ގެއެއް ކުއްޔަށް ދޭނެ ކަމަށް ބުނެ މަކަރުން ދެ ލައްކަ ރުފިޔާ ހޯދި މީހަކު ޖަލަށް

މާލެއިން ގެއެއް ކުއްޔަށް ދޭނެ ކަމަށްބުނެ މީހެއްގެ އަތުން ދެ ލައްކަ ރުފިޔާ މަކަރާއި ހީލަތުން ހޯދި މީހަކު ޖަލަށް ލާން ހުކުމް ކޮށްފިއެވެ.

މަކަރާއި ހީލަތް ހެދުމުގެ މި ކުށް ސާބިތުވެ ކުރިމިނަލް ކޯޓުން ހުކުމް ކޮށްފައިވަނީ ހ. އަކާސިއާ، ހުސައިން ނަސީރުގެ މައްޗަށެވެ.

ކުރިމިނަލް ކޯޓުން ކުރި މި ހުކުމުގައި ބުނެފައިވަނީ 2016 ވަނަ އަހަރުގެ ޑިސެމްބަރު މަހުގެ ހަ ވަނަ ދުވަހު، ހ. އަކާސިއާގޭގެ ހަތަރު ވަނަ ފްލޯ، ދަފްތަރު ނަންބަރު 1068، މުހައްމަދު އަބްދުއްރަހީމަށް ހަ އަހަރާއި ދެ މަސް ދުވަހަށް ކުއްޔަށް ދީފައިވަނިކޮށް، 2017 ވަނަ އަހަރުގެ އެޕްރީލް މަހުގެ 13 ވަނަ ދުވަހު، ހ. ކުއްޅަވައްގެ، މުހައްމަދު އިބްރާހީމަށް ހަތަރު އަހަރާއި ދެ މަހަށް ކުލި ނނުހިނގާ ގޮތަށް ދެ ލައްކަ ރުފިޔާ އަށް ކުއްޔަށް ދީފައިވާ ކަމަށެވެ.

މިކަމާ ގުޅިގެން އޭނާގެ މައްޗަށް އެނގިހުރެ އެހެން މީހެއްގެ މުދަލަށް ބާރުވެރިވެގަތުމާއި މަކަރާއި ހީލަތް ހެދުމުގެ ދައުވާ ވަނީ އުފުލާފައެވެ. މި ދައުވާތަކަށް އޭނާ ވަނީ އިންކާރުކޮށްފައެވެ. އެހެން ނަމަވެސް ދައުވާ ހުށަހެޅި ފަރާތުން އޭނާ އާޢި ދެކޮޅަށް ގިނަ ހެކިތަކެއް ހުށަހަޅާފައިވާއިރު މިކަމުގައި ދެ ފަރާތުން ބަދަލުކޮށްފައިވާ ލިޔެކިޔުންތައްވެސް ވަނީ ހުށަހަޅާފައެވެ.

މި މައްސަލައިގެ ޝަރީއަތް ކުރިއަށް ދަނިކޮށް 20214 ވަނަ އަހަރު ހުސައިން ނަސީރާއި ޕްރޮސެކިއުޓާ ޖެނެރަލްގެ އޮފީހާއި ދެމެދު އިއުތިރާފުގެ އެއްބަސްވުމެއް ވަނީ ވެފައެވެ. އެގޮތުން މި އެއްބަސްވުމާއި ރުހި ގަބޫލުވާ ކަމަށށް ކޯޓުގައިވެސް އޭނާ ވަނީ ބުނެފައެވެ. އަދި މި އެއްބަސްވުން އެގޮތަށް ދަމަހައްޓައި ދައުވާއަށް އިއުތިރާފްވާ ކަމަށްވެސް އޭނާ ވަނީ ބުނެފައެވެ.

އެހެން ކަމުން އިއުތުރާފް އެއްބަސްވުމާ އެއްގޮތަށް އޭނާގެ މައްޗަށް ކުށް ސާބިތުވާ ކަމަށް ކަނޑައަޅައި، ހަތަރު މަހާއި 24 ދުވަހުގެ މުއްދަތަކަށް އޭނާ ޖަލަށްލުމަށް ވަނީ ހުކުމް ކޮށްފައެވެ. އެކަމަކު މި މައްސަަލަ އާޢި ގުޅިގެން އޭނާ 25 ދުވަހު ޖަލުގައި ހޭދަ ކޮށްފައިވާތީ އެ ދުވަސްތައް ހުކުމުން ކަނޑައި ޖަލުގައި އޭނާ ހޭދަ ކުރަންޖެހޭ މުއްދަތު ވަނީ ތިން މހާއި 29 ދުވަސް ކަމަށް ވަނީ ކަނޑައަޅާފައެވެ.

އެހެން ނަމަވެސް އިއުތިރާފްވެފައިވާ ގޮތަށް މި އަދަބު ޖޫރިމަނާއަކަށް ބަދަލުކޮށް އޭނާ 23،800 ރުފިޔާއިން ޖޫރިމަނާކޮށް އެ ފައިސާ ފަސް މަސް ދުވަހުގެ ތެރޭގައި މީރާ އަށް ދައްކައި ހަލާސްކުރުމަށް ވަނީ ހުކުމް ކޮށްފައެވެ. އޭގެ އިތުރުން މަކަރާއި ހީލަތުން އެހެން މީހެއްގެ މުދަލެއްގެ މައްޗަށް ބާރު ހިންގުމުގެ ދައުވާ ސާބިތުވެ 28،800 ރުފިޔާއިން އޭނާ ޖޫރިމަނާކުރުމަށް ކުރިމިނަލް ކޯޓުން ވަނީ ހުކުމް ކޮށްފައެވެ. އަދި މި ފައިސާ ތިން މަސް ދުވަހުގެ ތެރޭ މީރާއަށް ދެއްކުމަށްވެސް ވަނީ އަންގާފައެވެ.