އީއެލްއެސް ލިއޯއިން ރާއްޖެ އަށް ޕްރީފެބް ހައުސިން | ގެ އަޅަން ނަގާނީ ހަތަރު މަސް

ރާއްޖޭގައި ގެ އަޅަން އަގުހެޔޮ ތިމާވެއްޓާ ގުޅާ ހެބިޓެކް ބްލޮކްސް ސިސްޓަމް ހައުސިންގް ގެ ލިއޯ ކުންފުނިން ތައާރަފުކޮށްފި އެވެ. 

ހިންމަފުށީގައި މިއަދު ބޭއްވި ރަސްމިއްޔާތެއްގައި ހިންމަފުށީގައި މިހާރު ހަދާފައިވާ ޕްރީފެބް މެޓީރިއަލްގެ ގޭގެ ކައިރީގައި ހުންނަވާ ވާހަކަ ދައްކަވަމުން ރައީސް މައުމޫން ވެރިކަމުގެ ހައުސިން މިނިސްޓަރު މައުރޫފު ޖަމީލު ވިދާޅުވީ ކުރިން މިކަމަށް މަސައްކަތް ކުރިނަމަވެސް މި މެޓީރިއަލުން ގެ އެޅުން ދިވެހިންނާ ހަމައަށް ގެނެސްދެވިފައި ނެތް ކަމަށެވެ. އެކަމަކު ރާއްޖޭގެ މަަޝްހޫރު ކުންފުންޏެއް ކަމަށްވާ ލިއޯ ގްރޫޕުގެ ކުޑައިގެ ދަށުން އެ ރަށުގައި ހެދި ޕްރިކާސްޓް މޮޑިއުލާ ހައުސިން ޔުނިޓު ވެގެންދާނީ އިންގިލާބީ ބަދަލެއްގެ ފެށުމަށް ކަމަށް އޭނާ ވިދާޅުވި އެވެ. 

"ސުނާމީއާ ގުޅިގެން ވެސް ޕްރީފެބް މެޓީރިއަލްގެ ގެ އަޅަން މަސައްކަތް ކުރެވުނު. އެކަމަކު މިހާތަނަށް މި ނުގެނެވޭ. އެކަމަކު މި މި މެޓީރިއަލްގެ ގެ ވެގެންދާނީ ބަދަލަކަށް،" ރާއްޖޭގެ އިމާރާތް ކުރުމުގެ ދާއިރާ އަށް ގިނަ ހިދުމަތް ތަކެއް ކުރައްވަމުން ގެންދަވާ މައުރޫފު ވިދާޅުވި އެވެ. 

ހެބިޓެކް ބްލޮކްސް ސިސްޓަމް ހައުސިންގްގެނަން ދީފައިވާ - ޕްރީފެބް މި މެޓީރިއަލް ރާއްޖެއަށް ތައާރަފު ކުރި އީއެލްއެސް ލިއޯ ކުންފުނީގެ ވެރިޔާ މެނޭޖިންގް ޑިރެކްޓަރު އަބްދު الله ސަވާދު ވިދާޅުވީ މި މެޓީރިއަލްއަކީ އެ ކުންފުނީގެ ލެބްގައި ޓެސްޓްކޮށްގެން ރާއްޖޭގެ ތިމާވެއްޓާ ގުޅޭ އެއްޗެއްކަން ޔަގީންކޮށް އަދި މިހާރު ވެސް ބޭނުން ކުރަމުން ގެންދާ ޓެކްނޮލޮޖީއެއް ކަމަށެވެ. އަދި މި މެޓީރިއަލް ބޭނުންކޮށްގެން އެ ކުންފުނިން ހަދައިދޭ ޕްރީފެބް މެޓީރިއަލް ގޭގެ އަގު މާކެޓް ރޭޓަށްވުރެ ހެޔޮވާނެ ކަމަށް އޭނާ ވިދާޅުވި އެވެ. އަދި މީގެ ގެއެއް އަޅައިދޭން ނަގާނީ އެންމެ ހަތަރު މަސް ކަމަށް އޭނާ ވިދާޅުވި އެވެ. 

"ފައިނޭންޝަލް މޮޓެލްތަކެއް ހަދަންވެސް އަޅުގަނޑުމެން މިދަނީ ރާއްޖޭގެ މި ދާއިރާގެ ފަރާތްތަކާއެކު މަޝްވަރާ ކުރަމުން،" ސަވާދު ވިދާޅުވި އެވެ. 

ރާއްޖޭގެ ކޮންޓްރަކްޝަން މާކެޓުގައި އާއްމުކޮށް ކޮންކްރީޓުން ގެއެއް އަޅައިދެނީ އަކަފޫޅެއް 1،300ރ. އާއި 1،400ރ. އާ ދެމެދުގެ އަގުތަކެއްގަ އެވެ. އެކަމަކު މި މެޓީރިއަލް އިން ގެ އަޅައިދޭ އަގަކީ އަކަފޫޓެއް ގާތްގަނޑަކަށް 1،000ރ. އަށެވެ. ލީއެލްއެސް ލިއޯ ކުންފުނިން ވަނީ ޕްރީފެބް ގެ އަޅަން ރޯމެޓީރިއަލް ގެނެސް ހިންމަފުށީގައި ގެ ތައްޔާރު ކޮށްދިނުމުގެ މަސައްކަތް ކުރަމުންނެވެ. ގެ އަޅަން އޯޑަރު ދިނުމުގެ ގެއަށް ބޭނުންވާ މެޓީރިއަލް ތައްޔާރުކޮށް ބޭނުންވާ ތަނުގައި ރާވައިދޭނެ އެވެ. މި ވަގުތު ވެސް ތިން ބުރިއަށް ގެ އަޅައި ދޭން ވަނީ ފަށާފަ އެވެ. 

ހިންމަފުއްޓަން އަރާތާ ބަނދަރާ ކައިރީގައި ލިއޯ ކުންފުނީގެ ޕްރީފެބް ސާމްޕަލް ގެ އެއް ވަނީ އަޅާފަ އެވެ. ދެ ބުރިއަށް ހަދާފައިވާ ގެ ބަލައިލަން ވަރަށް ރީތިވެފައި ފިނިޝިން ފުރިހަމަ އެވެ.