ލުބުނާނުގައި އިސްރާއީލުގެ 90 ސިފައިން މަރާލައިފި

އެއްގަމު މަގުން އިސްރާއީލުން ލުބުނާނަށް އެރިފަހުން އިސްރާއީލާ ދެކޮޅަށް ކުރަމުންދާ ހަނގުރާމާގައި އިސްރާއީލުގެ 90 ސިފައިން މަރާލާފައިވާނެކަމަށް ހިޒްބުﷲއިން ބުނެފި އެވެ. 

ހިޒްބުﷲއިން މިފަދައިން ބުނެފައިވާއިރު ހޯމަދުވަހު އިސްރާއީލަށް ލުބުނާނުން 115 ރޮކެޓު ހަމަލާ ފޮނުވާލާފައިވާކަމަށް އިސްރާއީލު ސަރުކާރުން ވަނީ ބުނެފަ އެވެ. އަދި އިއްޔެ އިސްރާއީލު މީޑިޔާތަކުން ރިޕޯޓުކުރި ގޮތުގައި އެގައުމުގެ ބައެއް ސިޓީތަކާއި އަވަށްތަކުގައި ގޮވުންތަކުގެ އަޑުވަނީ އިވިފަ އެވެ. 

އިސްރާއީލު އަސްކަރިއްޔާއިން އިއުލާނުކުރި ގޮތުގައި ލިބުނާނުން ފޮނުވައިލި ރޮކެޓުތަކުގެ ތެރެއިން ގިނަ ރޮކެޓުތަކެއް ވައްޓާލާފައިވެ އެވެ. އެ ރޮކެޓުތައް ވައްޓާލާފައިވަނީ މީހުން ދިރިއުޅޭ ސަރަހައްދުތަކާ ދުރުން ކަމަަށްވެސް އިސްރާއީލު އަސްކަރިއްޔާއިން ބުނެ އެވެ. 

ހިޒްބުﷲއިން މިއަދު ހެނދުނު ބުނެފައިވަނީ އެ ޖަމާއަތުގެ ހަނގުރާމަވެރިން އިސްރާއީލަށް އަމާޒުކޮށް މިއަދު ފޮނުވައިލި ހަމަލާތަކުގެ އަމާޒުފަތްގަނޑަކީ ގިނަ އަދަދަކަށް އިސްރާއީލު ސިފައިން އެއްވެ ތިބި ސަރަހައްދެކެވެ. އެގޮތުން ރޯޝް ބެއިނާ އަސްކަރީ ބޭސްއަށާއި ކަޔްރާތު ޝަމޫނާ އަސްކަރީ މަރުކަޒަށް އަމާޒުކޮށް ހަމަލާދީފައިވާނެ ކަމަށް ހިޒްބުﷲއިން ބުނެ އެވެ. 

އިތުރަށް އެ ޖަމާއަތުން ބުނެފައިވަނީ ލުބުނާނަށް އެއްގަމު މަގުން އިސްރާއީލު ސިފައިން އެރިފަހުން އިސްރާއީލުގެ ގިނަ އަދަދެއްގެ ސިފައިން މަރައިލެވި ވަރަށް ގިނަ ސިފައިންނަށް އަނިޔާވެފައިވާ ކަމަަށެވެ. އެގޮތުން އެ ޖަމާއަތުގެ ހަނގުރާމަވެރިން ދިން ހަމަލާތަކުގައި އިސްރާއީލުގެ 90 ސިފައިން މަރުވެފައިވާކަމަށް އެ ޖަމާއަތުން ބުންޏެވެ. 

އެ ޖަމާއަތުންވަނީ ދުވާލުގެ ވަގުތުގައި އިސްރާއީލު ސިފައިންގެ ކޮމްޕެނީއަކަށް ދިން ހަމަލާއެއްގެ ވީޑިއޯއާއި ފޮޓޯ އާންމުކޮށްފަ އެވެ. 

ލުބުނާނުގެ ސިއްހީ ވުޒާަރާއިން ބުނެފައިވަނީ އިއްޔެ ދެކުނު ލުބުނާނުގެ ބައެއް އަވަށްތަކަށާއި ލުބުނާނުގެ އުތުރުގެ ބައެއް ސަރަހައްދުތަކަށް އިސްރާއީލުން ވައިގެ މަގުން ދިން ހަމަލާތަކެއްގައި ޖުމްލަ 60 މީހަކު ޝަހީދުވެފައިވާ ކަމަށެވެ. 

އެގޮތުން އުތުރު ލުބުނާނުގެ ބަޢުލަބަކް ސަރަހައްދަށް އިސްރާއީލުން ދިން ހަމަލާތަކެއްގައި އެކަކު ޝަހީދުވެ ދެ ކުޑަކުދިންނާއި އިތުރު ދެމީހަކަށް އެކިވަރުގެ އަނިޔާތައް ލިބިފައިވާކަމަށް ލުބުނާނުގެ ސިއްހީ ވުޒާރާއިން ބުނެފައިވެ އެވެ.