"އޮފިސަރުން ހައްޔަރު ކުރުމުން ޖަލުން ކުރާ ސްކޭމް ކޯލުތައް ބޮޑުތަނުން މަދުވެއްޖެ"

ޖަލަށް މަސްތުވާތަކެއްޗާއި ފޯނާއި އެ ނޫން ބައެއް ތަކެތި އެތެރެކޮށްދޭ ކަމުގެ ތުހުމަތުގައި މޯލްޑިވްސް ކަރެކްޝަނަލް ސާވިސްގެ 19 އޮފިސަރަކު ވަޒީފާއިން އެކަހެރިކުރި ހިސާބުން ސްކޭމް ކޯލުތައް ކުރުމާއި ސްކޭމް ކޮށްގެން ފައިސާ ހޯދުން ވަރަށް ބޮޑަށް މަދުވެފައިވާ ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.

މިދިޔަ ޖޫން މަހުގެ ތެރޭގައި ސިފައިންނާއި ފުލުހުން އަދި ކަރެކްޝަންސްގެ އޮފިސަރުން ގުޅިގެން ހިންގި ބޮޑު އޮޕަރޭޝަނެއްގައި 13 އޮފިސަރަކު ވަނީ ހައްޔަރުކޮށްފަ އެވެ. އެ އޮފިސަރުންގެ އެކައުންޓަށް އާދަޔާ ހިލާފަށް ގިނަ އަދަދެއްގެ ފައިސާ ޖަމާ ކޮށްފައިވާ ކަމަށް މިނިސްޓަރު ކުރިން ހާމަކުރައްވާފައިވެ އެވެ.

މިއަދު ރައްޔިތުންގެ މަޖިލީހަށް ވަޑައިގެން މެންބަރުންގެ ސުވާލުތަކަށް ޖަވާބު ދެއްވަމުން މިނިސްޓަރު ވިދާޅުވީ އެ އޮފިސަރުން ނެގި ފަހުން މިހާރު ޖަލު ތެރެއިން ހިންގާ ސްކޭމް ކޯލުތައް ވަރަށް ބޮޑަށް މަދުވެފައިވާ ކަމަށެވެ. 

"އެފަހުން އަޅުގަނޑުމެންނަށް ފާހަގަކުރެވޭ ޖަލުން މިކަމުގަ ބައިވެރިވާލެއް ވަރަށް ބޮޑުތަނުން ކުޑަވެފަ މިއޮތީ. އެހެންނަމަވެސް 100 ޕަސެންޓް މި މައްސަލަ ހައްލެއް ނުވޭ،"

މިނިސްޓަރު ވިދާޅުވީ އެއީ އަދި ދާއިމީ ހައްލެއް ނޫން ކަމަށާއި، ދާއިމީ ހައްލެއް އެކަމަށް ލިބޭނީ ސިސްޓަމަށް ބައެއް ކަހަލަ ބަދަލުތައް ގެނެސްގެން ކަމަށެވެ. އެގޮތުން ޖަލުތަކުގައި ޖިއޯފެންސް ގާއިމްކޮށް، ޖަލުތެރޭގައި ފޯނު ބޭނުން ނުކުރެވޭ ގޮތް ހެދުމުގެ މަސައްކަތް ކުރަމުންދާ ކަމަށް ވިދާޅުވި އެވެ.

"އަޅުގަނޑުމެން ހަވާލުވިއިރު ޖަލުތެރެއަށް އޮފިސަރުން ވަދެގެން ދަނީ އެއްވެސް ވަރަކަށް ސްކޭނެއް ނުކުރެވި، އެތާކު ނެތް އެއްވެސް މެޝިނެއް. މިހާރު ވަގުތީ ގޮތުން މެޓާޑިޓެކްޓާއެއް ހަރުކުރެވި، އެހެންނަމަވެސް ފުލް ބޮޑީ ސްކޭނެއް މިހާރު އަޅުގަނޑުމެން ވާނީ ގެނައުމުގެ މަގުމަތީ،" މިނިސްޓަރު ވިދާޅުި އެވެ.

މި ސަރުކާރުން ހަވާލުވިއިރު ޖަލަށްވައްދާ ތަކެތި ސްކޭން ނުކުރެނެ ނިޒާމެއް އަދި ޖަލަށް ވަންނަ އޮފިސަރުން ސްކޭން ކުރާނެ މެޝިނެއްހާ މިންވަރު ވެސް ނެތް ކަމަށް އޭނާ ވިދާޅުވި އެވެ. މިހާރު ޖަލަށް ވައްދާ ތަކެތި ސްކޭން ކުރާނެ ވަގުތީ މެޝިނެއް ބަހައްޓާފައިވާކަން ވެސް މިނިސްޓަރު ފާހަގަކުރެއްވި އެވެ.

މިނިސްޓަރު އިތުރަށް ވިދާޅުވީ ފުލުހުގައި ގާއިމްކޮށްފައިވާ އެންޓި ސްކޭމް ސެންޓަރު ހުޅުވިފަހުން ސްކޭމްކޮށްގެން ވަގަށް ނަގާ ފައިސާ ކުރިއަށްވުރެ އަވަހަށް ހޯދެމުންދާ ކަމަށެވެ.

ޖަލަށް މަސްތުވާތަކެއްޗާއި ފޯނު ވައްދައިދޭ އޮފިސަރުންގެ ތެރެއިން ފަސް އޮފިސަރަކަށް ވަނީ ދައުވާކޮށްފަ އެވެ. ފުލުހުން މީގެ ކުރިން ބުނެފައި ވަނީ ތުހުމަތު ކުރެވޭ އޮފިސަރުންގެ އެކައުންޓަށް މިލިއަނުން ފައިސާ ވަދެފައިވާ ކަމަށެވެ. އެއީ ރިޝްވަތުގެ ފައިސާ އެވެ.

އެކެއްގެ އެކައުންޓަށް މިދިޔަ އަހަރު 24 މިލިއަން ރުފިޔާ ޖަމާކޮށްފައިވެ އެވެ. އަދި 18 މީހުންގެ އެކައުންޓަށް ޖުމްލަ 73 މިލިއަން ހަ ލައްކަ ރުފިޔާ ޖަމާވެފައިވެ އެވެ. މި އޮފިސަރުންގެ ތެރެއިން ހަ އޮފިސަރަކު މި އަހަރު ވަނީ ވަޒީފާ އިން ވަކިވެފަ އެވެ.

މިނިސްޓަރު އިހުސާން ކުރިން ވިދާޅުވި ގޮތުގައި އެއިން ވަރަށް ގިނަ އޮފިސަރުންގެ އެކައުންޓުތަކަށް ފައިސާ ޖަމާކޮށްފައި ވަނީ ކުދި އަދަދުތަކުންނެވެ. ބައެއް އޮފިސަރުންގެ އެކައުންޓުތަކަށް 5،000 ރުފިޔާއާއި 10،000 ރުފިޔާއާ ދެމެދުގެ އަދަދަކަށް ފައިސާ ޖަމާވެފައި ހުރިކަން ފާހަގަކުރެވިފައިވާ ކަމަށެވެ.