަކެއްގެ ތަހުގީގު ނިންމާފަައިވެ އެވެ. އެ ކަމުގައި ބޮޑެތި ހިޔާނާތްތަކެއް ހިންގާފައިވާ ކަަމަށް ތުހުމަތު ކުރެވެ އެވެ.
އޭސީސީގެ އޮފިޝަލު ޔަގީންކޮށްދެއްވި ގޮތުގައި ސައީދާ ގުޅޭ އެއް މައްސަލައަށްވުރެ ގިނަަ މައްސަލަ ދަނީ ބަލަަމުންނެވެ. އެ މައްސަލަތަކުގެ ތެރޭގައި "ފުދޭވަރަކަށް ބޮޑެތި" މައްސަލަތައްވެސް ހިމެނޭކަމަށް އޭނާ ވިދާޅުވި އެވެ.
ފެނަކައިން އެކި ފަރާތްތަކާ ކޮންޓްރެކްޓުކުރި މަޝްރޫއުތަކުގެ ތެރެއިން މަޝްރޫއުގެ އަސްލު އަގަށް ވުރެ ބޮޑު އަގުގައި އެކި ކުންފުނިތަކާ ހަވާލު ކޮށްފައި ހުރި މަޝްރޫއުތަކާއި ޕްރޮކިއުމެންޓު އުސޫލުތަކާ ހިލާފަށް އެއިރު ހިންގާފައިވާ ގިނަ މައްސަލަތަކެއް ވެސް އޭސީސީން ބަލަމުން ދެ އެވެ.
"ސައީދަށް ތުހުމަތުވަނީ ވަރަށް ބޮޑެތި މައްސަލަތައް. ހުރިހާ މައްސަލައެއްވެސް ކޮމިޝަނުން މިދަނީ ބަލަމުން. އެއްވެސް މައްސަލައެއް ނުބަލައި ދޫނުކުރާނެ،" މައްސަލަތައް ތަހުގީގުކުރާނެ ކަމުގެ ޔަގީންކަން ދެއްވަމުން ކޮމިޝަނުގެ އޮފިޝަލު ވިދާޅުވި އެވެ.
ކޮމެންޓް
Republic of Maldives