ނަޝީދަށް ދިން ހަމަލާ: ތަހުމީނު ދިރިއުޅޭ ގެއިން 16 އެކްސެސް ކާޑު ފެނުނު

ކުރީގެ ރައީސް މުހައްމަދު ނަޝީދު އަވަހާރަ ކޮށްލަން ދިން ބޮމުގެ ހަމަލާގެ މައްސަލައިގެ ތުހުމަތުގައި ދައުވާ ކޮށްފައިވާ ތަހުމީނު އަހުމަދު ދިރިއުޅޭ ގޭގެ ގްރައުންޑް ފްލޯގެ ސިޑި ދަށުން 16 އެކްސެސް ކާޑު ހޯދާފައިވާ ކަމަށް ހެކިބަސް ދިން ފުލުހަކު ބުނެފި އެވެ.

މޭ 6، 2021 ގައި ނަޝީދަށް އައިއީޑީއެއް ގޮވާލައިގެން ހަމަލާ ދިން މި މައްސަލައިގައި މިހާރު ކުރިއަށް ދަނީ ދައުލަތުގެ ހެކިންގެ ހެކިބަސް ނެގުމެވެ. މިއަދަށް ވެސް ތާވަލު ކޮށްފައި ވަނީ ހެކިބަސް ނެގުމަށެވެ.

ނަޝީދަށް ހަމަލާ ދީފައި ވަނީ ހަރުކަށި ފިކުރުގެ ބައެއް ކަމަށް ކުރިން ދައުލަތުން ބުނެފައިވެ އެވެ. އެމީހުން ދެކޭ ގޮތުގައި، ނަޝީދުގެ ލޭ ހުއްދަ ވާނެ ކަމަށް ތަހުގީގުގެ ހޯދުންތަކުގެ އަލީގައި ދައުލަތުން ބުނެފައިވެ އެވެ.

މި މައްސަލައިގައި މިއަދު ކްރިމިނަލް ކޯޓުގައި ބޭއްވި އަޑުއެހުމެއްގައި ތަހުމީނު ދިރިއުޅޭ އެޕާޓްމެންޓް ބަލައިފާސްކުރި ދެ އޮފިސަރުން ވަނީ ހެކިބަސް ދީފަ އެވެ. އެތަކުން އެއް އޮފިސަރު ބުނީ ތަހުމީނު ދިރިއުޅޭ ކޮޓަރިން އަތުން ލިޔެފައި އޮތް ހުތުބާއެއް ފެނިފައިވާ ކަމަށާއި، އެއީ ކައިވެނި ކޮށްދިނުމަށް އޭނާ ގެންގުޅޭ ހުތުބާއެއް ކަމަށް އޭނާ ބުނެފައިވާ ކަމަށެވެ. އަދި އެ ހުތުބާ ބޭނުންކޮށްގެން އެއް ކައިވެނި ކޮށްދީފައިވާނެ ކަމަށް ވެސް ތަހުމީނު ބުނި ކަމަށެވެ.

ތަހުމީނު ދިރިއުޅޭ އެޕާޓްމެންޓްގެ ޑީފްރީޒަރު ތެރޭ ހުރި ބާލިދީއެއްގެ ތެރެއިން ބައެއް ސާމާނު ހޯދާފައިވާ ކަމަށް ހެކިވެރިން ބުންޏެވެ. އެގޮތުން، ވާވޭ ފޯނެއްގެ ބަޔަކާއި ފޯނު ގަތް ބިލުގެ ތަންކޮޅަކާއި ސިމްކާޑު ލައްވާ އެތިކޮޅެއް ފެނިފައިވެ އެވެ. އަދި ދެ ޓޭޕްރޯލާއި ތުންދިގު ނަރުކެނޑިއެއް ފެނިފައިވާ ކަމަށް ވެސް ހެކިވެރިޔާ ބުންޏެވެ.

އޭގެ އިތުރުން ތަހުމީނު އުޅޭ އިމާރާތުގެ ގްރައުންޑްފްލޯގެ ސިޑިދަށުގައި ހުރި ކޮތަޅެއްގެ ތެރެއިން ފަގުޑިއަކާއި 16 އެކްސެސް ކާޑާއި ސައިކަލެއްގެ ކުރިމައްޗާއި ފަހަތުގެ ނަންބަރު ބޯޑެއް ފެނިފައިވާ ކަމަށް ހެކިވެރިޔާ ބުންޏެވެ. ނަމަވެސް އެ ކާޑުތަކާއި ސައިކަލުގެ ނަންބަރު ބޯޑަކީ އޭނާގެ ތަކެތި ނޫން ކަމަށާއި ފަގުޑިއަކީ އޭނާގެ އެއްޗެއް ކަމަށް ތަހުމީނު ބުނެފައިވާ ކަމަށް އޮފިސަރު ވަނީ ބުނެފަ އެވެ.

ރައީސް ނަޝީދަށް ހަމަލާދީފައި ވަނީ ވޭވް ސައިކަލެއްގައި އައިއީޑީއެއް ހަރުކޮށް، ރިމޯޓެއް މެދުވެރިކޮށް ގޮއްވާލައިގެންނެވެ. އެ ސައިކަލަކީ މި މައްސަލައިގައި ދައުވާ ލިބޭ ތަހުމީނުގެ ނަމުގައި ރަޖިސްޓްރީ ކޮށްފައިވާ ސައިކަލެވެ. މި ސައިކަލަކީ 2018 ވަނަ އަހަރު މީހަކު އަތުން ގަނެފައިވާ ސައިކަލެކެވެ. ސައިކަލުގެ މައުލޫމާތު ފޮރުވުމުގެ ގޮތުން އޭގެ އިންޖީނު ނަންބަރާއި ޗެސިސް ނަންބަރު ފޮހެލާފައިވާ ކަމަށް ކުރިން ހެކިބަސް ދިން އޮފިސަރަކު ވަނީ ބުނެފަ އެވެ.

ރައީސް ނަޝީދަށް ހަމަލާ ދިން މައްސަލައިގައި ދައުލަތުން ދައުވާކޮށްފައިވާ މީހުންނަކީ މއ. ފޭރުގެ މުޖާޒް އަހްމަދާއި، އ. ކޮނޑޭ، ފޮޅޭމާ، ތަހުމީން އަހްމަދާއި، ނ. މަނަދޫ ނޫރީގެ އަލީ ހައިޝަމްގެ އިތުރުން ގއ. ވިލިނގިލި ހުދުރުވާގެ، ފަހުމީ އަލީ އާއި، އއ. މާޅޮސް އަސަރީގެ، މުހައްމަދު ނާޒިމް އަދި މ. ކުދެހިގެ އިސްހާގެވެ.