ކިލޯއެއްގެ ޑްރަގާއި ބައިލައްކަ އަަށްވުރެ ގިނަ ރުފިޔާ އާއެކު ޒުވާނަކު ހައްޔަރުކޮށްފި

މާލޭގެ އެޕާޓުމަންޓަކުން ކިލޯއެއްހާ މަސްތުވާތަކެއްޗާއި ގިނަ އަދަދެއްގެ ރުފިޔާ އާއެކު 19 އަހަރުގެ ޒުވާނަކު ހައްޔަރުކޮށްފިއެވެ.

މަސްތުވާތަކެތި ބޭނުންކޮށް، ގެންގުޅެ، އެކަމުގެ ވިޔަފާރި ކުރި ކަމުގެ ތުހުމަތުގައި ހައްޔަރުކޮށްފައިވަނީ، ކ. ކާށިދޫ، އަންދަލީބުގެ، މުހައްމަދު މައިހާން ފަޔާޒުއެވެ.

އޭނާ ހައްޔަރުކޮށް ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން، ކުރިމިނަލް ކޯޓުން ވަނީ 10 ދުވަސް ބަންދަށް ޖަހާފައެވެ.

ބަންދު އަމުރުގައިވާގޮތުން އޭނާ އަށް ތުހުމަތުކޮށްފައިވާ ކުށް، ކުރި ކަމަށް ތުހުމަތުވާ ވަރަށް ހެކި ގަރީނާ ވަނީ ހުށަހަޅާފައެވެ. އެގޮތުން ސީނަށް ދިޔަ ފުލުހުންގެ ބަޔާން ވަނީ ހުށަހަޅާފައެވެ.

އަމުރުގައިވާ ގޮތުގައި އޭނާ ދިރިއުޅޭ އެޕާޓުމަންޓުން ކިލޯއެއްހާ މަސްތުވާތަކެތި ކަމަށް ބެލެވޭ އެއްޗެއް ފެނިފައިވެއެވެ. އަދި 64،000 ރުފިޔާ އާއި މަސްތުވާތަކެތި ބަންދުކުރުމަށް ބޭނުންކުރާ އާލާތްތަށް ފެނިފައިވާ ކަމަށްވެސް އަމުރުގައިވެއެވެ.

ސީނުގައި މީނާ ހެކި ނައްތާލަން މަސައްކަތް ކުރި ކަމަށާއި، އޭނާގެ ކުޑަކަމުދާތަކެތި މަސްތުވާތަކެއްޗަށް ޕޮޒިޓިވް ވެފައިވާ ކަމަށްވެސް އަމުރުގައިވަނީ ފާހަގަކޮށްފައެވެ.

އޭނާ ކޯޓުގައި ބުނެފައިވަނީ އޭނާ އެގެއަށް ދިރިއުޅެން އައިތާ ވީ ތިން ދުވަސް ކަމަށާއި ފެނުނު ތަކެއްޗާއި އޭނާ އާ ގުޅުމެއް ނުވާ ކަމަށެވެ.